ជំនួបកំពូល G8 ៖ អាមេរិកនិងអឺរ៉ុបខ្វែងគំនិតគ្នាលើនយោបាយសេដ្ឋកិច្ច
ជំនួបកំពូលក្រុមប្រទេស G8 នឹង បើកធ្វើ នៅថ្ងៃសុក្រ ទី២៥ មិថុនា ២០១០នេះ មុននឹងឈានទៅបើកជំនួបកំពូល G20 នៅថ្ងៃសៅរ៍ និងថ្ងៃអាទិត្យ។ ប្រធានបទចម្បង ក្នុងជំនួបកំពូល G8 នេះ គឺនឹងផ្តោតទៅលើភាពចម្រូងចម្រាស់គ្នា រវាងអាមេរិក និងសហភាពអឺរ៉ុប ជុំវិញការកាត់បន្ថយបំណុលសាធារណៈ។
ចុះផ្សាយនៅថ្ងៃ៖
បទវិភាគរបស់ សេង ឌីណា
ចាប់តាំងពីផ្ទុះវិបត្តិនៅប្រទេសក្រិកមក បណ្តាប្រទេសសមាជិកសហភាពអឺរ៉ុបបាននាំគ្នាដាក់ចេញនូវនយោបាយថ្មីមួយ គឺធ្វើយ៉ាងណាកាត់បន្ថយការចំណាយ ដើម្បីកាត់បន្ថយបំណុលរបស់រដ្ឋ។ គោលដៅ គឺដើម្បីស្តារទំនុកចិត្តពីសំណាក់អ្នកវិនិយោគ ចៀសវាងការរីករាលដាលនៃវិបត្តិក្រិក ទៅបណ្តាប្រទេសផ្សេងទៀត ក្នុងតំបន់អឺរ៉ូ។
ក៏ប៉ុន្តែ រដ្ឋាភិបាលអាមេរិកបានសម្តែងនូវការមិនពេញចិត្តចំពោះនយោបាយរបស់សហភាពអឺរ៉ុបនេះ។ មន្រ្តីរដ្ឋាភិបាលអាមេរិក រួមទាំងលោកប្រធានាធិបតីអូបាម៉ាផង យល់ថា នៅក្នុងពេលដែលពិភពលោកកំពុងតែខិតខំងើបចេញពីវិបត្តិសេដ្ឋកិច្ច គេគួរតែនាំគ្នាផ្តោតជាអាទិភាពលើការជំរុញកំណើនសេដ្ឋកិច្ច។ ប្រសិនបើគ្រប់ប្រទេស នាំគ្នាកាត់បន្ថយការចំណាយ វានឹងនាំឲ្យកំណើនសេដ្ឋកិច្ចត្រូវរាំងស្ទះ ហើយគេនឹងមិនអាចងើបចេញពីវិបត្តិរួចនោះទេ។
ការខ្វែងគំនិតគ្នានេះ ប្រាកដជានឹងក្លាយទៅជាការជជែកតស៊ូមតិគ្នា នៅក្នុងជំនួបកំពូលក្រុម G8 (សហរដ្ឋអាមេរិក, អាឡឺម៉ង់, អង់គ្លេស, បារាំង, អ៊ីតាលី, ជប៉ុន, កាណាដា និងរុស្ស៊ី) នៅថ្ងៃសុក្រនេះ។ នៅមុនពេលបើកជំនួបកំពូល លោកអូបាម៉ា បានទូរស័ព្ទទៅកាន់នាយករដ្ឋមន្រ្តីអង់គ្លេស និងប្រមុខរដ្ឋាភិបាលអាឡឺម៉ង់ ដើម្បីសម្តែងនូវកង្វល់របស់លោក ចំពោះនយោបាយសន្សំសំចៃរបស់អឺរ៉ុប។ ក៏ប៉ុន្តែ ប្រមុខរដ្ឋាភិបាលអាឡឺម៉ង់ លោកស្រីអង់ហ្កេឡា មែរកិល (Angela Merkel) បានអះអាងថា ការកាត់បន្ថយការចំណាយនៅអឺរ៉ុបនឹងមិនធ្វើឲ្យរាំងស្ទះដល់កំណើនសេដ្ឋកិច្ច ដូចការព្រួយបារម្ភរបស់អាមេរិកនោះទេ។
កាលពីយប់ថ្ងៃព្រហស្បតិ៍នេះ រដ្ឋមន្រ្តីក្រសួងសេដ្ឋកិច្ចអាមេរិកបានព្យាយាមបន្ធូរបន្ថយភាពតានតឹងបន្តិច ដោយបានលើកឡើងថា ថ្វីដ្បិតតែអាមេរិក និងសហភាពអឺរ៉ុបមានជំហរខុសគ្នាក៏ពិតមែន ក៏ប៉ុន្តែ គោលដៅគឺមានដូចគ្នា។ ដូច្នេះ លោកជឿថា នៅទីបំផុត អាមេរិក និងអឺរ៉ុប ប្រាកដជាអាចស្វែងរកជំហររួមគ្នាមួយ។ រដ្ឋមន្រ្តីក្រសួងសេដ្ឋកិច្ចអាមេរិកបានទទួលស្គាល់ថា ការកាត់បន្ថយបំណុលសាធារណៈ ដើម្បីស្តារទំនុកចិត្តពីសំណាក់អ្នកវិនិយោគ គឺជារឿងចាំបាច់ ក៏ប៉ុន្តែ អឺរ៉ុបគួរតែថ្លែងថ្លែងគ្នាឲ្យបានស្មើ ធ្វើយ៉ាងណាកុំឲ្យការកាត់បន្ថយចំណាយមានចំនួនច្រើនហួសហេតុពេក រហូតដល់ប៉ះពាល់ដល់កំណើនសេដ្ឋកិច្ច។
មិនថាតែរដ្ឋាភិបាលទេ ដែលខ្វែងគំនិតគ្នា។ សូម្បីតែសេដ្ឋវិទូ ក៏មានគំនិតផ្ទុយគ្នាដែរ អំពីការកាត់បន្ថយការចំណាយសាធារណៈនេះ។ អ្នកខ្លះយល់ថា គេគួរតែរង់ចាំឲ្យស្ថានភាពសេដ្ឋកិច្ចចេញផុតពីវិបត្តិឲ្យបានស្រួលបួល និងមានស្ថិរភាពសិន មុននឹងចាប់ផ្តើមធ្វើការកាត់បន្ថយបំណុលសាធារណៈ។ អ្នកខ្លះទៀតយល់ថា គេត្រូវតែចាប់ផ្តើមកាត់បន្ថយបំណុលពីពេលនេះទៅ ដើម្បីចៀសវាងកុំឲ្យអ្នកវិនិយោគបាត់បង់ទំនុកចិត្ត ដែលជាដើមហេតុនាំឲ្យរាំងស្ទះដល់កំណើនសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ