ភ្នាក់ងារអ.ស.ប ទទួលបន្ទុកជនភៀសខ្លួនចោទអ៊ីស្រាអែល ចំៗថា បំពានច្បាប់អន្តរជាតិ
នៅថ្ងៃពុធនេះ សាលារៀនអង្គការសហប្រជាជាតិនៅតំបន់ហ្កាហ្សា បានរងការបាញ់ប្រហារជាថ្មីពីសំណាក់អ៊ីស្រាអែល សម្លាប់មនុស្សយ៉ាងហោច១៦នាក់ ក្នុងនោះ មានកុមារច្រើននាក់ផងដែរ។ ភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន ហៅកាត់ថា អង្គការUNWRA បានចោទកងទ័ពអ៊ីស្រាអែល ចំៗថា រំលោភបំពានច្បាប់អន្តរជាតិធ្ងន់ធ្ងរ។ អង្គការUNWRA បានទាមទារសហគមន៍អន្តរជាតិអោយប្រតិកម្មអោយឆាប់រហ័សដើម្បីបិទបញ្ចប់ហិង្សាសម្លាប់មនុស្សនៅហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ក្រោយមានការបាញ់ប្រហារលើសាលារៀនអង្គការសហប្រជាជាតិ នៅហ្កាហ្សា ជាថ្មីទៀត នៅយប់ថ្ងៃអង្គារចូលព្រឹកថ្ងៃពុធនេះ អង្គការUNWRA ដែលជាភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន បានបរិហារយោធាអ៊ីស្រាអែលដោយចំមុខតែម្តងថា រំលោភបំពានធ្ងន់ធ្ងរលើច្បាប់អន្តរជាតិ។ លោក ព្យែរ ក្រាហិនប៊ុល ប្រធានអង្គការUNWRA ប្រាប់ថា អង្គការបានយកអំបែងគ្រាប់ ទៅពិនិត្យ ហើយសន្និដ្ឋានថា កំទេចអាវុធទាំងនេះ គឺជាកំទេចអាវុធរបស់កងទ័ពអ៊ីស្រាអែល។
សាលារៀនអង្គការសហប្រជាជាតិដែលរងការបាញ់ប្រហាររបស់អ៊ីស្រាអែលថ្ងៃពុធនេះ ស្ថិតនៅជំរំ Jabaliya មានមនុស្ស៣៣០០នាក់ រត់មកភៀសខ្លួន។ អង្គការប្រាប់ថា ក្មេងៗកំពុងតែគេងលក់នៅផ្ទាល់ដី ក្នុងថ្នាក់រៀនមួយកន្លែង ជាមួយឳពុកម្តាយពួកគេ តែបែរជាត្រូវបានស្លាប់ក្នុងការបាញ់ប្រហារ។
យោងតាមអង្គការទទួលបន្ទុកជនភៀសខ្លួនប៉ាឡេស្ទីន អ៊ីស្រាអែលបានទទួលដំណឹង១៧ដងមកហើយថា សាលារៀនអង្គការសហប្រជាជាតិបានទទួលជនភៀសខ្លួនរាប់ពាន់នាក់ ដែលរត់គេចពីប្រតិបត្តិការយោធាអ៊ីស្រាអែល។ សូម្បីតែយប់ថ្ងៃអង្គារ មុនពេលមានការបាញ់ប្រហារសាលារៀន អ៊ីស្រាអែលក៏ទទួលដំណឹងនេះដែរ។ ប្រធានអង្គការUNWRA ព្យែរ ក្រាហិនប៊ុល បានបរិហារថា បញ្ហានេះ គឺជាភាពអាម៉ាសអន្តរជាតិ។ គួរបញ្ជាក់ថា ប្រជាជនប៉ាឡេស្ទីន១សែន៨ម៉ឺននាក់ ត្រូវបានបណ្តេញចេញពីផ្ទះសម្បែង រត់គេចពីប្រតិបត្តិការយោធាអ៊ីស្រាអែល មកជ្រកកោនក្នុងសាលារៀនអង្គការសហប្រជាជាតិ ចំនួន៨៣កន្លែង។
នេះជាលើកទី៦ហើយ ដែលសាលារៀនអង្គការសហប្រជាជាតិរងការបាញ់ប្រហារ។ កាលពីថ្ងៃ២៤កក្កដា ការបាញ់ប្រហារទៅលើសាលាអង្គការសហប្រជាជាតិមួយកន្លែង បានសម្លាប់ជនជាតិប៉ាឡេស្ទីនជាង១៥នាក់។ ប៉ុន្តែអ៊ីស្រាអែលបានបដិសេធថា គ្រាប់ដែលបាញ់ទៅលើសាលារៀននោះ មិនមែនជារបស់កងទ័ពខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ