នាវារុស្ស៊ីត្រូវសង្ស័យថាដឹកឧទ្ធម្ភាគចក្រចម្បាំងទៅឲ្យស៊ីរី
មកពីមូលហេតុនេះ បានជាក្រុមហ៊ុនធានារ៉ាប់រងអង់គ្លេស បានប្រកាសព្រឹកមិញអំពីការលុបចោលកិច្ចសន្យាដែលធានារ៉ាបរងកប៉ាល់រុស្ស៊ីនេះ ដើម្បីចៀសវាងការរំលោភបំពានលើទណ្ឌកម្ម របស់សហភាពអឺរ៉ុបដែលហាមមិនឲ្យបញ្ជូនអាវុធអ្វីណា ទៅបំពាក់ដល់របបគ្រប់គ្រងនៅស៊ីរីឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាមកាសែតអង់គ្លេស Daily Telegraph លេខថ្ងៃនេះ កប៉ាល់រុស្ស៊ីឈ្មោះAlaed ដែលមានម្ចាស់វាគឺក្រុមហ៊ុនរុស្ស៊ី Femco ក្រោយពីចាកចេញពីផែ Kaliningrad នៅប៉ែកខាងលិចបង្អស់នៃប្រទេសរុស្ស៊ីពេលបើកទៅដល់លំហសមុទ្រម្តុំឆ្នេរ Ecosse ជាទឹកដីអង់គ្លេសក៍បានបង្ខំចិត្តបោះយុថ្កាចតនៅទីនោះទៅ បន្ទាប់ពីត្រូវក្រុមហ៊ុនធានារ៉ាបរងអង់គ្លេស Standard Club ព្រមានប្រាប់អំពីការលុបចោលកិច្ចសន្យាដែលធានារ៉ាបរងកប៉ាល់រុស្ស៊ីនេះ។
មូលហេតុតាមដែលក្រុមហ៊ុនអង់គ្លេសនោះ ពន្យល់ទៅទីភ្នាក់ងារព័ត៌មានបារាំង AFP គឺមកពីមានដំណឹងថា នាវារុស្ស៊ី Alaed ដឹកសម្ភារៈយោធាទៅកាន់ប្រទេសស៊ីរី។
កាសែតDaily Telegraph ក៏ចុះផ្សាយសំដីអ្នកមុខអ្នកការអង់គ្លេស ថ្លែងទៅ Standard Club ថាការធានារ៉ាបរងចំពោះនាវាដែលដឹកស្បៀងយោធាបែបនេះ គឺពិតជារំលោភលើទណ្ឌកម្ម ប្រកាសដោយសហភាពអឺរ៉ុបដែលហាមមិនឲ្យផ្តល់អាវុធអ្វីណា ទៅប្រទេសស៊ីរីឡើយ ជាទីដែលតាមតួលេខអង្គការក្រៅរដ្ឋាភិបាល ក្នុងរយៈពេលជាង១ឆ្នាំកន្លងទៅ ដោយមកពីប្រតិបត្តិការបង្ក្រាប ពីខាងកងកម្លាំងស៊ីរីទៅលើពួកប្រឆាំងមានបណ្តាជនធ្លាក់ខ្លួនស្លាប់អស់ជាង១ម៉ឺន៤ពាន់នាក់ទៅហើយ។
ស.រ.អា. ក្នុងសប្តាហ៏មុនបានឲ្យសញ្ញាទៅរដ្ឋាភិបាលអង់គ្លេសថា នាវារុស្ស៊ី Alaed ដែលធានារ៉ាបរងដោយក្រុមហ៊ុនអង់គ្លេស Standard Club គឺផ្ទុកទៅដោយឧទ្ធម្ភាគចក្ររុស្ស៊ីធុន Mi-25 លក់ទៅឲ្យស៊ីរីជំនាន់សហភាពសូវៀតហើយដែលត្រូវបានទីក្រុងដាម៉ាសបញ្ជូនមកទទួល ការជួសជុលនៅរុស្ស៊ីវិញ។ ដំណឹងនេះ ចុះផ្សាយដោយកាសែតអង់គ្លេសមួយទៀត គឺ កាសែត Sunday Telegraph ដែលហៅឧទ្ធម្ភាគចក្រចម្បាំងរុស្ស៊ីធុន Mi-25 ថាជា “ រទេះតង់ហោះ”។
ឧទ្ធម្ភាគចក្ររុស្ស៊ីដែលកំពុងត្រូវគេដឹកទៅស៊ីរី តាមសំដីលោកស្រីរដ្ឋមន្ត្រីការបរទេស អាមេរិកាំង Hillary Clinton ថ្លែងដោយក្តីបារម្ភកាលពីថ្ងៃ១២មិថុនា គឺទុកសម្រាប់បង្ក្រាបចលនាបះបោរទល់នឹងរបបគ្រប់គ្រងនៅក្រុងដាម៉ាស។
ថ្លែងដោះសារថ្ងៃ១៨មិថុនាម្សិលមិញក្នុងបរិវេណនៃជំនួបកំពូល G-20 នៅប្រទេសម៉ិកស៊ិកអ្នកនាំពាក្យផ្លូវការរបស់ប្រធានាធិបតីរុស្ស៊ី លោក Dmitri Peskov ពន្យល់បំភ្លឺថា រុស្ស៊ីឥតលក់ ឥតបញ្ជូន ឧទ្ធម្ភាគចក្រថ្មីៗអ្វីណាទៅស៊ីរីឡើយ។ រុស្ស៊ី គ្រាន់តែជួសជុលឧទ្ធម្ភាគចក្រចាស់ៗដែលមានលក់ទៅឲ្យស៊ីរីតាំងពីសម័យសូវៀតម៉្លេះ ហើយឧទ្ធម្ភាគចក្របែបនេះនៅសល់តែប៉ុន្មានគ្រឿងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ