លីប៊ីមួយឆ្នាំក្រោយការផ្តើមឡើងនៃបដិវត្តន៍
១៧កុម្ភៈ២០១១ -១៧កុម្ភៈ២០១២។ ថ្ងៃនេះគឺជាខួបគម្រប់មួយឆ្នាំគត់នៃបដិវត្តន៍នៅប្រទេសលីប៊ី បដិវត្តន៍ដែលបានរំលំរបបរបស់លោកកាដាហ្វី និងដែលបានសម្លាប់អ្នកដឹកនាំផ្តាច់ការរូបនេះ នៅថ្ងៃទី២០តុលាឆ្នាំ២០១១។ មួយឆ្នាំក្រោយមក ប្រទេសលីប៊ីនៅតែគ្មានសន្តិសុខ រីឯសេដ្ឋកិច្ចនៃប្រទេសវិញបានធ្លាក់ដល់បាត។ ប៉ុន្តែ ប្រជាពលរដ្ឋមានសេរីភាពនិងរង់ចាំការបោះឆ្នោតដែលនឹងត្រូវប្រព្រឹត្តទៅនៅខែមិថុនាខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ជាផ្លូវការ អាជ្ញាធរថ្មីនៃប្រទេសលីប៊ីបានកំណត់យកថ្ងៃទី១៧កុម្ភៈថា ជាថ្ងៃផ្តើមឡើងនៃបដិវត្តន៍។ ក៏ប៉ុន្តែ តាមពិត កាលណោះ ប្រជាពលរដ្ឋលីប៊ីបានចាប់ផ្តើមប្រឆាំងនឹងរបបកាដាហ្វីនៅថ្ងៃទី១៥កុម្ភៈ នៅទីក្រុងBenghazi ដែលក្រោយមកក្លាយជាទីក្រុងនិមិត្តរូបសម្រាប់ពួកប្រឆាំង។
បន្តិចម្តងៗ ការបះបោរបានរីករាលដាលពីទីក្រុងមួយទៅទីក្រុងមួយទៀត ពីBenghazi ទៅTobrouk Brega និងRas Lanouf។ ទន្ទឹមនោះ កាដាហ្វីបានរៀបចំប្រតិបត្តិការវាយបង្ក្រាបទៅលើទីក្រុងBenghazi តែការវាយបង្ក្រាបត្រូវបានសហគមន៍អន្តរជាតិខ្ទប់ទាន់ពេលវេលា។ កាលណោះ គឺនៅថ្ងៃទី១៩មីនា២០១១ កងទ័ពជើងអាកាសរបស់ណាតូដឹកមុខដោយបារាំង អង់គ្លេសនិងអាមេរិក បានធ្វើការវាយប្រហារទៅលើរថក្រោះនិងយន្តហោះចម្បាំងរបស់កាដាហ្វី។
ការប្រយុទ្ធគ្នារវាងពួកបដិវត្តន៍និងរបបកាដាហ្វីបានប្រព្រឹត្តទៅជាច្រើនខែ។ នៅថ្ងៃទី២៣សីហាឆ្នាំ២០១១ រដ្ឋធានីទ្រីប៉ូលីបានធ្លាក់ រីឯកាដាហ្វីបានភៀសខ្លួនទៅSyrte ជាទីដែលពួកប្រឆាំងបានចាប់ខ្លួនគាត់រួចហើយបានសម្លាប់គាត់ចោល នៅថ្ងៃទី២០តុលាឆ្នាំ២០១១។
មួយឆ្នាំក្រោយមក រលកនៃសេរីភាពបានគ្របដណ្តប់ទៅលើប្រទេសលីប៊ី ដែលនៅខែមិថុនាខាងមុខនេះ នឹងរៀបចំបោះឆ្នោតបែបប្រជាធិបតេយ្យជាលើកទីមួយបង្អស់ ក្នុងរយៈពេលជាង៤០ឆ្នាំចុងក្រោយនេះ។
ក៏ប៉ុន្តែ ប្រទេសទាំងមូលផុងខ្លួនក្នុងភាពអនាធិបតេយ្យ។ សេដ្ឋកិច្ចលែងដំណើរការ អសន្តិសុខកើតឡើងគ្រប់ទីកន្លែង ពីព្រោះពួកអតីតអ្នកបះបោរមួយចំនួនធំ ដែលគេហៅថា ពួកThouars នៅបន្តកាន់អាវុធ និងគំរាមប្រជាជន ក្នុងពេលមួយដែលស្ថាប័នប៉ូលិសនិង ស្ថាប័នកងទ័ពមិនទាន់ត្រូវបង្កើតឡើងនៅឡើយ។ ទន្ទឹមនេះ បើយោង ទៅតាមAmnesty International ពួកThouars បាននិងកំពុងបន្តសម្លាប់ពួកអ្នកដែលបានគាំទ្ររបបរបស់ កាដាហ្វី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ