ផែនការត្បិតត្បៀត ជាវិធានការមិនអាចចៀសរួចសម្រាប់សហភាពអឺរ៉ុប ?
ដើម្បីកាត់បន្ថយឱនភាពថវិកា និងបំណុលសាធារណៈ ប្រទេសអឺរ៉ុបមួយចំនួនបានចាប់ផ្តើមអនុម័តនូវផែនការត្បិតត្បៀត សន្សំសំចៃរបស់ខ្លួន។ បន្ទាប់ពីប្រទេសក្រិក ព័រទុយហ្កាល អេស្បាញ និងប្រទេសអង់គ្លេសមក គឺដល់វេនប្រទេសអ៊ីតាលីម្តងដែលកាលពីថ្ងៃអង្គារ ទី២៥ ឧសភាម្សិលមិញ បានអនុម័តនូវផែនការត្បិតត្បៀត សន្សំសំចៃចំនួន ២ម៉ឺន ៤ពាន់លានអឺរ៉ូសម្រាប់រយៈពេល ២ឆ្នំា គឺ ២០១១ និង ២០១២។ តើផែនការត្បិតត្បៀត សន្សំសំចៃនឹងត្រូវធ្វើឡើងក្រោមរូបភាពណាខ្លះ ?
ចុះផ្សាយនៅថ្ងៃ៖
បទអន្តរាគមន៍របស់ គួច គន្ធារ៉ា
ពាក្យថា ត្បិតត្បៀត សន្សំសំចៃ គឺកាត់បន្ថយការចំណាយ។ ចាប់ពីពេលនេះតទៅ និងនៅក្នុងកាលៈទេសៈបច្ចុប្បន្ន រដ្ឋាភិបាលអឺរ៉ុបនីមួយៗបង្ខំចិត្តសើរើ ពិនិត្យមើលឡើងវិញ គ្រប់ការចំណាយរបស់ខ្លួន ពិសេសកាត់បន្ថយការចំណាយណាដែលមិនចំាបាច់។ ផែនការត្បិតត្បៀត សន្សំសំចៃដែលប្រទេសអឺរ៉ុបមួយចំនួនបានផ្តើមអនុម័តម្តងមួយៗនាពេលនេះ គឺជាផែនការដែលប្រទេសនីមួយៗសម្រេចចិត្តដោយខ្លួនឯង ថាតើត្រូវកាត់បន្ថយការចំណាយតាមរបៀបណា និងនៅលើវិស័យណាខ្លះ។ ប៉ុន្តែពិនិត្យជារួម វិធានការកាត់បន្ថយការចំណាយសាធារណៈរបស់ប្រទេសនីមួយៗហាក់ដូចជាមិនសូវខុសគ្នាប៉ុន្មានទេ មានជាអាទិ៍៖ កាត់បន្ថយការចំណាយរបស់ក្រសួងមួយចំនួន កាត់បន្ថយប្រាក់ឧបត្ថម្ភដល់គណបក្សនយោបាយ កាត់បន្ថយប្រាក់ឧបត្ថម្ភដល់គ្រួសារមធ្យម កាត់បន្ថយប្រាក់បៀវត្សរបស់បុគ្គលិក មន្រ្តីរាជការ ពិសេស មន្រ្តីរាជការជាន់ខ្ពស់ និងរដ្ឋមន្រ្តី។ ដូចករណីប្រទេសអ៊ីតាលី រដ្ឋាភិបាលរបស់លោកនាយករដ្ឋមន្រ្តី Silvio Berlusconi បានសម្រេចមិនដំឡើងប្រាក់ខែឲ្យមន្រ្តីរាជការរយៈពេល ៣ឆ្នំា។ វិធានការកាត់បន្ថយការចំណាយសាធារណៈក៏ត្រូវប៉ះពាល់ដល់អាយុចូលនិវត្តន៍ដែរ ពិសេស ដូចយ៉ាងប្រទេសក្រិក គេត្រូវធ្វើការរហូតដល់អាយុ ៦៣ឆ្នំា ទើបចូលនិវត្តន៍បាន ចំណែកប្រទេសអេស្បាញវិញ ត្រូវធ្វើការដល់អាយុ ៦៧ឆ្នំាឯណោះ។ ការដំឡើងពន្ធដារ ក៏វិធានការមួយដើម្បីរកចំណូលបន្ថែមឲ្យហិបរបស់រដ្ឋដែរ ដូចយ៉ាងពន្ធលើបារី ស្រា និងប្រេងសំាងជាដើម។ មួយវិញទៀត ការដំឡើងពន្ធលើតម្លៃបន្ថែមក៏ជារឿងចៀសមិនផុតសម្រាប់ប្រទេសមួយចំនួន។ ពន្ធលើតម្លៃបន្ថែម គឺជាពន្ធលើទំនិញគ្រប់ប្រភេទដែលទិញដោយប្រជាជន អាចជាម្ហូបអាហារ ឬមួយក៏ជារបស់របរប្រើប្រាស់។
ជារួមរដ្ឋាភិបាលអាចនឹងចាត់វិធានការគ្រប់បែបយ៉ាងទំាងអស់ដែលខ្លួនអាចធ្វើទៅបាន ដើម្បីកាត់បន្ថយឱនភាពថវិកា និងបំណុលសាធារណៈ។
ផែនការត្បិតត្បៀត ដើម្បីកាត់បន្ថយឱនភាពថវិការ និងបំណុលសាធារណៈ
អ្វីៗបានចាប់ផ្តើមពីភាពជិតក្ស័យធនរបស់ប្រទេសក្រិក។ ក្នុងនាមជាប្រទេសមួយដែលចាយប្រាក់អឺរ៉ូ វិបត្តិសេដ្ឋកិច្ចនៅប្រទេសក្រិកបានធ្វើឲ្យទំាងអស់គា្នកើតក្តីបារម្ភ និងផ្សារភាគហ៊ុននៅទូទំាងពិភពលោកផ្តើមរំជើបរំជួល ម្ង៉ៃកាត់ ម្ង៉ៃកោររហូតមកទល់ពេលបច្ចុប្បន្ន។ គឺវិបត្តិសេដ្ឋកិច្ចក្រិកនេះឯង ដែលបានធ្វើឲ្យប្រាក់អឺរ៉ូបាត់បង់តម្លៃរបស់វាបន្តិចម្តងៗនៅចំពោះមុខប្រាក់ដុល្លារអាមេរិកំាង។ គឺវិបត្តិសេដ្ឋកិច្ចក្រិកនាពេលនេះឯង ដែលបានធ្វើឲ្យអ្នកវិនិយោគបាត់បង់ជំនឿលើស្ថិរភាពសេដ្ឋកិច្ចនៅក្នុងសហភាពអឺរ៉ុប និងតម្លៃប្រាក់អឺរ៉ូ។ ប្រទេសក្រិកដែលឱនភាពថវិកាក្នុងឆ្នំា២០០៩ មានរហូតដល់ទៅ១៣,៦% នៃផលិតផលក្នុងស្រុកសរុប។ មួយវិញទៀត អស់រយៈពេលជាច្រើនឆ្នាំមកហើយ ដែលរដ្ឋាភិបាលក្រិកចាយលុយហួសពីសមត្ថភាពរបស់ខ្លួន។ គិតត្រឹមឆ្នាំ២០០៩ បំណុលរបស់ប្រទេសក្រិកបានកើនឡើងរហូតដល់ជាង១១៥%នៃផលិតផលក្នុងស្រុកសរុប។ ដូច្នេះទីមួយ៖ ផែនការត្បិតត្បៀត សន្សំសំចៃដែលប្រទេសអឺរ៉ុបមួយចំនួនបានផ្តើមអនុម័តនាពេលនេះ គឺដើម្បីចៀសវាងកុំឲ្យស្ថានភាពហិរញ្ញវត្ថុរបស់ខ្លួនធ្លាក់រណ្តៅដូចករណីប្រទេសក្រិក។ ចំនុចមួយទៀត សមាជិកអឺរ៉ុបម្នាក់ៗ ពិសេសប្រទេសដែលចាយប្រាក់អឺរ៉ូ ត្រូវតែគោរពតាមសន្ធិសញ្ញារួមរបស់អឺរ៉ុប នោះគឺមិនត្រូវមានឱនភាពថវិការបស់ខ្លួនលើសពី ៣%នៃផលិតផលក្នុងស្រុកសរុប និងមិនឲ្យប្រាក់បំណុលរបស់ខ្លួនលើសពី៦០%នៃផលិតផលក្នុងស្រុកសរុប។ ប៉ុន្តែជាង ១០ឆ្នំាកន្លងទៅនេះ ប្រទេសអឺរ៉ុបសឹងតែទំាងអស់មិនបានអនុវត្តត្រឹមត្រូវតាមសន្ធិសញ្ញារួមរបស់អឺរ៉ុប និងបានទុកបណ្តោយឲ្យឱនភាពថវិការបស់ខ្លួនបន្តកើនឡើង ដោយចាយលុយហួសពីសមត្ថភាពដែលខ្លួនមានរហូតដល់ជំពាក់បំណុលគេវ័នក គ្មានលទ្ធភាពសង ដូចករណីប្រទេសក្រិក។
ក្រុមអ្នកវិនិយោគ និងផ្សារភាគហ៊ុន បន្តមិនទុកចិត្តសមត្ថភាពអឺរ៉ុប
ផ្សារភាគហ៊ុននៅអឺរ៉ុប និងអាស៊ីបន្តរំជើបរំជួល។ ចំណែកឯប្រាក់អឺរ៉ូបក៏បន្តបាត់បង់តម្លៃ នៅចំពោះមុខប្រាក់ដុល្លារអាមេរិកំាង។ កាលពីម្សិលមិញ ១អឺរ៉ូ ដូរបានមិនដល់ ១ដុល្លារ ២២សេនផង។ តម្លៃភាគហ៊ុនបានដំាក្បាលចុះ ទំាងនៅផ្សារភាគហ៊ុនអឺរ៉ុប និងនៅអាស៊ី។
សួថា មានវិធានការរួមរបស់សហភាពអឺរ៉ុបហើយ មានផែនការត្បិតត្បៀត សន្សំសំចៃរបស់ប្រទេសមួយចំនួនហើយ ចុះហេតុអ្វីបានជានៅតែមិនអាចធានាដល់ក្រុមអ្នកវិនិយោគ និងធ្វើឲ្យផ្សារភាគហ៊ុនបន្តរំជើបរំជួលរហូតមកទល់ថ្ងៃនេះ ?
បញ្ហាចំបងមិនមែនស្ថិតនៅលើការប្រកាសចាត់វិធានការយ៉ាងនេះ ឬយ៉ាងនោះទេ។ សំខាន់នៅត្រង់ថា តើវិធានការទំាងនោះនឹងអាចផ្តល់ប្រសិទ្ធិភាពកំរិតណា។ គួរជម្រាបជូនថា ជាង ១០ឆ្នំាកន្លងមកហើយដែលប្រទេសអឺរ៉ុបសឹងតែទំាងអស់បានទុកបណ្តោយឲ្យឱនភាពថវិការបស់ខ្លួនបន្តកើនឡើង និងបន្តខ្ចីលុយគេចាយ រហូតដល់ជំពាក់គេវ័នក គ្មានលទ្ធភាពសង។ រហូតមកដល់ថ្ងៃនេះទៀត មានប្រទេសមួយចំនួនបង្ខំចិត្តបន្តខ្ចីលុយគេ ដើម្បីយកទៅបង់ថ្លៃការប្រាក់លើប្រាក់កម្ចីលើកមុនៗ។ វិលចុះ វិលឡើង បំណុលលើបំណុល នំាឲ្យចំនួនប្រាក់បំណុលកាន់តែកើនឡើងបន្ថែមទៀត។
ផែនការត្បិតត្បៀត សម្លាប់កំណើនសេដ្ឋកិច្ច ?
និយាយតាមទ្រឹស្តីសេដ្ឋកិច្ច ប្រទេសមួយមានសុខភាពសេដ្ឋកិច្ចល្អ លុះត្រាណាតែប្រទេសនោះមានកំណើនសេដ្ឋកិច្ច។ បើយោងតាមក្រុមអ្នកសេដ្ឋកិច្ច ផែនការត្បិតត្បៀតសន្សំសំចៃរឹតតែទាញឲ្យសេដ្ឋកិច្ចចុះថយ ព្រោះថា ផែនការត្បិតត្បៀត សន្សំសំចៃរបស់រដ្ឋ តាមរយៈការដំឡើងពន្ធដារ ការកាត់បន្ថយប្រាក់បៀវត្សរបស់បុគ្គលិក មន្រ្តីរាជការ នឹងនំាឲ្យប្រជាជនកាត់បន្ថយការចំណាយប្រចំាថ្ងៃ។ ការកាត់បន្ថយការចំណាយប្រចំាថ្ងៃរបស់ប្រជាជន នឹងនំាឲ្យចង្វាក់សេដ្ឋកិច្ចប្រចំាថ្ងៃគំាងមួយកន្លែង។ ចង្វាក់សេដ្ឋកិច្ចប្រចំាថ្ងៃគំាងមួយកន្លែង នឹងនំាឲ្យគ្មានកំណើនសេដ្ឋកិច្ច។ យោងតាមក្រុមអ្នកសេដ្ឋកិច្ច ដំណោះស្រាយដែលល្អបំផុត រដ្ឋាភិបាលនីមួយៗត្រូវតែចេះច្របាច់បញ្ចូលគ្នា រវាងផែនការត្បិតត្បៀត និងផែនការផ្តល់សន្ទុះសេដ្ឋកិច្ចឡើងវិញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ