FMIផ្តល់អនុសាសន៍ឲ្យប្រទេសអេស្ប៉ាញធ្វើកំណែទម្រង់ជាបន្ទាន់
មូលនិធិរូបិយវត្ថុអន្តរជាតិFMI បានព្រមាននៅថ្ងៃចន្ទទី២៤ឧសភាថា ប្រទេសអេស្ប៉ាញត្រូវតែធ្វើកំណែទម្រង់ឲ្យបានស៊ីជម្រៅ នៅក្នុងបរិបទដែលមានកំណើនសេដ្ឋកិច្ចផុយស្រួយ។ នៅខណៈដែលតំបន់អឺរ៉ូកំពុងជួបនឹងវិបត្តិ FMIផ្តល់អនុសាសន៍ឲ្យប្រទេសអេស្ប៉ាញធ្វើកំណែទម្រង់ជាបន្ទាន់ ដើម្បីធ្វើឲ្យប្រព័ន្ធការងារនិងប្រព័ន្ធធនាគារមានដំណើរការល្អ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ក្រោយពីមានបេសកកម្មសិក្សានៅប្រទេសអេស្ប៉ាញ មូលនិធិរូបិយវត្ថុអន្តរជាតិFMI បានឲ្យអាទិភាពទៅលើបញ្ហាសេដ្ឋកិច្ចនិងហិរញ្ញវត្ថុនៅប្រទេសអេស្ប៉ាញដែលរដ្ឋាភិបាលសង្គមនិយមរបស់លោកJosé Luis Rodriguez Zapatero បានទទួលស្វាគមន៍។
នៅពេលដែលការគំរាមធ្វើកូដកម្មទូទៅប្រឆាំងនឹងផែនការត្បិតត្បៀតរបស់រដ្ឋាភិបាលលេចរូបរាងកាន់តែច្បាស់ឡើងៗ មូលនិធិរូបិយវត្ថុអន្តរជាតិFMI បានចង្អុលចំៗប្រាប់អ្នកគ្រប់គ្រងប្រទេសអេស្ប៉ាញថា មានដំណើរការពុំល្អត្រឹមត្រូវនៅលើទីផ្សារការងារអេស្ប៉ាញ។ ហើយ មូលនិធិរូបិយវត្ថុអន្តរជាតិFMI បានជំរុញឲ្យអ្នកទទួលខុសត្រូវអេស្ប៉ាញកែទម្រង់ប្រព័ន្ធការងារ ជាពិសេសនៅខណៈដែលអត្រានៃអ្នកឥតការងារធ្វើបានកើនឡើងលើសពី២០%នៅត្រីមាសទី១នៃឆ្នាំ២០១០នេះ។
អាទិភាពមួយទៀតសម្រាប់មូលនិធិរូបិយវត្ថុអន្តរជាតិFMI គឺការក្តោបក្តាប់បញ្ហាថវិកាជាតិឲ្យបាន ដោយធ្វើឲ្យហិរញ្ញវត្ថុសាធារណៈឈរលើមូលដ្ឋានត្រឹមត្រូវ។ ចំពោះបញ្ហានេះ រដ្ឋាភិបាលអេស្ប៉ាញបានឆ្លើយតបថា “គេកំពុងចាត់វិធានការដើម្បីដោះស្រាយបញ្ហានេះ”។ ហើយរដ្ឋាភិបាលអេស្ប៉ាញបញ្ជាក់ឲ្យដឹងទៀតថា ផែនការត្បិតត្បៀតរបស់រដ្ឋាភិបាលអេស្ប៉ាញនេះគឺធ្វើឡើងដើម្បីកាត់បន្ថយឧនភាពសាធារណៈឲ្យធ្លាក់មកនៅត្រឹម៣%នៃផលិតផលក្នុងប្រទេសចាប់ពីនេះទៅទល់ឆ្នាំ២០១៣។
ក្រៅពីនេះ មូលនិធិរូបិយវត្ថុអន្តរជាតិFMI ចង់ឲ្យ រដ្ឋាភិបាលអេស្ប៉ាញធ្វើការកែទម្រង់ទៅលើប្រព័ន្ធធនាគារ ដើម្បីពង្រឹងប្រសិទ្ធិភាពនិងបញ្ចៀសកុំឲ្យមានការធនក្ស័យ។ កាលពីថ្ងៃសៅរ៍កន្លងទៅ ធនាគារកណ្តាលអេស្ប៉ាញបានដាក់បេឡាសំចៃCajasur ឲ្យឋិតនៅក្រោមការត្រួតពិនិត្យរបស់ខ្លួន ដោយហេតុថា បេឡាសំចៃCajasurជាបេឡាសំចៃតំបន់មួយកំពុងតែជួបនឹងវិបត្តិហិរញ្ញវត្ថុ។ នេះក៏ជាកត្តាមួយទៀតមកជួយជំរុញឲ្យប្រាក់អឺរ៉ូធ្លាក់ស្រុតចុះថ្លៃនៅចំពោះមុខប្រាក់ដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ