អាមេរិកនិងចិន ប្រឹងខិតទៅជិតគ្នា ក្នុងឱកាសខួបទំនាក់ទំនងការទូត គម្រប់៤០ឆ្នាំ
នៅថ្ងៃទី១ មករានេះ គឺជាខួបគម្រប់៤០ឆ្នាំ នៃទំនាក់ទំនងទូតរវាងអាមេរិកនិងចិន។ ចិនដែលបានបើកចំហទីផ្សារ និងធ្វើកំណែទម្រង់សេដ្ឋកិច្ច ក្នុងរជ្ជកាលរបស់ប្រធានាធិបតីចិន តែង ស៊ាវពីង ហើយប្រទេសមហាអំណាចទាំងពីរបានចាប់ដៃសហការគ្នា នៅឆ្នាំ១៩៧១។ ដោយសារនយោបាយសួនតួនិយមរបស់អាមេរិកនៅក្នុងអាណត្តិរបស់ប្រធានាធិបតី ដូណាល់ ត្រាំ គឺធ្វើឲ្យសង្គ្រាមពាណិជ្ជកម្មរវាងមហាយក្សទាំងពីរ បានលេចជារូងរាងឡើងកាន់តែខ្លាំង នៅឆ្នាំ២០១៨។ ក៏ប៉ុន្តែ នៅក្នុងឱកាសថ្ងៃខួបទំនាក់ទំនងទូត លើកទី៤០ នៅដើមឆ្នាំ២០១៩នេះ គឺជម្លោះពាណិជ្ជកម្ម ហាក់បានថមថយកម្តៅខ្លះទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
«ប្រវត្តិសាស្ត្របានបើកបង្ហាញយើងគ្រប់គ្នាថា ការសហការគ្នា គឺជាជម្រើសដ៏ល្អសម្រាប់ទាំងសងខាង។ ចំពោះរដ្ឋាបាលក្រុងប៉េកាំង ទំនងទំនងល្អ គឺជារឿងអាទិភាពរបស់យើង»។ ទាំងនេះគឺជាការបញ្ជាក់របស់ប្រធានាធិបតីចិន លោក ស៊ី ជីនពីង ដែលបាននៅក្នុងកាសែតរដ្ឋចិន នៅថ្ងៃអង្គារទី១មករា។
នៅក្នុងឱកាសខួបការទូត លើកទី៤០រវាងចិននិងអាមេរិកនេះ លោកប្រមុខរដ្ឋទាំងពីរបានជជែកផ្លាស់ប្តូរសម្តីគ្នាជាថ្មី ហើយលោកប្រធានាធិបតីចិន ស៊ី ជីនពីង បានលើកឡើងជាថ្មីដែរ ពីសារៈសំខាន់នៃការរឹតចំណងទាក់ទងគ្នារវាងប្រទេសទាំងពីរ ទៅលើផ្នែកសម្រុះសម្រួល សហប្រតិបត្តិការ និងផ្នែករក្សាស្ថេរភាព។ នេះបើតាមការស្រង់សម្តីរបស់កាសែតចិនថ្មី។ នៅក្នុងកាសែតដដែល លោកប្រធានាធិបតីអាមេរិក ដូណាល់ ត្រាំ ក៏បានអបអរទិវាខួបនេះ ហើយបានលើកសរសើរពី «មិត្តភាពដ៏រឹងមាំ» ជាមួយលោកប្រធានាធិបតីចិនផងដែរ។
ជាការកត់សម្គាល់ ទំនាក់ទំនងមហាយក្សសេដ្ឋកិច្ចទាំងពីរ ហាក់បានវិលទៅរកភាពធូរស្រាលបន្តិច នៅពេលនេះ បន្ទាប់ពីតាន់តឹងជាខ្លាំងក្នុងជម្លោះពាណិជ្ជកម្មកាលពីឆ្នាំមុន។ ថ្មីៗនេះ ប្រទេសចិនបានយល់ព្រមទទួលទិញអង្ករនិងសណ្តែករបស់អាមេរិក។ ចិនយល់ព្រមព្យួរការដំឡើងថ្លៃបង់ពន្ធនាំចូលរថយន្ត និងគ្រឿងបរិក្ខារៈសម្រាប់ផលិតឡាន ព្រមទាំងកែសម្រួលច្បាប់ ជុំវិញការលួចចម្លងកម្មសិទ្ធិបញ្ញាជាដើម។ ទាំងអស់នេះ គឺជាការសម្បទានយ៉ាងច្រើនពីក្រុងប៉េកាំង។ ប្រធានាធិបតីអាមេរិក លោក ដូណាល់ ត្រាំ បានថ្លែងកាលពីថ្ងៃសៅរ៍ សប្តាហ៍មុន ថាការចរចារវាងរូបលោកនិងប្រមុខរដ្ឋចិន គឺដំណើរការទៅបានល្អ ហើយបើការព្រមព្រៀងនឹងសម្រេចបានមែននោះ អាមេរិកទៅរកការរីកចម្រើនយ៉ាងធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ