ហេតុអ្វីបានកងទ័ពអ៊ីរ៉ាក់រាប់សែននាក់ចាញ់ក្រុមប្រយុទ្ធជីហាតដែលមានចំនួនមិនដល់៥ម៉ឺននាក់?
ចុះផ្សាយនៅថ្ងៃ៖
ស្តាប់ - ០៧:៤៧
ក្រុមអ៊ីស្លាមជ្រុលនិយម បន្ត វាយយកបានជាបន្តបន្ទាប់ ទីក្រុងរបស់រដ្ឋាភិបាលអ៊ីរ៉ាក់។ កាលពីថ្ងៃចន្ទ ទី ១៦ មិថុនា ក្រុមជីហាតចូលដណ្តើមកាន់កាប់ទីក្រុងមួយទៀត ដែលស្ថិតនៅភាគពាយ័ព្យអ៊ីរ៉ាក់។ ប្រជាជនជាង២សែននាក់បានរត់ភៀសខ្លួន ចេញពីផ្ទះសម្បែង។ ខណៈពេលដែលក្រុមជីហាតកំពុងសម្រុក វាយកាន់កាប់ទីក្រុង និងតំបន់ជាច្រើនរបស់អ៊ីរ៉ាក់ លោកប្រធានាធិបតីអាមេរិក បារ៉ាក់ អូបាម៉ាបានប្រកាសបញ្ជូនទ័ព២៧៥នាក់ទៅអ៊ីរ៉ាក់ ដើម្បីធានារក្សាសន្តិសុខដល់មន្រ្តី បុគ្គលិកទូត អាមេរិកប្រចាំនៅអ៊ីរ៉ាក់។ តាំងពីថ្ងៃអាទិត្យ កាណាដា អាមេរិក និងអង្គការសហប្រជាជាតិបានដកមន្រ្តីរបស់ខ្លួនមួយចំនួនចេញពី បាកដាត ទៅនៅទីក្រុងដែលមានសុវត្ថិភាព និងទៅប្រទេសជិតខាង ដូចជាហ្សកដានី។
កាលពីថ្ងៃទី ១៣មិថុនា នៅមួយសប្តាហ៍ក្រោយក្រុមជីហាតវាយយកបានទីក្រុង នៅភាគខាងជើងអ៊ីរ៉ាក់ លោកប្រធានាធិបតីនៅតែបញ្ជាក់ទាត់ចោលយុទ្ធសាស្រ្តបញ្ជូនទ័ពជើងគោកទៅអ៊ីរ៉ាក់ជាថ្មី។ កាលពីខែឧសភា នៅសាលាយោធាជាន់ខ្ពស់Westpoint លោកអូបាម៉ាបានថ្លែងថា ដើម្បីបញ្ជាក់ថា អាមេរិកជាមហាអំណាច អាមេរិកមិនចាំបាច់ប្រើយុទ្ធសាស្រ្ត ធ្វើអន្តរាគមន៍យោធាទៅក្នុងទឹកដីបរទេសទេ។ ជំហរនេះបញ្ជាក់ជាថ្មី ថា នៅក្នុងអាណត្តិរបស់លោកអូបាម៉ា គេមិនត្រូវសង្ឃឹមឃើញអន្តរាគមន៍ទ័ពអាមេរិកនៅក្នុងប្រទេសដទៃទេ។
ប៉ុន្តែ ការប្រយុទ្ធ និងរូបភាពបង្ហាញការបាញ់សម្លាប់បង្ហូរឈាមរបស់ក្រុមអ៊ីស្លាមជ្រុលនិយម ជីហាត ទៅលើទាហានអ៊ីរ៉ាក់ នៅបុន្មានថ្ងៃចុងក្រោយនេះ អាចនឹងធ្វើឲ្យប្រធានាធិបតីអាមេរិកដូរចិត្តដែរ។ កាលពីយប់ថ្ងៃចន្ទទី ១៦ មិថុនា លោកអូបាម៉ាបានកោះប្រជុំក្រុមប្រឹក្សាសន្តិសុខជាតិ ដើម្បីពិចារណាពីសេណារីយ៉ូដែលគេត្រូវធ្វើ ក្នុងករណីមានអន្តរាគមន៍ទៅក្នុងទឹកដីអ៊ីរ៉ាក់។
សេណារីយ៉ូទាំងនោះរួមមាន ការវាយប្រហារទ័ពអាកាស ដោយប្រើយន្តហោះចម្បាំង ឬយន្តហោះឌ្រូន គ្មានមនុស្សបើក។ ការពង្រឹងជួយទាំងផ្នែកសម្ភារៈ និងយុទ្ធសាស្រ្តដល់កងទ័ពអ៊ីរ៉ាក់ ឬការសហការជាមួយអ៊ីរ៉ង់ ដើម្បីប្រយុទ្ធតបតនឹងក្រុមជីហាត។ យ៉ាងណាក៏ដោយ សេណារីយ៉ូខាងលើនៅតែបង្ហាញថា លោកអូបាម៉ានឹងមិនបញ្ជូនទ័ពអាមេរិកច្រើន ទៅធ្វើសង្រ្គាមនៅអ៊ីរ៉ាក់។
បក្សសាធារណរដ្ឋកំពុងបន្ទោសនយោបាយរារែករបស់លោកអូបាម៉ា។ អ្នកខ្លះហ៊ានទៅដល់និយាយថា នយោបាយរបស់លោកអូបាម៉ា អាចជាមូលហេតុមួយដែលជួយជំរុញលើកទឹកចិត្តឲ្យក្រុមជីហាតវិលត្រលប់មកធ្វើសង្រ្គាមនៅអ៊ីរ៉ាក់។ សូមរំលឹកថា នៅពេលលោកអូបាម៉ាប្រកាសដកទ័ពចេញពីអ៊ីរ៉ាក់ មានមនុស្សជាច្រើនមិនសូវគាំទ្រ ឬជំទាស់ ដោយសារគេយល់ថា ការដកទ័ពអាមេរិកចេញពីអ៊ីរ៉ាក់ ធ្វើឡើងដោយឆាប់រហ័ស និងមិនសមស្រប ឆ្លើយតប ទៅនឹងកាលៈទេសៈ អស្ថិរភាព ដែលកំពុងកើតមាននៅទូទាំងប្រទេសអ៊ីរ៉ាក់។
នៅពេលអាមេរិកដកទ័ពចេញ អ៊ីរ៉ាក់កំពុងជួបសង្រ្គាមបង្ហូរឈាម រវាងក្រុមនិកាយសាសនាពីរ គឺស៊ុននីត ដែលធ្លាប់ជាក្រុមបក្សពួករបស់លោកសាដាម ហ៊ូសេន និងក្រុមនិកាយស្ហីអ៊ីត ដែលជាគ្នីគ្នារបស់រដ្ឋាភិបាលអ៊ីរ៉ាក់បច្ចុប្បន្ន។ អំពើភេវរកម្ម ការបំផ្ទុះគ្រាប់បែកអត្តឃាតកើតមាន និងសម្លាប់មនុស្ស ជារៀងរាល់ថ្ងៃ នៅអ៊ីរ៉ាក់។
អាមេរិករបស់លោកអូបាម៉ាប្រកាសថា មុននឹងចាកចេញពីទឹកដីអ៊ីរ៉ាក់ អាមេរិកបានជួយបណ្តុះបណ្តាលទាហានអ៊ីរ៉ាក់រួចរាល់ហើយ ដើម្បីធានារក្សាសន្តិសុខនៅអ៊ីរ៉ាក់។ នៅអ៊ីរ៉ាក់ រដ្ឋាភិបាលបញ្ជាទៅលើទាហាន និងប៉ូលិសជាង ៨សែននាក់។ ចំនួននេះច្រើនណាស់បើប្រៀបធៀបនឹងពួកអ៊ីស្លាមជ្រុលនិយម ជីហាតដែលមានមិនដល់៦ម៉ឺននាក់ផង។ ប៉ុន្តែ សួរថា ហេតុអ្វីបានជាទាហានអ៊ីរ៉ាក់មិនអាចប្រយុទ្ធឈ្នះ ទល់នឹងក្រុមជីហាតទៅវិញ?
រឿងមួយដែលអាចជាកំហុសរបស់អាមេរិក គឺបន្ទាប់ពីបានផ្តួលរំលំអំណាចសាដាម ហ៊ូសេន អាមេរិកបានរំលាយចោលអស់ប្រព័ន្ធកងទ័ពអ៊ីរ៉ាក់ទាំងអស់ និងចាប់រើស បណ្តុះបណ្តាលកងទ័ពថ្មី។ ពួកកងទ័ពថ្មី ដែលអាមេរិកជួយបណ្តុះបណ្តាល នេះ ភាគច្រើនមានសមត្ថភាពមានកម្រិត គឺមិនដូចពួកកងទ័ពមុន ដែលមកពី និកាយស៊ុននីត និងដែលធ្លាប់ទទួលការហ្វឹកហាត់ខ្ពស់។ លើសពីនោះ ដោយសារអំពើពុករលួយក្នុងជួរកងទ័ព និងរដ្ឋាភិបាលអ៊ីរ៉ាក់ថ្មី កងទ័ពដែលមានសមត្ថភាព និងធ្លាប់ទទួលការបណ្តុះបណ្តាលពី អាមេរិកត្រូវគេទុកចោលគន្លៀតជញ្ជាំង មិនឲ្យតម្លៃ។ ក្រុមទាហានថ្មីៗ បើទោះបីជាមានចំនួនរាប់ម៉ឺន រាប់សែននាក់ ប៉ុន្តែ ប៉ុន្តែ ពួកគេមិនអាចស៊ូ ទប់ទល់នឹងការប្រយុទ្ធនឹងពួកជីហាតដែលមានចរិកហិង្សាបានទេ។ ដោយសារតែមើលឃើញការបាញ់សម្លាប់ឃោរឃៅរបស់ពួកជីហាត ពួកទាហានអ៊ីរ៉ាក់ ដែលនៅខ្វះបទពិសោធន៍ ខ្លាចស្លាប់ បានត្រឹមរត់ចោលសមរភូមិ ទមា្លក់អាវុធ រត់យករួចខ្លួនតែប៉ុណ្ណោះ។
មួយវិញទៀត ដែលពួកជីហាតអាចរំកិល វាយយកបានទីក្រុងជាច្រើនរបស់អ៊ីរ៉ាក់កន្លងមក នោះ ក៏ដោយសារតែកងទ័ពអ៊ីរ៉ាក់ នៅខ្វះធនធាន សព្វាវុធ ផ្នែកជើងអាកាស មិនអាចវាយប្រហារ ដើម្បីទប់ទល់ការរុលទៅមុខរបស់ពួកជីហាត។ កន្លងមក នៅក្នុងកិច្ចសន្យា អាមេរិកជួយពង្រឹងតែកងទ័ពអ៊ីរ៉ាក់ សម្រាប់ការពារសន្តិសុខក្នុងស្រុក ដោយទ័ពអាមេរិកជាអ្នកធានាសន្តិសុខជើងអាកាស នៅតាមព្រំដែនដើម្បីទប់ទល់នឹងអ៊ីរ៉ង់។ នេះអាចជាកំហុសឆ្គងមួយ របស់អាមេរិក ដែលមិនជួយពង្រឹងសមត្ថភាពទ័ពជើងអាកាសអ៊ីរ៉ាក់ រហូតបណ្តោយឲ្យពួកជីហាតសម្រុកចូលកាន់កាប់តំបន់ជាច្រើនរបស់អ៊ីរ៉ាក់។
ម្យ៉ាងទៀត បើទោះបីជាអាមេរិកសម្រេចជួយទ័ពអាកាសអ៊ីរ៉ាក់ និងវាយឈ្នះក្រុមជីហាត នៅពេលនេះ ក៏មិនអាចបញ្ជាក់ថា សង្រ្គាមបង្ហូរឈាមនៅអ៊ីរ៉ាក់នឹងត្រូវបញ្ចប់ដែរ។ ដរាបណាក្រុមនិកាយសាសនាទាំងពីរនៅតែបន្តឈ្លោះគ្នា នោះសង្រ្គាមកាប់សម្លាប់គ្នានៅតែមាននៅអ៊ីរ៉ាក់។ តាមអ្នកវិភាគខ្លះ អាមេរិកគួររកដំណោះស្រាយបង្រួបង្រួមក្រុមនិកាយកុំឲ្យឈ្លោះគ្នា ជាជាងចាំតែជួយអន្តរាគមយោធា ដែលអាចដោះស្រាយបញ្ហាបានតែមួយគ្រាៗបុណ្ណោះនោះ។
ពួកជីហាតនៅអ៊ីរ៉ាក់ជាក្រុមភេរវករដែលមានលុយច្រើនជាងគេ
ពួកជីហាត មកពីក្រុមអ៊ីស្លាមជ្រុលនិយម រដ្ឋអ៊ីស្លាមអ៊ីរ៉ាក់ និងឡឺវ៉ង់ដែលកំពុងប្រយុទ្ធនៅអ៊ីរ៉ាក់ ធ្លាប់បានទទួលលុយក្រាសក្រែលពីបុគ្គលឯកជន របស់ប្រទេសអារ៉ាប់ នៅសមុទ្រពែរ្ស។ ក្រុមជីហាតអ៊ីរ៉ាក់ ធ្លាប់បានប្រមូលលុយពីតំបន់ប្រេង ដែលខ្លួនវាយកាន់កាប់បាននៅក្នុងប្រទេសស៊ីរី និងបានលុយមកពីការជួយដូរខុសច្បាប់ និងការចាប់ជំរិត។
មន្រ្តីអាមេរិកបានអះអាងថា នៅមុនវាយដណ្តើមចូលទីក្រុងម៉ូសូល ក្រុមនេះមានលុយដល់ទៅជិត ៩០០លានដុល្លារ គឺបន្ទាប់ពី ប្លន់ធានាគារអ៊ីរ៉ាក់បានជាង៤០០លានដុល្លារ។ គេវាយតម្លៃថា ក្រុមជីហាតមកពីរដ្ឋអ៊ីស្លាមអ៊ីរ៉ាក់ និងឡឺវ៉ង់ជាក្រុមភេរវករដែលមានលុយច្រើនជាងក្រុមភេរវកម្មផ្សេងទៀត នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ