មជ្ឈមណ្ឌលនុយក្លេអ៊ែរជប៉ុនមួយត្រូវបានគេយល់ព្រមឲ្យចាប់ដំណើរការឡើងវិញ
នៅថ្ងៃអង្គារទី២៨តុលានេះ អាជ្ញាធរនៅក្រុងមួយរបស់ប្រទេសជប៉ុន បានយល់ព្រមឲ្យ ចាប់ដំណើរការឡើងវិញ នូវមជ្ឈមណ្ឌលនុយក្លេអ៊ែរមួយនៅលើទឹកដីខ្លួន។ គឺជាវិធានការលើកដំបូងបង្អស់ដែរ ចាប់តាំងពីមានគ្រោះមហន្តរាយនុយក្លេអ៊ែរ នៅ Fukushima នៅខែមីនាឆ្នាំ២០១១មក។
ចុះផ្សាយនៅថ្ងៃ៖
ស្តាប់ - ០២:២៨
ក្រុមប្រឹក្សាក្រុង Satsumasendai ទើបប្រកាសយល់ព្រមនៅថ្ងៃអង្គារ២៨តុលានេះ ការដាក់ឲ្យមានដំណើរការប្រតិករនុយក្លេអ៊ែរ ២ឡើងវិញនៅមជ្ឈមណ្ឌល Sendai ដោយមានសំឡេងឆ្នោតគាំទ្រភាគច្រើនដ៏លើសលុប ។ ក្រុមប្រឹក្សាក្រុងនេះ ចាត់ទុកថា វិស័យនុយក្លេអ៊ែរ គឺជាប្រភពដ៏សំខាន់បំផុតនៃចំណូលថវិកាសំរាប់ប្រទេសជាតិ និងក៏ ផ្តល់ជាការងារជូនដល់ប្រជាជនជប៉ុនប្រមាណ១០ម៉ឺននាក់ ដែលរស់នៅក្រុងមួយ ចម្ងាយប្រមាណជា១០០០ គីឡូម៉ែត្រភាគនិរតីនៃទីក្រុងតូក្យូ។
យោងតាមការថ្លែងរបស់សមាជិកម្នាក់នៃក្រុមប្រឹក្សាក្រុង ជូនដល់ទីភ្នាក់ងារព័តម៌ានReuters ក្នុងចំណោមសមាជិកក្រុមប្រឹក្សាក្រុងទាំងអស់២៦នាក់ សំឡេងអ្នកគាំទ្រ មានចំនួន១៩ អ្នកប្រឆាំងមាន៤សំឡេង និងអ្នកបោះអនុប្បវាទមានចំនួន៣សំឡេង។
ទោះជាយ៉ាងក្តី មជ្ឈមណ្ឌលនុយក្លេអ៊ែរនេះនឹងអាចមានដំណើរការទៅបាន យ៉ាងហោចណាស់ក៏ត្រូវប្រើពេលវេលារហូតទៅដល់ឆ្នាំក្រោយដែរ ដោយ ម្ចាស់ក្រុមហ៊ុន Kyushu Electic Power ត្រូវធ្វើការឆ្លងកាត់ដំណាក់ការ ធ្វើតេស្ត៍សុវត្ថិភាពនៅទីនោះជាមុនសិន។
គួរំលឹកថា ប្រទេសជប៉ុន បានបញ្ឈប់ដំណើរការបន្តិចម្តងៗ ប្រតិករនុយក្លេអ៊ែរសរុប៤៨ ក្រោយបន្ទាប់មានគ្រោះមហន្តរាយនុយក្លេអ៊ែរដ៏ធ្ងន់ធ្ងរបំផុតនៅ Fukushima។ ដើម្បីទូទាត់ផាត់សងជាមួយនឹងការខាតបង់ផលិតកម្មនុយក្លេអ៊ែរ ដែលមានទំហំជិត១/៣ នៃការប្រើប្រាស់អគ្គីសនីនៅក្នុងប្រទេស ជប៉ុនត្រូវនាំចូលក្នុងស្រុកថាមពលអគ្គិសនីជាច្រើនថែមទៀតដែលជាបន្ទុកដ៏ធ្ងន់ធ្ងរដល់វិស័យសេដ្ឋកិច្ចជប៉ុន។
ម្យ៉ាងទៀត ការប្រកាសយល់ព្រមឲ្យមានដំណើរការមជ្ឈមណ្ឌលនុយក្លេអ៊ែរជប៉ុនឡើងវិញនេះ បានបង្កឲ្យមាន អរិភាពយ៉ាងផុសផុលពីសំណាក់ប្រជាជនដែលរស់នៅក្បែរតំបន់មណ្ឌលនុយក្លេអ៊ែរ ដោយ ពួកគេភ័យខ្លាចនិងគិតថាពួកគេច្បាស់ជានឹងប្រឈមមុខនឹងគ្រោះថ្នាក់មហន្តរាយនុយក្លេអ៊ែរដូចគ្នាដែរ។
នៅ Ichikikushikino តំបន់មួយដែលស្ថិតនៅចម្ងាយមិនដល់៥គីឡូម៉ែត្រផង ពីមជ្ឈមណ្ឌល នុយក្លេអ៊ែរ Sendai ប្រជាជនជាងពាក់កណ្តាលនៃចំនួនទាំងអស់ ៣ម៉ឺននាក់រស់នៅ- បាននាំគ្នាចុះហត្ថលេខាលើញត្តិមួយដើម្បីធ្វើការប្រឆាំងទល់នឹងការដាក់ដំណើរការឡើងវិញនូវប្រតិករនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ