កាណាដា និងចិនចុះហត្ថលេខាកិច្ចព្រមព្រៀងពាណិជ្ជកម្មដ៏ច្រើនសន្ធឹកសន្ធាប់
កាលពីថ្ងៃសៅរ៍ទី ៧ វិច្ឆិកា ក្នុងដំណើរទស្សនកិច្ចចំនួនបួនថ្ងៃ នៅប្រទេសចិន លោកនាយករដ្ឋមន្រ្តីកាណាដា Stephen Harper បានចុះហត្ថលេខាលើកិច្ចព្រមព្រៀងពាណិជ្ជកម្មចំនួនជាងម្ភៃជាមួយប្រទេសចិន។ កិច្ចព្រមព្រៀងទាំងនោះមានតំលៃទឹកប្រាក់សរុបប្រមាណ ២,៥ ពាន់លានដុល្លារកាណាដា ដោយផ្តោតទៅលើវិស័យមួយចំនួនដូចជា នុយក្លេអ៊ែរ ការដឹកជញ្ជូនតាមផ្លូវអាកាស និងកសិចំណីអាហារ។ គេរំពឹងថា កិច្ចព្រមព្រៀងនេះអាចបង្កើនការងារថ្មីចំនួន ២ ពាន់កន្លែង នៅក្នុងប្រទេសកាណាដា។
ចុះផ្សាយនៅថ្ងៃ៖
ស្តាប់ - ០២:១៦
ក្រោយជំនួបកិច្ចសន្ទនាជាមួយលោកនាយករដ្ឋមន្រ្តីចិន លី ខឺឈាំង នាទីក្រុងប៉េកាំង លោកនាយករដ្ឋមន្រ្តីកាណាដា Stephen Harper បានប្រកាសដំណឹងនេះ នៅចំពោះមុខអ្នកកាសែត។ ក្នុងចំណោមកិច្ចព្រមព្រៀងទាំងនោះមានដូចជា កិច្ចសន្យារបស់ក្រុមហ៊ុនដឹកជញ្ជូនសាធារណៈចិន China Express ក្នុងការទិញយន្តហោះប្រភេទ Série C ដែលផលិតដោយក្រុមហ៊ុនកាណាដា Bombardier។ ប៉ុន្តែ សេចក្តីលម្អិត ជុំវិញការសន្យាទិញនេះពុំបានបញ្ជាក់អោយដឹងជាសាធារណៈឡើយ។
ក្រៅពីនោះ មានកិច្ចព្រមព្រៀងផ្សេងៗទៀតដូចជា កិច្ចសហប្រតិបត្តិការទ្វេភាគីផ្នែកអាកាសចរណ៍ស៊ីវិល និងថាមពលនុយក្លេអ៊ែរ ការបង្កើតសម្ព័ន្ធភាពយុទ្ធសាស្ត្ររវាងក្រុមហ៊ុនអាកាសចរណ៍ Air China និង Air Canada និងកិច្ចសហប្រតិបត្តិការផែ្នករដ្ឋាករគយរវាងប្រទេសទាំងពីរ។ ផ្លែឈើពីប្រទេសកាណាដាមានជាអាទិ៍ ផែ្ល Cherry និងផែ្ល Bleuet ក៏នឹងត្រូវបង្កើនការនាំចេញថែមទៀតចូលទៅក្នុងទីផ្សារប្រទេសចិន។
លើសពីនេះ ប្រទេសកាណាដា និងប្រទេសចិនក៏បានប្រកាសឯកភាពគ្នា បង្កើតមជ្ឈមណ្ឌលបំលែងរូបិយប័ណ្ណរវាងប្រទេសទាំងពីរ ពោលគឺការប្តូរប្រាក់ដុល្លារកាណាដា និងប្រាក់យ័នចិន ដោយផ្ទាល់ ទៅវិញ ទៅមក។ មណ្ឌលប្តូរប្រាក់នេះនឹងមានទីតាំងនៅទីក្រុងតូរុនតូ ប្រទេសកាណាដា ដោយទទួលបានអាជ្ញាប័ណ្ណប្រតិបត្តិការពីធនាគារកណ្តាលចិន ដើម្បីសំរួលដល់វិនិយោគិនដែលកំពុងបណ្តាក់ទុននៅក្នុងប្រទេសកាណាដា និងប្រទេសចិន។ តាមរយៈការប្តូរប្រាក់ដោយផ្ទាល់នេះ វិនិយោគិននៃប្រទេសទាំងពីរ ពុំចាំបាច់ប្រើប្រាស់ដុល្លារអាមេរិច ដើម្បី ប្តូរពាណិជ្ជកម្មឡើយ។ ពួកគេគ្រាន់តែប្រើប្រាស់រូបិយប័ណ្ណប្រទេសរៀងខ្លួន ក្នុងការវិនិយោគ។ ប្រតិបត្តិការបែបនេះត្រូវបានគេយល់ឃើញថា មានភាពចំណេញទាំងពេលវេលា ក្នុងការផ្ទេរប្រាក់ និងកាត់បន្ថយការចំណាយទូទៅ។
នៅក្នុងដំណើរទស្សនកិច្ចនេះផងដែរ លោកនាយករដ្ឋមន្រ្តីកាណាដា Stephen Harper ក៏បានប្រកាសបើកការិយាល័យពាណិជ្ជកម្មកាណាដាចំនួន ៤ កន្លែងផ្សេងទៀតនៅតាមបណ្តាទីក្រុងសំខាន់ៗក្នុងប្រទេសចិនដូចជា ទីក្រុងហាងស៊ូ ទីក្រុងស៊ាន ទីក្រុងសៀមែន និងទីក្រុងទៀនជិន។ ជាសរុប កាណាដាមានការិយាល័យពាណិជ្ជកម្មចំនួន ១៥ នៅប្រទេសចិន ដើម្បីជួយគាំទ្រសហគ្រាសធុនតូច និងមធ្យមរបស់ខ្លួនអោយអាចដណ្តើមទីផ្សារក្នុងប្រទេសចិន។
សូមបញ្ជាក់ផងដែរថា ប្រទេសចិនជាដៃគូពាណិជ្ជកម្មធំទីពីររបស់ប្រទេសកាណាដា បន្ទាប់ពីសហរដ្ឋអាមេរិក។ មានការងារចំនួនប្រមាណកន្លះលានកន្លែង នៅប្រទេសកាណាដា ដែលពឹងអាស្រ័យលើ ការប្តូរពាណិជ្ជកម្មរវាងប្រទេសទាំងពីរ។ កាលពីឆ្នាំ ២០១៣ កន្លងទៅនេះ ពាណិជ្ជកម្មទ្វេភាគីចិន-កាណាដាមានទំហំទឹកប្រាក់សរុបចំនួន ៧៣ ពាន់លានដុល្លារ ពោលគឺស្មើនឹង ៧,៧% នៃទំហំពាណិជ្ជកម្មរបស់កាណាដាក្នុងពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ