សម្តេចប៉ាបហ្រ្វង់ស័រអំពាវនាវឲ្យកាត់បន្ថយគម្លាតរវាងអ្នកមាន និងអ្នកក្រ
ថ្ងៃនេះ ជាថ្ងៃទី៣ នៃដំណើរទស្សនកិច្ចរយៈពេល ៥ថ្ងៃរបស់ប្រមុខសង្ឃសាសនាកាតូលិក សម្តេចប៉ាបហ្រ្វង់ស័រនៅក្នុងទឹកដីកូរ៉េខាងត្បូង។ នៅថ្ងៃទី៣ ថ្ងៃនេះ សម្តេចប៉ាបបានចូលរួមនៅក្នុងពិធីសូត្រធម៌នៅទីលានដ៏ធំមួយក្នុងទីក្រុងសេអ៊ូល ដោយមានមនុស្សចូលរួមជាង ៨០ម៉ឺននាក់។ ពិធីសូត្រថ្ងៃនេះ គឺក្នុងគោលដៅគោរពវិញ្ញាណក្ខន្ធ និងលើកសរសើរពីភាពក្លាហានរបស់ប្រជាជនកូរ៉េចំនួន១២៤នាក់ដែលបានស្លាប់ដើម្បីគ្រិស្តសាសនា។ ទន្ទឹមគ្នានេះ សម្តេចប៉ាបក៏បានអំពាវនាវឲ្យកាត់បន្ថយគម្លាតរវាងអ្នកមាន និងអ្នកក្រនៅក្នុងសង្គមផងដែរ។
ចុះផ្សាយនៅថ្ងៃ៖
ស្តាប់ - ០១:៥៦
គឺនៅលើទីលានដ៏ធំមួយចំកណ្តាលបេះដូងទីក្រុងសេអ៊ូលដែលសម្តេចប៉ាបហ្រ្វង់ស័របានយាងចូលរួមនៅក្នុងពិធីសូត្រធម៌ដើម្បីគោរពវិញ្ញាណក្ខន្ធ និងលើកសរសើរពីភាពក្លាហានរបស់ប្រជាជនកូរ៉េចំនួន១២៤នាក់ដែលត្រូវបានគេធ្វើបាបរហូតស្លាប់ដោយសារតែពួកនេះមិនព្រមលះបង់ជំនឿគ្រិស្តសាសនារបស់ខ្លួនកាលពីក្នុងសតវត្សទី១៨ និងទី១៩។ នាឱកាសនោះ សម្តេចប៉ាបបានអំពាវនាវឲ្យមនុស្សជំនាន់ថ្មីយកគំរូតាមទុក្ករបុគ្គល ឬបុគ្គលដែលរងទុក្ខដល់ស្លាបដើម្បីរក្សាជំនឿខ្លួនទំាង ១២៤រូបនោះ។ ទន្ទឹមគ្នានេះ សម្តេចប៉ាបក៏បានឆ្លៀតរម្លឹកអំពីប្រវត្តិកកើតដំបូងនៃវិហារគ្រិស្តសាសនានៅក្នុងទឹកដីកូរ៉េ។
យោងតាមសម្តេចប៉ាប អ្នកកាន់គ្រិស្តសាសនាមុនគេនៅកូរ៉េបានស្វែងយល់ និងរកឃើញដោយខ្លួនឯងនូវសាសនាមួយនេះ តាមរយៈគម្ពីរគ្រិស្តសាសនាឆ្លងមកពីប្រទេសចិន។ នៅពេលនោះ ពួកគេក៏បានផ្តើមបង្កើតសហគមន៍កាតូលិកដោយខ្លួនឯង។ បច្ចុប្បន្ននៅកូរ៉េខាងត្បូង មានអ្នកកាន់សាសនាកាតូលិកប្រមាណជា ៥លាននាក់ ពោលស្មើនឹង ១០% នៃប្រជាជនសរុប។ បើធៀបនឹងសាសនាផ្សេង គឺនៅមានចំនួនតិចតួចនៅឡើយ តែមានការកើនឡើងប្រមាណជា ១០ម៉ឺននាក់ជារៀងរាល់ឆ្នំា។
នៅក្នុងឱកាសនោះដែរ សម្តេចប៉ាបហ្រ្វង់ស័រក៏បានបរិហារពីគម្លាតរវាងអ្នកមាន និងអ្នកក្រនៅក្នុងសង្គមជឿនលឿនបច្ចុប្បន្ន ដោយបានអំពាវនាវឲ្យអ្នកមានស្តាប់ការស្រេកឃ្លានរបស់អ្នកក្រផង។ សម្តេចប៉ាបបានទទួលស្គាល់ថា ជាមួយនឹងកំណើនសេដ្ឋកិច្ចដ៏ខ្ពស់ កូរ៉េខាងត្បូងជាប្រទេសអ្នកមានមួយក្នុងចំណោមប្រទេសអ្នកមានផ្សេងទៀត តែក៏ជាប្រទេសមួយដែលប្រជាជនមានជីវភាពខុសគ្នាឆ្ងាយណាស់ ពោលគឺមានមនុស្សចាស់ជិតពាក់កណ្តាលកំពុងរស់ក្រោមខ្សែបន្ទាត់នៃភាពក្រីក្រ។ ដោយឡែក សម្តេចប៉ាបក៏ឆ្លៀតចូលរួមបន់ស្រន់ជាមួយក្រុមគ្រួសារកូរ៉េដែលបានបាត់បង់សាច់ញាតិរបស់ខ្លួននៅក្នុងគ្រោះថ្នាក់លិចសាឡាងកាលពីថ្ងៃទី១៦ មេសា។ គ្រោះថ្នាក់ដែលកាលណោះបានផ្តាច់ជីវិតមនុស្សជាង ៣០០នាក់ ភាគច្រើនជាសិស្សសាលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ