នាយករដ្ឋមន្រ្តីចិនផ្តើមទស្សនកិច្ចនៅបរទេស ជាមួយប្រទេសឥណ្ឌា
លោក Li Keqiang នាយករដ្ឋមន្រ្តីថ្មីរបស់ចិនបានទៅដល់ទីក្រុងញូដេលី នៅព្រឹកថ្ងៃអាទិត្យនេះ។ នៅក្នុងដំណើរទស្សនកិច្ចនៅបរទេស នាយករដ្ឋមន្រ្តីចិនបានជ្រើសរើសយកឥណ្ឌាមុនគេ មុននឹងទៅធ្វើបន្តទស្សនកិច្ច នៅប៉ាគីស្ថាន ស្វីស និងអាល្លឺម៉ង់។ នៅក្នុងជំនួបជាមួយនាយករដ្ឋមន្រ្តីឥណ្ឌា នៅល្ងាចនេះ នាយករដ្ឋមន្រ្តីចិនគ្រោងនឹងលើក និយាយពីពីទំនាក់ទំនងពាណិជ្ជកម្មរវាងប្រទេសទាំងពីរ ប៉ុន្តែ ឥណ្ឌាវិញ រង់ចាំជួបចិនដើម្បីនិយាយពីបញ្ហាព្រំដែនដីគោករវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
នេះជាលើកទីមួយដែលលោក Li Keqiang ធ្វើដំណើរទស្សនកិច្ចនៅបរទេស ពោលគឺចាប់តាំងពីពេលដែលលោកចូលកាន់តែតំណែងជានាយករដ្ឋមន្រ្តីចិន កាលពីខែមីនា។ តាមខុទ្ទការល័យរបស់នាយករដ្ឋមន្រ្តីចិន ការដែលនាយករដ្ឋមន្រ្តីចិនជ្រើសរើសយកឥណ្ឌាធ្វើជាប្រទេសដំបូងគេ ដើម្បីដំណើរទស្សនកិច្ច ក៏ព្រោះតែចិនចង់ផ្តល់តម្លៃ និងពង្រឹងទំនាក់ទំនងជាមួយឥណ្ឌា ដែលជាប្រទេសសមាជិកក្រុមBRICS ជាមួយចិន។
ទីក្រុងប៉េកាំងសង្ឃឹមថា ដំណើរទស្សនកិច្ចរបស់នាយករដ្ឋមន្រ្តីចិន នៅឥណ្ឌា នឹងជួយបង្កើនទំនុកចិត្ត និងបង្កើតយុទ្ធសាស្ត្រថ្មីដើម្បីពង្រីកសហប្រតិបត្តិការ ជាប្រយោជន៍របស់ប្រទេសទាំងពីរ។ នេះបើតាមទីភ្នាក់ងារព័ត៌មានស៊ីហួរ។
ចិនជាប្រទេសដៃគូធំទីពីររបស់ឥណ្ឌា។ ទំហំដោះដូរពាណិជ្ជកម្មរវាងប្រទេសទាំងពីមានតម្លៃប្រមាណ ៥០ពាន់លានអឺរ៉ូ។ ក្រសួងពាណិជ្ជកម្មចិនធ្លាប់បានប្រកាសថា នឹងដំឡើងវាឲ្យបាន៥០ភាគរយទៀតពីពេលនេះ ដល់ឆ្នាំ ២០១៥។
ទីក្រុងញូដេលីវិញ វាយតម្លៃខ្ពស់ដល់ការគិតគូររបស់ទីក្រុងប៉េកាំង។ បើតាមអ្នកនាំពាក្យរបស់ក្រសួងការបរទេសឥណ្ឌា មានប្រធានរឿងជាច្រើនដែលនឹងត្រូវលើកយកមកដាក់លើតុពិភាក្សារវាងថ្នាក់ដឹកនាំប្រទេសទាំងពីរ។ ចំណុចសង្កត់ធ្ងន់ដែលឥណ្ឌាមិនខកខាននឹងលើកយកមកនិយាយ នោះគឺឧប្បតិហេតុដែលកើតមាននៅតំបន់ភ្នំហិមាល័យា កាលពីខែមេសាមុននេះ។ តាមឥណ្ឌា ទាហានចិនបានឈ្លានពានចូលក្នុងតំបន់ហិមាល័យា ដែលជាទឹកដីរបស់ឥណ្ឌា។ ចិនវិញបានបដិសេធថា ទ័ពរបស់ខ្លួនមិនដែលឆ្លងព្រំដែន ចូលទៅក្នុងទឹកដីឥណ្ឌាទេ។
គួររំលឹកថា ចិននឹងឥណ្ឌាមើលមុខគ្នាមិនសូវចំដោយសារជម្លោះព្រំដែនដីគោក ដែលប្រទេសទាំងពីរមានជាមួយគ្នា តាំងពីឆ្នាំ ១៩៦២។ ប៉ុន្តែ យ៉ាងណាក៏ដោយ នាយករដ្ឋមន្រ្តីចិន លោក Li Keqiang ធ្លាប់បានបញ្ជាក់ កាលពីសប្តាហ៍មុនថា ផលប្រយោជន៍រួម នឹងធ្វើឲ្យគេភ្លេច រំលងបញ្ហាមិនចុះសម្រុងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ