ហេតុអ្វីបានជាកាណាដាជជែកតែអំពីពាណិជ្ជកម្មជាមួយចិនដោយចៀសវាងមិននិយាយពីរឿងសិទ្ធិមនុស្ស?
ចុះផ្សាយនៅថ្ងៃ៖
ស្តាប់ - ០៣:៤៨
កាលពីចុងសប្តាហ៍នេះ ប្រទេសកាណាដា និងប្រទេសចិនបានសំរេចចុះកិច្ចព្រមព្រៀងពាណិជ្ជកម្មចំនួនជាង ២០ ក្នុងទំហំទឹកប្រាក់សរុបប្រមាណ ២,៥ ពាន់លានដុល្លារកាណាដា។ កិច្ចព្រមព្រៀងក្នុងទឹកប្រាក់ដ៏ច្រើនសន្ធឹកសន្ធាប់នេះត្រូវបានធ្វើឡើង ក្នុងដំណើរទស្សនកិច្ច រយៈពេលបួនថ្ងៃរបស់លោកនាយករដ្ឋមន្រ្តីកាណាដា Stephen Harpher នៅប្រទេសចិន។ អង្គការសិទ្ធិមនុស្សនៅក្នុងស្រុកបានទទូចអោយលោកនាយករដ្ឋមន្រ្តីកាណាដាជជែកពិភាក្សាអំពីបញ្ហាសិទ្ធិមនុស្សជាមួយថ្នាក់ដឹកនាំចិន។ ទោះបីជាមានសម្ពាធបែបនេះក៏ដោយ ថ្នាក់ដឹកនាំកាណាដាសំរេចផ្តោតតែទៅលើប្រធានបទសេដ្ឋកិច្ច និងពាណិជ្ជកម្មជាចម្បង ដើម្បីចៀសវាងបង្កើនភាពតានតឹងផ្នែកការទូតរវាងប្រទេសទាំងពីរដែលកំពុងតែមានស្រាប់។
នៅមុន ដំណើរទស្សនកិច្ចរបស់លោកនាយករដ្ឋមន្រ្តី Stephen Harper ទៅកាន់ប្រទេសចិន បណ្តាអង្គការសិទ្ធិមនុស្ស និងបណ្តាញសារព័ត៌មានក្នុងប្រទេសកាណាដាបានលើកសំណួរថា តើកាណាដានឹងលើកយកបញ្ហាសិទ្ធិមនុស្សទៅជជែកជាមួយថ្នាក់ដឹកនាំចិនដែរឬទេ? លោក Alex Neve អគ្គលេខាធិការអង្គការ Amnestie International Canada បានជំរុញអោយលោក Harper លើកយកប្រធានបទនានាដូចជា បញ្ហាអ្នកកាន់សាសនាហ្វាលុងគង់ ជនជាតិភាគតិច អ៊ុយហ្គួរ កាន់សាសនាឥស្លាម និងការឃុំឃាំងអ្នកទោសនយោបាយជាដើម ។ ឆ្លើយតបទៅនឹងសំណួរអ្នកកាសែតក្រោយជំនួបជាមួយសមភាគីចិន លោកនាយករដ្ឋមន្រ្តី Stephen Harper មិនបានបង្ហាញជាសាធារណៈពីការបារម្ភចំពោះបញ្ហាសិទ្ធិមនុស្សនៅប្រទេសចិនឡើយ។ ផ្ទុយទៅវិញ លោកនាយករដ្ឋមន្រ្តីចិន លី ខឺឈាំង បានប្រកាសប្រាប់ថា មានការជជែកពីបញ្ហាសិទ្ធិមនុស្ស និងនីតិរដ្ឋ។ ប្រទេសទាំងពីរបានពិភាក្សាគ្នា ជាលក្ខណៈស្មោះត្រង់ និងបើកចំហ ហើយប្រទេសចិនមានបំណងចង់កែលំអស្ថានការណ៍ទាំងនោះ។
មូលហេតុដែលកាណាដាចៀសវាងមិនលើកយកបញ្ហាសិទ្ធិមនុស្សក្នុងប្រទេសចិនមកនិយាយជាសាធារណៈ ព្រោះរយៈពេលចុងក្រោយនេះ ប្រទេសទាំងពីរមានភាពតានតឹងផែ្នកការទូតស្រាប់ទៅហើយ។ កាលពីខែសីហាកន្លងទៅនេះ កាណាដាបានចោទប្រកាន់ចិនថា ជាអ្នកនៅពីក្រោយខ្នងដឹកនាំការវាយប្រហារតាមប្រព័ន្ធអ៊ិនធ័រណេតមកលើក្រុមប្រឹក្សាជាតិផែ្នកស្រាវជ្រាវកាណាដា។ ជាការឆ្លើយតប អាជ្ញាធរចិនបានចាប់ប្តីប្រពន្ធជនជាតិកាណាដាឈ្មោះ Kevin និង Julia Garratt ក្រោមបទសង្ស័យថា បានធ្វើចារកម្មក្នុងប្រទេសចិន។ ប្តីប្រពន្ធនេះជាអាជីវករបើកហាងកាហ្វេរស់នៅប្រទេសចិន អស់រយៈពេល ៣០ ឆ្នាំមកហើយ។ លើសពីនេះ ចាប់តាំងពីឆ្នាំ ២០១២ មកម្ល៉េះ រដ្ឋាភិបាលកាណាដាបានទាមទារលក្ខខ័ណ្ឌច្រើនដល់វិនិយោគិន តំណាងក្រុមហ៊ុនរដ្ឋចិនមួយ ដែលមានបំណងចង់ធ្វើអាជីវកម្មលើធនធានប្រេងកាតចំរាញ់ពីដីខ្សាច់ (Sable bitumineux ឬ Oil sands) នៅក្នុងខេត្តអាល់ប៊ែរតា។ ក្រៅពីនោះ កាណាដានៅមិនទាន់បង្ហាញជំហរអោយបានច្បាស់លាស់ជុំវិញសំណើរបស់ចិនដែលចង់អោយមានការបង្កើតកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ។ តួយ៉ាងដូចជា កាលពីថ្មីៗនេះ ក្រោយពីចិនបានបង្ហាញភាពមិនសប្បាយចិត្ត កាណាដាទើបតែបានពន្លឿនការអនុម័តអោយចូលជាធរមានលើកិច្ចព្រមព្រៀងលើកកម្ពស់ និងការពារវិនិយោគិនកាណាដាចិន។
លោក David Mulroney អ្នកស្រាវជ្រាវជាន់ខ្ពស់ផែ្នកកិច្ចការអន្តរជាតិប្រចាំសាកលវិទ្យាល័យតូរុនតូបានអោយដឹងថា ក្នុងស្ថានការតានតឹងបែបណាក៏ដោយ គេមិនអាចមើលរំលងប្រទេសចិនបានឡើយ ព្រោះចិននៅតែជាដៃគូពាណិជ្ជកម្មសំខាន់។ ថ្នាក់ដឹកនាំកាណាដាត្រូវចេះលៃលករកវិធីសាស្រ្តជជែកជាមួយចិន ប្រសិនបើខ្លួនចង់អោយសេដ្ឋកិច្ចរបស់ខ្លួនមានកំណើនទៅមុខ។ បើតាមការវិភាគរបស់លោក Paul Evans វិញ ដែលជាសាស្ត្រាចារ្យផែ្នកទំនាក់ទំនងអន្តរជាតិប្រចាំសាកលវិទ្យាល័យ British Columbia នាទីក្រុង Vancouver បានអោយដឹងថា កាណាដាហាក់បន្ទន់ឥរិយាបថច្រើនជាមួយចិន ដោយលោកនាយករដ្ឋមន្រ្តីកាណាដា Stephen Harper យល់ព្រមធ្វើដំណើរទស្សនកិច្ចនៅប្រទេសចិនតបតាមការអញ្ជើញរបស់លោកប្រធានាធិបតី ស៊ី ជីងពីង។ នេះជាទស្សនកិច្ចលើកទីបីរបស់លោក Harper ចាប់តាំងពីបានកាន់ចូលតំណែងតាំងពីឆ្នាំ ២០០៦ មក។
ទស្សនកិច្ចដែលផ្តោតលើពាណិជ្ជកម្មនេះបានឈានទៅដល់ការចុះកិច្ចព្រមព្រៀងជាងម្ភៃ ក្នុងវិស័យមួយចំនួនដូចជា នុយក្លេអ៊ែរ ការដឹកជញ្ជូនតាមផ្លូវអាកាស និងកសិចំណីអាហារ។ នៅក្នុងនោះ យើងឃើញមានការវិនិយោគរួមគ្នាជាមួយក្រុមហ៊ុនកាណាដា Airbone China និង ក្រុមហ៊ុន Heilongjiang InterChina Water ដើម្បីកាត់បន្ថយការបំពុលបរិយាកាស នៅប្រទេសចិន។ ការវិនិយោគរួមគ្នាមួយទៀតគឺ រវាងក្រុមហ៊ុនកាណាដា Plasco និងក្រុមហ៊ុន Shougang ក្នុងការកែច្នៃសំរាមអោយទៅថាមពលអគ្គសនី។ សំរាប់ប្រទេសកាណាដាចិនជាដៃគូពាណិជ្ជកម្មទីពីរ បន្ទាប់ពីសហរដ្ឋអាមេរិក។ កាលពីឆ្នាំ ២០១៣ កន្លងទៅនេះ ពាណិជ្ជកម្មទ្វេភាគីចិន កាណាដាមានទំហំទឹកប្រាក់សរុបចំនួន ៧៣ ពាន់លានដុល្លារ ពោលគឺស្មើនឹង ៧,៧% នៃទំហំពាណិជ្ជកម្មរបស់កាណាដាក្នុងពិភពលោកទាំងមូល។ បច្ចុប្បន្ននេះ ជញ្ជីងពាណិជ្ជកម្មរវាងប្រទេសទាំងពីរនេះមានគម្លាតរហូតទៅដល់ ៣១ ពាន់លានដុល្លារ ដោយកាណាដានាំចូលពីចិនក្នុងរង្វង់ទឹកប្រាក់ ៥២,៧ ពាន់លាន់ដុល្លារ ខណៈការនាំចេញរបស់កាណាដាទៅកាន់ប្រទេសចិន មានត្រឹមតែ ២០,៥ ពាន់លានដុល្លារប៉ុណ្ណោះ។ ក្នុងជំនួបជាមួយអ្នកវិនិយោគចិន លោក Stephen Harper ស្នើសុំប្រទេសចិនធ្វើយ៉ាងណាកាត់បន្ថយគម្លាតនេះបានតូចបំផុត ដោយអនុញ្ញាតអោយកាណាដាបង្កើនការនាំចេញច្រើនថែមទៀត ចូលទៅក្នុងទីផ្សារប្រទេសចិន។ សំរាប់អ្នកវិនិយោគិនកាណាដាដែលមានវត្តមាន ក្នុងជំនួបនោះបានអោយដឹងថា ចិនជាទីផ្សារមានសក្តានុពលខ្ពស់ ប៉ុន្តែមិនមែនជាការងាយស្រួលទេក្នុងការដណ្តើមកន្លែងក្នុងទីផ្សារនេះ។ ក្រៅពីឧបសគ្គផែ្នកវប្បធម៌ និងភាសា គេត្រូវការពេលវេលា ដើម្បីអោយអ្នកប្រើប្រាស់ចិនស្គាល់ផលិតផលរបស់កាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ