ហេតុអ្វីបានជាលោក Obama មិនទទួលជួបលោក Nétanyahou?
ចុះផ្សាយនៅថ្ងៃ៖
ស្តាប់ - ០៣:៥០
កាលពីសប្តាហ៍មុន ការប៉ះទង្គិចផែ្នកការទូតមួយបានធ្វើរដ្ឋាភិបាលសហរដ្ឋអាមេរិករបស់លោកប្រធានាធិបតី អូបាម៉ា អាក់អន់ស្រពន់ចិត្តចំពោះអ៊ីស្រាអែល។ ក្នុងកំឡុងពេលទស្សនកិច្ចនៅសហរដ្ឋអាមេរិក នាដើមខែមិនាខាងមុខនេះ លោកប្រធានាធិបតី បារ៉ាក់ អូបាម៉ា នឹងមិនទទួលជួបលោកនាយករដ្ឋមន្រ្តីអ៊ីស្រាអែល Benyamin Nétanyahou ឡើយ។ ឧប្បត្តិហេតុនេះជាទំងន់បន្ថែមមួយទៀត ខណៈពេលដែលទំនាក់ទំនងរវាងសហរដ្ឋអាមេរិក និងអ៊ីស្រាអែលកំពុងតែធ្លាក់ចុះស្រាប់ជុំវិញបញ្ហាដែនដីប៉ាឡេស្ទីន។ តើមានមូលហេតុអ្វីខ្លះនៅពីក្រោយជម្លោះការទូតរវាងប្រទេសទាំងពីរ?
ការខកចិត្តរបស់សេតវិមាន
មន្ត្រីសេតវិមានបានសំដែងការខឹងសម្បារយ៉ាងខ្លាំង កាលពីសប្តាហ៍មុននេះ ក្រោយពីបានទទួលដំណឹងដ៏គួរអោយភ្ញាក់ផ្អើលមួយថា លោកនាយករដ្ឋមន្រ្តីអ៊ីស្រាអែល Benjamin Nétanyahou នឹងធ្វើដំណើរមកកាន់សហរដ្ឋអាមេរិក។ ដំណើរទស្សនកិច្ចនេះគឺ តបតាមការអញ្ជើញរបស់លោក John Boehner ប្រធានសភាអាមេរិក ដែលមកពីគណបក្សសាធារណរដ្ឋ។ លោកនាយករដ្ឋមន្រ្តីអ៊ីស្រាអែលនឹងឡើងថ្លែងសុន្ទរកថាទៅកាន់សមាជិកសភា និងព្រឹទ្ធសភាអាមេរិក នាថ្ងៃទី៣ ខែមិនា ខាងមុខនេះ។ នេះជាលើកទីបីហើយ ចាប់តាំងពីឆ្នាំ១៩៩៦ និងឆ្នាំ២០១១ ដែលលោក Nétanyahou មានកិត្តិយសឡើងថ្លែងសុន្ទរកថាក្នុងឱកាសដ៏កម្របែបនេះទៅកាន់សភាអាមេរិក។
លោក Josh Earnest អ្នកនាំពាក្យសេតវិមានបានប្រកាសអោយដឹងថា រដ្ឋាភិបាលអាមេរិកបានដឹងដំណឹងនេះតាមរយៈសេចក្តីប្រកាសមួយរបស់ប្រធានសភាអាមេរិក។ ម៉្យាងទៀត រដ្ឋាភិបាលអ៊ីស្រាអែលពុំបានផ្តល់ព័ត៌មានដល់រដ្ឋបាលលោកអូបាម៉ាជាមុនឡើយ។ អ្នកនាំពាក្យរូបនេះក៏បានបន្តថា បើតាមពិធីការជាទំលាប់ គេតម្រូវអោយប្រមុខរដ្ឋប្រទេសមួយទាក់ទងជាមួយប្រមុខរដ្ឋនៃប្រទេសដែលខ្លួនទៅទស្សនកិច្ច។នេះជារបៀបរបបដែលគេតែងរៀបចំរាល់ពេលលោកប្រធានាធិបតី បារ៉ាក់ អូបាម៉ា ធ្វើដំណើរទស្សនកិច្ចនៅបរទេស។
ផ្ទុយទៅវិញ កាយវិការរបស់អ៊ីស្រាអែលហាក់បង្ហាញថា ខ្លួនបានដើរឃ្លាតឆ្ងាយពីពិធីការនេះ។
ជាការឆ្លើយតប សេតវិមានបានប្រកាសកាលពីថ្មីៗនេះថា លោកប្រធានាធិបតី អូបាម៉ា នឹងមិនទទួលជួបលោកនាយករដ្ឋមន្រ្តី Benjamin Nétanyahou ឡើយ។ សូម្បីតែលោក John Kerry រដ្ឋមន្រ្តីការបរទេសអាមេរិកក៏នឹងមិនទទួលជួបប្រមុខដឹកនាំអ៊ីស្រាអែលដែរ។ ជាការគួរសម រដ្ឋាភិបាលអាមេរិកបានយកលេសថា វាជាការមិនសមរម្យឡើយ ដែលប្រមុខដឹកនាំសហរដ្ឋអាមេរិកទទួលជួបថ្នាក់ដឹកនាំអ៊ីស្រាអែល ព្រោះគណបក្សរបស់លោក Nétanyahou កំពុងដឹកនាំយុទ្ធនាការបោះឆ្នោតនៅអ៊ីស្រាអែល ដែលនឹងប្រព្រឹត្តទៅនាថ្ងៃទី១៧ ខែមិនា ខាងមុខនេះ។ ដូចនេះ ប្រធានាធិបតីអាមេរិកមិនទទួលជួបប្រមុខរដ្ឋ ឬបេក្ខជនណាក្នុងកំឡុងពេលបោះឆ្នោតរបស់ប្រទេសនោះឡើយ ដើម្បីចៀសវាងជះឥទ្ធិពលដល់ដំណើរការបោះឆ្នោតបែបប្រជាធិបតេយ្យ។
សំណុំរឿងប្រទេសអ៊ីរ៉ង់ និងសិទ្ធិវេតូរបស់លោក អូបាម៉ា
ក្រៅពីហេតុផលកំហុសបច្ចេកទេសផែ្នកពិធីការ មានមូលហេតុជាច្រើនដែលអាចពន្យល់បានពីទំនាក់ទំនងល្អក់កករក្នុងពេលបច្ចុប្បន្ននេះ រវាងសហរដ្ឋអាមេរិក និងអ៊ីស្រាអ៊ែល។
ចំណុចទីមួយ គឺទាក់ទងនឹងសំណុំរឿងប្រទេសអ៊ីរ៉ង់។ ក្រៅពីប្រធានបទស្តីពីចលនាអ៊ីស្លាមជ្រុលនិយម លោកនាយករដ្ឋមន្រ្តីអ៊ីស្រាអែលនឹងឡើងថ្លែងសុន្ទរកថាទាក់ទងនឹងកម្មវិធីនុយក្លេអ៊ែរ។ វាជាចំនុចរសើប ដែលប្រធានបទនេះនឹងត្រូវលើកយកមកពិភាក្សា ដោយសារតែបច្ចុប្បន្ននេះ រដ្ឋបាលលោកអូបាម៉ាកំពុងតែប្រឈមមុខដាក់គ្នាជាមួយសមាជិកសភាស្តីពីបញ្ហាប្រទេសអ៊ីរ៉ង់។
តាមការពិត ភាគច្រើននៃអ្នកតំណាងរាស្រ្តអាមេរិកចង់អនុម័តសេចក្តីព្រាងច្បាប់មួយជាលក្ខណៈព្រមានដើម្បីដាក់ទណ្ឌកម្មថ្មីទៀតប្រឆាំងប្រទេសអ៊ីរ៉ង់ ប្រសិនបើប្រទេសនេះមិនព្រមចុះហត្ថលេខា មុនថ្ងៃទី១កក្កដា លើសំណុំរឿងកម្មវិធីនុយក្លេអ៊ែររបស់ខ្លួន។អ៊ីរ៉ង់ត្រូវចុះហត្ថលេខាលើកិច្ចព្រមព្រៀងជាមួយប្រទេសមហាអំណាចដើម្បីធានាថា ខ្លួននឹងមិនផលិតអាវុធនុយក្លេអ៊ែរក្រោមលេសថាជាកម្មវិធីនុយក្លេអ៊ែរស៊ីវីលឡើយ។
ចំណុចទីពីរគឺ ការប្រឈមមុខដាក់គ្នាជុំវិញបញ្ហាប្រទេសអ៊ីរ៉ង់រវាងលោកប្រធានាធិបតី អូបាម៉ា និងក្រុមគណបក្សសាធារណរដ្ឋ ដែលកំពុងគ្រប់គ្រងសភាតំណាងរាស្រ្តនិងព្រឹទ្ធសភាអាមេរិក។ កន្លងមក លោកអូបាម៉ាធ្លាប់បានព្រមានថា គាត់នឹងប្រើសិទ្ធិវេតូជំទាស់ក្នុងឋានៈជាប្រធានាធិបតីប្រសិនបើសភាអនុម័តច្បាប់ថ្មីគំរាមដាក់ទណ្ឌកម្មអ៊ីរ៉ង់។ រដ្ឋបាលលោកអូបាម៉ាយល់ថា ការព្រមានដាក់ទណ្ឌកម្មថ្មីបន្ថែមប្រឆាំងអ៊ីរ៉ង់ជាការរំខានដល់ដំណើរការចរចារដែលកំពុងតែមានស្រាប់។ លើសពីនេះ មុនផុតអាណ្ណត្តិប្រធានាធិបតី លោកអូបាម៉ាប្រាថ្នាចង់បិទបញ្ចប់សំណុំរឿងអ៊ីរ៉ង់មួយនេះ។
ម៉្យាងទៀត វត្តមានលោកនាយករដ្ឋមន្រ្តីអ៊ីស្រាអ៊ែល Benyamin Nétanyahou ត្រូវបានគេយល់ថា មិនមែនជារឿងចៃដន្យឡើយ។ ខាងគណបក្សសាធារណរដ្ឋអញ្ចើញប្រមុខដឹកនាំអ៊ីស្រាអែលអោយមកថ្លែងសុន្ទរកថានៅចំពោះមុខសមាជិកសភា និងព្រឹទ្ធសភាអាមេរិក ព្រោះពួកសាធារណរដ្ឋ និងអ៊ីស្រាអ៊ែលសុទ្ធតែជាក្រុមតឹងរឹងដាច់ខាតប្រឆាំងអ៊ីរ៉ង់។ កាលពីខែតុលាឆ្នាំ២០១៤កន្លងទៅនេះ នៅសេតវិមាន នាយករដ្ឋមន្រ្តីអ៊ីស្រាអ៊ែលធ្លាប់បានព្រមានជាសាធារណៈនៅចំពោះមុខអ្នកសារព័ត៌មានថា អ៊ីស្រាអែលនឹងប្រឆាំងដាច់ខាតចំពោះកិច្ចព្រមព្រៀងណាមួយ ដែលអំណោយផលអាចអោយអ៊ីរ៉ង់ក្លាយជាមហាអំណាចនុយក្លេអ៊ែរក្នុងតំបន់។ ប្រទេសអ៊ីស្រាអែលតែងចាត់ទុកថាខ្លួនជាផ្ទាំងស៊ីបមុនគេ ប្រសិនបើគូសត្រូវរបស់ខ្លួនគឺ អ៊ីរ៉ង់មានអាវុធប្រល័យលោកក្នុងដៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ