ទស្សនកិច្ចមួយជុំទ្វីបអឺរ៉ុបរបស់លោកប្រធានាធិបតីចិន ចំពេលអឺរ៉ុបកំពុងប្រឈមនឹងវិបត្តិគ្រីមេ
ចុះផ្សាយនៅថ្ងៃ៖
ស្តាប់ - ០៦:៥២
នៅថ្ងៃសៅរិ៍ ទី២២ មីនានេះ លោកប្រធានាធីបតីចិនស៊ី ជីនពីងផ្តើមដំណើរទស្សនកិច្ចមួយជុំទ្វីបអឺរ៉ុប។ បន្ទាប់មក លោកប្រមុខរដ្ឋចិននឹងបន្តដំណើរទៅកាន់ទីក្រុងឡាអេ ប្រទេសហូឡង់ដើម្បីចូលរួមនៅក្នុងជំនួបកំពូលលើកទី៣ស្តីពីសន្តិសុខនុយក្លេអ៊ែរដែលគ្រោងនឹងរៀបចំពីថ្ងៃទី២៤ និង២៥ មីនាសប្តាហ៍ក្រោយ។ អ្វីជាការកត់សម្គាល់ ដំណើរទៅកាន់ទ្វីបអឺរ៉ុបរបស់លោកស៊ី ជីនពីងពេលនេះបានធ្វើឡើង ចំពេលដែលអឺរ៉ុបកំពុងប្រឈមមុខយ៉ាងខ្លំាងនឹងប្រទេសរស្ស៊ីស្តីពីវិបត្តិនៅគ្រីមេ។ គឺជាវិបត្តិការទូតដ៏ធ្ងន់ធ្ងរមួយដែលអឺរ៉ុបមិនធ្លាប់ជួបប្រទះទេ តំាងពីក្រោយសង្រ្គាមត្រជាក់មក។
មានប្រទេសអឺរ៉ុបចំនួន ៤ ដែលលោកប្រធានាធិបតីចិនស៊ី ជីនពីងត្រូវទៅបំពេញទស្សនកិច្ច គឺប្រទេសហូឡង់ បារំាង អាល្លឺម៉ង់ និងប្រទេសបែលហ្ស៊ិក។ បន្ទាប់មក លោកស៊ី ជីនពីងក៏នឹងអញ្ជើញទៅកាន់ទីស្នាក់ការកណ្តាលរបស់អង្គការ Unesco ព្រមទំាង ទីស្នាក់ការកណ្តាលរបស់សហភាពអឺរ៉ុបនៅក្នុងទីក្រុងព្រុចសែល ប្រទេសបែលហ្ស៊ិក មុននឹងទៅចូលរួមជំនួបកំពូលលើកទី៣ ស្តីពីសន្តិសុខនុយក្លេអ៊ែរក្នុងប្រទេសហូឡង់នៅសប្តាហ៍ក្រោយ។ ហូឡង់ប្រទេសដែលលោកប្រធានាធិបតីចិនបានផ្តើមទស្សនកិច្ចមុនគេនៅថ្ងៃសៅរិ៍ ទី២២ មីនានេះ។
តំាងពីលោកស៊ី ជីនពីងចូលកាន់តំណែងប្រធានាធិបតីចិនបានជាង ១ឆ្នំាកន្លងមក នេះជាលើកទីមួយបង្អស់ដែលលោកបានមកបំពេញទស្សនកិច្ចក្នុងទ្វីបអឺរ៉ុប សម្រាប់ប្រទេសហូឡង់ ទស្សនកិច្ចរបស់លោកស៊ី ជីនពីងជាទស្សនកិច្ចលើកទី១ របស់ប្រមុខរដ្ឋចិន តំាងពីប្រទេសទំាងពីរបានភ្ជាប់ទំនាក់ទំនងផ្លូវទូតជាមួយគ្នា។ ករណីប្រទេសបែលហ្ស៊ិក គឺជាទស្សនកិច្ចលើកដំបូងរបស់ប្រធានាធិបតីចិន តំាងពី ២៧ឆ្នំាកន្លងទៅ។ រីឯប្រទេសអាល្លឺម៉ង់ នេះជាលើកទីមួយ តំាងពី ៨ឆ្នំាដែលអាល្លឺម៉ង់ទទួលដំណើរទស្សនកិច្ចរបស់ប្រមុខរដ្ឋចិនម្នាក់។ ចំពោះប្រទេសបារំាងវិញ ករណីពិសេសនៃដំណើរទស្សនកិច្ចរបស់លោកស៊ី ជីនពីងត្រូវបានធ្វើឡើងនៅក្នុងក្របខណ្ឌនៃការប្រារព្ធខួបគម្រប់ ៥០ឆ្នំានៃទំនាក់ទំនងផ្លូវទូតរវាងក្រុងប៉ារីស និងក្រុងប៉េកំាង។
សេដ្ឋកិច្ច និងពាណិជ្ជកម្ម ជាសំណុំរឿងសំខាន់នៃទស្សនកិច្ចរបស់លោកស៊ី ជីនពីង
គោលដៅសំខាន់នៃទស្សនកិច្ចរបស់លោកស៊ី ជីនពីង គឺដើម្បីពង្រឹងបន្ថែមនូវកិច្ចសហប្រតិបត្តិការលើគ្រប់វិស័យរវាងសហភាពអឺរ៉ុប ជាមួយចិន និងរវាងចិន ជាមួយប្រទេសអឺរ៉ុបទំាង ៤ ពិសេសនៅក្នុងវិស័យសេដ្ឋកិច្ច និងពាណិជ្ជកម្ម។ អ៊ីចឹងហើយបានជានៅក្នុងដំណើរទស្សនកិច្ចនោះ លោកស៊ី ជីនពីងបាននំាយកទៅជាមួយលោកនូវអ្នកជំនួញចិនគ្រាក់ៗមួយក្រុមមានគ្នាសរុបប្រមាណជា ២០០នាក់។ ក្រសួងការបរទេសចិនធ្លាប់បានប្រកាសឲ្យដឹងរួចហើយថា ទស្សនកិច្ចរបស់លោកស៊ី ជីនពីងនៅក្នុងទ្វីបអឺរ៉ុប គឺជាឱកាសមួយដែលចិនត្រូវចុះហត្ថលេខាជាផ្លូវការលើកិច្ចព្រមព្រៀងជាច្រើនដែលអឺរ៉ុប និងចិន ព្រមទំាងចិន ជាមួយប្រទេសពាក់ព័ន្ធបានព្រមព្រៀងគ្នានាពេលកន្លងមក។
ជាមួយសហភាពអឺរ៉ុប ចិនគ្រោងចុះហត្ថលេខាជាផ្លូវការលើកិច្ចសន្យាកម្ម៉ង់ទិញយន្តហោះ Airbus ចំនួន ១៥០គ្រឿង។ កន្លងមក ចិនក៏ធ្លាប់ទិញយន្តហោះ Airbus របស់អឺរ៉ុបដែរ តែមិនសូវច្រើនដូចលើកនេះទេ។ នៅក្នុងប្រទេសអាល្លឺម៉ង់ រដ្ឋាភិបាលក្រុងប៉េកំាងបានលើកឡើងពីកិច្ចព្រមព្រៀងលើកិច្ចសហប្រតិបត្តិការនៅក្នុងវិស័យវិទ្យាសាស្រ្ត និងបច្ចេកវិទ្យា វិស័យឧស្សាហកម្ម វិស័យកសិកម្ម វិស័យអាកាសនាវាវិជ្ជា វិស័យអប់រំ និងវិស័យវប្បធម៌។ ចំពោះប្រទេសបារំាងវិញ ក្រៅពីចុះហត្ថលេខាលើកិច្ចសហប្រតិបត្តិការនៅក្នុងវិស័យទំាង ៦ដូចអាល្លឺម៉ង់ ចិនក៏បានផ្តោតបន្ថែមលើវិស័យថាមពល និងនគរោបនីយកម្ម។ ករណីពិសេសមួយនៃទស្សនកិច្ចរបស់លោកប្រធានាធិបតីចិនក្នុងប្រទេសបារំាង គឺការបូកសរុបលទ្ធផលនៃទំនាក់ទំនងរវាងចិន និងបារំាងក្នុងរយៈពេល ៥០ឆ្នំាកន្លងទៅ។
ចិនកំពុងឈឺក្បាលរឿងដែនដីគ្រីមេដែលរុស្ស៊ីកំពុងក្រសោបយក
ក្រៅពីដំណើរទស្សនកិច្ចនៅក្នុងប្រទេសអឺរ៉ុបមួយចំនួន លោកប្រធានាធិបតីចិនស៊ី ជីនពីងក៏ត្រូវទៅចូលរួមនៅក្នុងជំនួបកំពូលលើកទី៣ ស្តីពីសន្តិសុខនុយក្លេអ៊ែរក្នុងទីក្រុងឡាអេ ប្រទេសហូឡង់ដែលនឹងរៀបចំពីថ្ងៃទី២៤ ដល់ថ្ងៃទី២៥ មីនា។ ជំនួបកំពូលនោះនឹងត្រូវចូលរួមដោយប្រមុខរដ្ឋ និងប្រមុខរដ្ឋាភិបាលបរទេសប្រមាណជា ៥០រូប ក្នុងនោះក៏នឹងមានវត្តមានលោកប្រធានាធិបតីអាមេរិកអូបាម៉ាដែរ។ សម្រាប់លោកស៊ី ជីនពីង នេះជាការចូលរួមលើកទីមួយរបស់លោក និងដែលវត្តមានចិននៅក្នុងជំនួបរបៀបនេះ គឺជាកាយវិការដ៏សំខាន់មួយរបស់ចិននៅក្នុងបញ្ហាសន្តិសុខអន្តរជាតិ។ នៅក្នុងឱកាសនោះ លោកស៊ី ជីនពីងច្បាស់ជាផ្តល់ចេញនូវយោបល់ ការយល់ឃើញ និងវិធានការមួយចំនួនទាក់ទងនឹងបញ្ហាសន្តិសុខនុយក្លេអ៊ែរ។
រីឯសំណុំរឿងអន្តរជាតិអាទិភាពមួយទៀតដែលលោកស៊ី ជីនពីងត្រូវបង្ហាញជំហរប្រាប់ពិភពលោក គឺវិបត្តិនៅគ្រីមេដែលបស្ចិមលោក និងប្រទេសរុស្ស៊ីកំពុងបន្តប្រទាញប្រទង់គ្នាយ៉ាងខ្លំាង។ រហូតមកដល់ពេលនេះ ចិនដែលជាសម្ព័ន្ធមិត្តរបស់រុស្ស៊ីហាក់ដូចជាមិនសូវនិយាយអ្វីច្រើនប៉ុន្មានទេ និងបានព្យាយាមប្រកាន់យកផ្លូវកណ្តាល។ ជាក់ស្តែងថ្មីៗនេះ ចិនបានបោះឆ្នោតអនុបវាទលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិដែលដាក់ទ័ណ្ឌកម្មលើការរៀបចំបោះឆ្នោតប្រជាមតិនៅគ្រីមេ។ សម្រាប់ចិន ដែនដីគ្រីមេរបស់អ៊ុយក្រែនដែលរុស្ស៊ីកំពុងក្រសោបយកពេលនេះ គឺជាសំណុំរឿងមួយដែលខ្លួនកំពុងឈឺក្បាលខ្លំាងណាស់។ ឈឺក្បាលព្រោះនៅម្ខាង ប៉េកំាងតែងតែបរិហារបស្ចិមលោកពីការលូកដៃចូលជ្រៀតជ្រែកកិច្ចការផ្ទៃក្នុងរបស់ចិន តែនៅម្ខាងទៀត ចិនចំាបាច់ត្រូវតែគំាទ្រសម្ព័ន្ធមិត្តរុស្ស៊ីរបស់ខ្លួន។
និយាយពីបញ្ហាសិទ្ធិមនុស្សនៅក្នុងប្រទេសចិនវិញ នេះជារឿងមួយដែលប្រទេសអឺរ៉ុបមិនអាចមិនលើកយកទៅនិយាយបានទេ តែនិយាយត្រឹមកម្រិតណានោះ វាជារឿងមួយផ្សេងទៅវិញ។ កន្លងមកគេសង្កេតឃើញថា បស្ចិមលោកមិនសូវលើកយកបញ្ហានេះទៅនិយាយជាមួយចិនប៉ុន្មានទេ ដោយខ្លាចបាត់ប្រយោជន៍សេដ្ឋកិច្ច។ ចំណែកចិនវិញក៏មិនចង់ឮ និងមិនចង់ឲ្យប្រទេសណាមួយនិយាយដែរ។ សម្រាប់ចិន រឿងសិទ្ធិមនុស្សរបស់ចិន គឺជារឿងរបស់ចិនដែលចិនមិនត្រូវការមេរៀនពីអ្នកណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ