ប្រធានាធិបតីវៀតណាមបំពេញទស្សនកិច្ចនៅសហរដ្ឋអាមេរិក
ចុះផ្សាយនៅថ្ងៃ៖
នៅថ្ងៃពុធនេះ លោកជឿង តាន់ សាង (Truong Tan Sang) ប្រធានាធិបតីវៀតណាម ចាប់ផ្តើមបំពេញទស្សនកិច្ច នៅសហរដ្ឋអាមេរិក។ ទស្សនកិច្ច ដែលធ្វើឡើងក្នុងគោលដៅបង្កើនទំនាក់ទំនងខាងផ្នែកពាណិជ្ជកម្ម ក៏ដូចជា ខាងផ្នែកសន្តិសុខ។ ក៏ប៉ុន្តែ បញ្ហាសិទ្ធិមនុស្សនៅវៀតណាម ក៏ប្រហែលជានឹងត្រូវក្លាយជាបញ្ហាចម្បងមួយដែរ ក្នុងជំនួបរវាងប្រធានាធិបតីវៀតណាម និងថ្នាក់ដឹកនាំអាមេរិក។
ចាប់តាំងពីអាមេរិក និងវៀតណាម ភ្ជាប់ទំនាក់ទំនងការទូតជាមួយគ្នាឡើងវិញ នៅឆ្នាំ១៩៩៥មក ទើបតែមានប្រធានាធិបតីវៀតណាមពីររូបប៉ុណ្ណោះ ដែលទៅបំពេញទស្សនកិច្ចផ្លូវរដ្ឋនៅសហរដ្ឋអាមេរិក និងបានចូលទៅជួបប្រធានាធិបតីអាមេរិក រហូតដល់សេតវិមាន។ លើកទី១ កាលពីឆ្នាំ២០០៧ ដែលកាលណោះ ប្រធានាធិបតីវៀតណាម ង្វៀន ម៉ិញ ជៀត (Nguyen Minh Triet) ទៅជួបលោកប៊ូស នៅសេតវិមាន។ ដំណើរទស្សនកិច្ចរបស់លោកជឿង តាន់ សាង នៅពេលនេះ គឺជាលើកទីពីរ។
នៅថ្ងៃពុធនេះ ដែលជាថ្ងៃចាប់ផ្តើមដំណើរទស្សនកិច្ច លោកជឿង តាន់ សាង ត្រូវជួបជាមួយលោកចន ឃែរី រដ្ឋមន្រ្តីការបរទេសអាមេរិក និងជួបជាមួយអ្នកជំនួញអាមេរិក។ នៅថ្ងៃព្រហស្បតិ៍ស្អែក លោកប្រធានាធិបតីវៀតណាម នឹងជួបជាមួយលោកអូបាម៉ា នៅ សេតវិមាន។
នៅក្នុងរយៈកាលប៉ុន្មានឆ្នាំចុងក្រោយនេះ យើងសង្កេតឃើញថា ទំនាក់ទំនងទ្វេភាគីវៀតណាម-អាមេរិក មានការរីកចម្រើនជឿនលឿនទៅមុខគួរឲ្យកត់សម្គាល់។ រឹតតែគួរឲ្យកត់សម្គាល់ ដោយយើងដឹងថា ប្រទេសទាំងពីរធ្លាប់ជាគូសត្រូវ ដែលច្បាំងគ្នារាប់ឆ្នាំ ហើយមកទល់នឹងពេលនេះ ប្រទេសទាំងពីរនៅតែស្ថិតក្រោមរបបដឹកនាំពីរផ្ទុយគ្នាស្រឡះ។
មានកត្តាសំខាន់ៗ ចំនួនពីរ ដែលជំរុញឲ្យអាមេរិក និងវៀតណាម អាចពង្រឹងទំនាក់ទំនងជាមួយគ្នា។ កត្តាសំខាន់ទីមួយ គឺតម្រូវការខាងផ្នែកសេដ្ឋកិច្ច ហើយកត្តាសំខាន់មួយទៀត គឺចិន។
វៀតណាមមានប្រជាជនសរុប ជិត ៩០លាននាក់ ហើយស្ថិតក្នុងចំណោមប្រទេសដែលមានកំណើនសេដ្ឋកិច្ចខ្ពស់ (អត្រាកំណើនសេដ្ឋកិច្ចប្រចាំឆ្នាំ គិតជាមធ្យម ពី ៥% ទៅ ៧%)។ ដូច្នេះ វៀតណាមគឺជាប្រទេសដែលមានសក្តានុពលសេដ្ឋកិច្ចខ្ពស់ អាចជាដៃគូពាណិជ្ជកម្មសំខាន់មួយរបស់អាមេរិក។ វៀតណាមវិញ ដែលកំពុងតែស្វះស្វែងចង់បានកំណើនសេដ្ឋកិច្ចកាន់តែខ្ពស់ជាងពេលបច្ចុប្បន្ន ក៏ត្រូវការអាមេរិកដែរ ហើយវាជារឿងធម្មតា ព្រោះអាមេរិក គឺជាមហាសេដ្ឋកិច្ចពិភពលោក។
បច្ចុប្បន្ននេះ យើងឃើញថា ពាណិជ្ជកម្មក្រៅប្រទេសរបស់វៀតណាមពឹងផ្អែកខ្លាំងលើចិន។ ការនាំចេញនាំចូលរបស់វៀតណាម គឺធ្វើឡើងច្រើនបំផុតជាមួយចិន។ វៀតណាម កំពុងតែចរចា ដើម្បីចូលរួមបង្កើតតំបន់ពាណិជ្ជកម្មសេរីជាមួយអាមេរិក ក្នុងក្របខ័ណ្ឌអាស៊ីប៉ាស៊ីហ្វិក (Trans-Pacific Partnership)។
បើមើលទៅលើស្ថានភាពជម្លោះ រវាងវៀតណាម និងចិន ក្នុងសមុទ្រចិនខាងត្បូង ការស្វែងរកដៃគូពាណិជ្ជកម្មផ្សេង ក្រៅពីចិន គឺជាផលប្រយោជន៍ជាយុទ្ធសាស្រ្តសំខាន់របស់វៀតណាម។ ដោយសារតែមានជម្លោះជាមួយចិន វៀតណាមមិនមែនស្វះស្វែងបង្កើនទំនាក់ទំនងជាមួយអាមេរិក ត្រឹមតែក្នុងវិស័យពាណិជ្ជកម្មនេះមួយទេ។ រឹតតែសំខាន់ទៅទៀត គឺទំនាក់ទំនងខាងផ្នែកយោធា។
អាមេរិកវិញក៏ចង់បង្កើនទំនាក់ទំនងយោធាជាមួយវៀតណាមដែរ ដើម្បីប្រជែងដណ្តើមឥទ្ធិពលជាមួយចិន គឺនៅក្នុងក្របខ័ណ្ឌនយោបាយការបរទេសថ្មីរបស់លោកអូបាម៉ា ដែលចង់ងាកមកផ្តោតអាទិភាពផ្នែកការទូត និងបង្កើនវត្តមានកងទ័ពអាមេរិក នៅក្នុងតំបន់អាស៊ី។
បើតាមមន្រ្តីជាន់ខ្ពស់នៅក្រសួងការបរទេសអាមេរិក គឺតំបន់អាស៊ានទាំងមូល ដែលជាតំបន់អាទិភាពសំខាន់ នៅក្នុងចក្ខុវិស័យនៃនយោបាយការបរទេសអាមេរិក។
បញ្ហាសន្តិសុខ និងពាណិជ្ជកម្ម គឺជាប្រធានបទសំខាន់ នៅក្នុងដំណើរទស្សនកិច្ចរបស់ប្រធានាធិបតីវៀតណាម នៅសហរដ្ឋអាមេរិកពេលនេះ ក៏ប៉ុន្តែ បញ្ហាសិទ្ធិមនុស្ស ក៏ជារឿងសំខាន់មួយ ដែលមេដឹកនាំទាំងពីរ ពិបាកនឹងចៀសរួច ដោយសារតែមានសម្ពាធខ្លាំង ពីសំណាក់សមាជិកសភាអាមេរិកផង និងពីសកម្មជនសិទ្ធិមនុស្សផង។
កាលពីខែមុននេះ មន្រ្តីក្រសួងការបរទេសអាមេរិកខ្លួនឯងផ្ទាល់ ដែលបានធ្វើរបាយការណ៍ប្រាប់សមាជិកសភាអាមេរិក អំពីការរំលោភសិទ្ធិមនុស្សនៅវៀតណាម ដូចជា ការរឹតបន្តឹងសិទ្ធិសេរីភាពក្នុងការបញ្ចេញមតិតាមអ៊ីនធ័រនែត និងមានការឃុំខ្លួនអ្នកទោសនយោបាយ រហូតដល់ទៅជាង ១២០នាក់។
សមាជិកក្រុមគ្រួសារសកម្មជនសិទ្ធិមនុស្ស និងអ្នកសរសេរអត្ថបទតាមអ៊ីនធ័រនែត ដែលកំពុងជាប់ឃុំនៅវៀតណាម បាននាំគ្នាសរសេរលិខិតរួមគ្នាមួយ ទៅលោកអូបាម៉ា ទាមទារឲ្យលោកអូបាម៉ាដាក់សម្ពាធលើប្រធានាធិបតីវៀតណាម ឲ្យដោះលែងអ្នកទោសនយោបាយទាំងអស់ នៅវៀតណាម។ ក្នុងលិខិតនេះ គេនាំគ្នាលើកឡើងពីគំរូរបស់ភូមា ដែលបានដោះលែងអ្នកទោសនយោបាយ និងធ្វើកំណែទម្រង់ធំៗជាច្រើន ទើបអាមេរិកដកទណ្ឌកម្ម និងអញ្ជើញលោកថេន សេន ឲ្យមកបំពេញទស្សនកិច្ចនៅសេតវិមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ