ហេតុអ្វីបានជាចិនព្យាយាមបង្កើនទំនាក់ទំនងជាមួយឥណ្ឌា?
ចុះផ្សាយនៅថ្ងៃ៖
ស្តាប់ - ០៤:១០
ចិន និងឥណ្ឌា គឺជាប្រទេសជិតខាងពីរ ដែលមើលមុខគ្នាមិនចំ អស់រយៈពេលជាច្រើនឆ្នាំមកហើយ ដោយសារតែមានជម្លោះព្រំដែនជាមួយគ្នាផង និងបញ្ហាទីបេផង។ ភាពតានតឹងតាមព្រំដែនចិន-ឥណ្ឌា បានកើនឡើងកាន់តែខ្លាំង កាលពីដើមខែកន្លងទៅ ដោយឥណ្ឌាចោទថា ចិនបានបញ្ជូនទាហានឆ្លងព្រំដែនរំលោភចូលទៅខាងឥណ្ឌា។ ចិនក៏បានសុខចិត្តដកទាហានទាំងអស់នោះមកវិញ ដើម្បីបន្ធូរបន្ថយភាពតានតឹង ហើយកាលពីចុងសប្តាហ៍មុននេះ លោកនាយករដ្ឋមន្រ្តីចិនបានជ្រើសរើសយកឥណ្ឌា ជាប្រទេសទី១ សម្រាប់ដំណើរទស្សនកិច្ចក្រៅប្រទេសរបស់លោក។ ទាំងនេះបង្ហាញយ៉ាងច្បាស់ អំពីចេតនារបស់ចិន ក្នុងការសម្របសម្រួលដោះស្រាយទំនាស់ និងបង្កើនទំនាក់ទំនងជាមួយនឹងឥណ្ឌាឡើងវិញ។ តើចិនធ្វើបែបនេះក្នុងគោលបំណងអ្វី?
ជម្លោះព្រំដែនគោកនៅតំបន់ជួរភ្នំហិមាល័យ គឺជម្លោះដ៏ធំមួយ ដែលធ្វើឲ្យចិន និងឥណ្ឌាមើលមុខគ្នាមិនចំ។ ជម្លោះដែលរហូតរាលរាលទៅជាសង្រ្គាម កាលពីឆ្នាំ១៩៦២ បណ្តាលឲ្យមានអ្នកស្លាប់ និងរបួសរាប់ពាន់នាក់ ជាពិសេស ខាងឥណ្ឌា ដែលជាអ្នកចាញ់សង្រ្គាម។
ក្រៅពីបញ្ហាព្រំដែននេះ នៅមានបញ្ហាដ៏ចម្រូងចម្រាសមួយទៀត រវាងចិន និងឥណ្ឌា គឺបញ្ហាទីបេ ដោយសារតែឥណ្ឌាបានផ្តល់សិទ្ធិជ្រកកោននយោបាយដល់សម្តេចសង្ឃដាឡៃឡាម៉ា ព្រមទាំងបានផ្តល់ជម្រក ដល់រដ្ឋាភិបាលនិរទេសទីបេ ព្រមទាំងសកម្មជនទីបេផ្សេងទៀត ដែលប្រឆាំងនឹងរដ្ឋាភិបាលចិន។
ក៏ប៉ុន្តែ យើងសង្កេតឃើញថា នៅពេលដែលឥណ្ឌា នៅមិនទាន់ស្រាយកំហឹង ដែលសល់ពីបរាជ័យ ក្នុងសង្រ្គាមព្រំដែន កាលពីឆ្នាំ១៩៦២ ចិនវិញ ហាក់ដូចជាផ្តោតអារម្មណ៍ទៅលើបញ្ហាព្រំដែននេះ តិចជាងឥណ្ឌា។ នេះគឺដោយសារតែចិនសំឡឹងឃើញនូវកិច្ចការច្រើនផ្សេងទៀត ដែលគួរធ្វើជាមួយឥណ្ឌា ហើយដែលផ្តល់ផលចំណេញច្រើនជាងការឈ្លោះគ្នារឿងព្រំដែន។ តំបន់ព្រំដែន ដែលអតីតនាយករដ្ឋមន្រ្តីឥណ្ឌា គឺលោក Jawaharlal Nehru ក៏ធ្លាប់បានទទួលស្គាល់ខ្លួនឯងដែរថា “សូម្បីតែស្មៅក៏មិនមានដុះ”។
ថ្មីៗនេះ មន្រ្តីជាន់ខ្ពស់នៃបក្សកុម្មុយនិស្តចិនធ្លាប់បានលើកឡើងថា ចិន និងឥណ្ឌាមានបញ្ហាព្រំដែនជាមួយគ្នា។ វាជារឿងពិតជាក់ស្តែង ដែលមិនអាចប្រកែកបាន។ ក៏ប៉ុន្តែ ចិនចង់ឃើញបញ្ហាព្រំដែននេះត្រូវបានដោះស្រាយឲ្យបានចប់សព្វគ្រប់ ហើយធ្វើយ៉ាងណា កុំឲ្យជម្លោះនេះជាបញ្ហា ដែលនាំឲ្យខូចដល់ទំនាក់ទំនងរវាងប្រទេសទាំងពីរ។
តាមពិត អ្វីដែលចិនសំឡឹងឃើញថា ជាផលចំណេញធំបំផុត នៅក្នុងការបង្កើនទំនាក់ទំនងជាមួយនឹងឥណ្ឌា គឺផលប្រយោជន៍ខាងផ្នែកសេដ្ឋកិច្ច។
ឥណ្ឌា ដែលជាប្រទេសមានប្រជាជនច្រើនជាងគេ លំដាប់ទី២ នៅលើពិភពលោក ក៏ជាប្រទេសដែលមានសេដ្ឋកិច្ចកំពុងលូតលាស់ ប្រកបដោយសក្តានុពលខ្ពស់ផងដែរ។ នៅក្នុងពេលបច្ចុប្បន្ននេះ បើទោះបីជាចិន និងឥណ្ឌា នៅមិនទាន់មើលមុខគ្នាចំស្រួលបួលក៏ដោយ ក៏ទំនាក់ទំនងពាណិជ្ជកម្ម រវាងប្រទេសទាំងពីរមានទំហំធំធេងស្រាប់ទៅហើយ។ ជាក់ស្តែង កាលពីឆ្នាំ២០១២ កន្លងទៅនេះ ការដោះដូរពាណិជ្ជកម្មរវាងចិន និងឥណ្ឌា មានទំហំជាទឹកប្រាក់រហូតដល់ទៅ ៦៦ពាន់លានដុល្លារ ហើយប្រទេសទាំងពីរក៏បានព្រមព្រៀងគ្នារួចហើយដែរថា នឹងបង្កើនការដោះដូរពាណិជ្ជកម្មនេះឲ្យបានរហូតដល់ ១០០ពាន់លានដុល្លារ ក្នុងមួយឆ្នាំ នៅឆ្នាំ២០១៥។
សព្វថ្ងៃនេះ ចិន គឺជាដៃគូពាណិជ្ជកម្មដ៏ធំបំផុតរបស់ឥណ្ឌា មានន័យថា នៅក្នុងវិស័យពាណិជ្ជកម្មក្រៅប្រទេស ឥណ្ឌារកស៊ីជាមួយចិនច្រើនជាងជាមួយប្រទេសផ្សេងទៀត ហើយនៅក្នុងនេះ តាមពិតទៅ គឺចិនជាអ្នកទាញយកផលចំណេញច្រើនជាងឥណ្ឌា ដោយសារតែចិននាំទំនិញចេញទៅកាន់ប្រទេសឥណ្ឌា ច្រើនជាងនាំទំនិញចូលពីឥណ្ឌា រហូតដល់ទៅ ២៩ពាន់លានដុល្លារ (តួលេខ ឆ្នាំ២០១២)។
កាលពីក្នុងអំឡុងដំណើរទស្សនកិច្ច ទៅកាន់ប្រទេសឥណ្ឌា កាលពីដើមសប្តាហ៍នេះ លោក លី ខឺឈាំង នាយករដ្ឋមន្រ្តីចិន បានសន្យាជាមួយនឹងឥណ្ឌាថា នឹងបើកចំហទីផ្សារចិនឲ្យកាន់តែទូលាយបន្ថែមទៀត សម្រាប់ទំនិញឥណ្ឌា ដើម្បីជួយឲ្យឥណ្ឌាអាចកាត់បន្ថយឧនភាពជញ្ជីងពាណិជ្ជកម្មជាមួយនឹងចិន។ នេះ គឺជាការបង្ហាញនូវកាយវិកាទន់ភ្លន់មួយបន្ថែមរបស់ចិន ចំពោះឥណ្ឌា ហើយលោកនាយករដ្ឋមន្រ្តីចិនបានលើកឡើងថា ចិនមិនចង់កេងចំណេញលើដៃគូពាណិជ្ជកម្មរបស់ខ្លួននោះទេ។ អ្វីដែលចិនចង់បាន គឺទំនាក់ទំនងពាណិជ្ជកម្មមួយដែលមានតុល្យភាព និងប្រកបដោយចីរភាព។
ក្រៅពីផលប្រយោជន៍សេដ្ឋកិច្ច នៅមានចំណុចសំខាន់មួយទៀត ដែលធ្វើឲ្យចិនចង់សម្រុះសម្រួល និងបង្កើនទំនាក់ទំនងជាមួយចិន គឺនយោបាយរបស់អាមេរិកនៅអាស៊ី។ នៅក្រោមអាណត្តិរបស់លោកអូបាម៉ា អាមេរិកបានដាក់ចេញនូវនយោបាយយ៉ាងច្បាស់ថា នឹងយកតំបន់អាស៊ីធ្វើជាអាទិភាពចម្បងបំផុត នៃនយោបាយការបរទេសរបស់ខ្លួន។ ដូច្នេះ ប្រសិនបើចិនទុកបណ្តោយឲ្យទំនាក់ទំនងជាមួយឥណ្ឌា កាន់តែធ្លាក់ដុនដាប ឥណ្ឌាអាចនឹងងាកទៅពង្រឹងទំនាក់ទំនងជាមួយអាមេរិក ឬក៏រហូតដល់បង្កើតជាកិច្ចព្រមព្រៀងសម្ព័ន្ធភាពជាមួយអាមេរិក ដែលអាចជាឱកាសកាន់តែអំណោយផលបន្ថែមទៀត ឲ្យអាមេរិកបង្កើនវត្តមាន មកឡោមព័ទ្ធចិន។
ដូច្នេះ សរុបមកវិញ បញ្ហាតានតឹងរវាងចិន និងឥណ្ឌា អាចនឹងបន្តមាន ដោយមិនអាចបញ្ចប់ឆាប់ៗខាងមុខនេះទេ ជាពិសេស បញ្ហាព្រំដែន និងបញ្ហាទីបេ។ ក្រុមអ្នកជាតិនិយមចិនក៏មានច្រើន ដែលរដ្ឋាភិបាលក្រុងប៉េកាំងចាំបាច់ត្រូវតែប្រយ័ត្នប្រយែង ក្នុងការដោះស្រាយបញ្ហាព្រំដែនជាមួយឥណ្ឌា។ ក៏ប៉ុន្តែ ក្នុងពេលជាមួយគ្នា ចិនក៏ព្យាយាមផងដែរ ធ្វើយ៉ាងណា កុំឲ្យជម្លោះអស់ទាំងនេះ បង្កជាបញ្ហានាំឲ្យប៉ះពាល់ធ្ងន់ធ្ងរដល់ទំនាក់ទំនងជាមួយនឹងឥណ្ឌា ដែលចុងបញ្ចប់ នាំឲ្យចិនខាតបង់ប្រយោជន៍កាន់តែធំ គឺប្រយោជន៍សេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ