សិក្ខាសាលាជាស៊េរីស្តីពីការកសាងម៉ាកយីហោត្រូវធ្វើឡើងនៅថ្ងៃនេះ
ការកសាងម៉ាកយីហោកម្ពុជា និងវិធីកសាងម៉ាកយីហោ និងការធ្វើឲ្យសមស្របនៅក្នុងបរិបទទីផ្សារក្នុងស្រុក ត្រូវបានធ្វើឡើងនៅរសៀលថ្ងៃសុក្រ ទី ២៧មីនានេះ នៅឯវិទ្យាស្ថានជាតិអប់រំ ក្នុងរាជធានីភ្នំពេញ។ មនុស្សប្រមាណជាង ១ពាន់នាក់ដែលភាគច្រើនជាសិស្សនិស្សិតបានចួលរួមស្តាប់បទបង្ហាញពីលោករដ្ឋមន្ត្រីក្រសួងពាណិជ្ជកម្ម ស៊ុន ចាន់ថុល និងលោកស្រីស្រីCristinaBondolowskiអនុប្រធានផ្នែកទីផ្សារ របស់ក្រុមហ៊ុនកូកាកូទ្បា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ការកសាងម៉ាកយីហោផលិតផលកម្ពុជាសម្រាប់ទីផ្សារសកល បានក្លាយទៅជាកត្តាមួយដ៏មានសារៈសំខាន់បំផុត ខណៈពេលដែលកម្ពុជា ធ្វើសមាហរណកម្ម ចូលទៅក្នុងសហគមន៍សេដ្ឋកិច្ចអាស៊ានឆ្នាំ២០១៥ ។ លោកស៊ុន ចាន់ថុលបានលើកឡើងថា អ្វីដែលប្រជាជនកម្ពុជាត្រូវធ្វើនៅពេលនេះ គឺខិតខំធ្វើយ៉ាងណាដើម្បីឲ្យពិភពលោកស្គាល់កម្ពុជាឲ្យបានកាន់តែច្រើនហើយនិងច្បាស់។ ហើយដើម្បីឲ្យគេស្គាល់បានលុះត្រាណាតែយើងព្យាយាមបង្កើតម៉ាកយីហោឲ្យកម្ពុជា។
ទន្ទឹមគ្នានេះ លោករដ្ឋមន្ត្រីដែលប្តេជ្ញាលុបបំបាត់អំពើពុករលួយ និងខិតខំធ្វើកំណែទម្រង់ស៊ីជម្រៅនៅក្នុងនៅក្នុងស្ថាប័នរបស់ខ្លួននោះ ក៏បានលើកឡើងពីកិច្ចខិតខំប្រឹងប្រែងរបស់ក្រសួងពាណិជ្ជកម្ម ដើម្បីឆ្លើយតបទៅនឹងបញ្ហាប្រឈមនានា និងការផ្តល់នូវដំណោះស្រាយ ចំពោះការកសាងម៉ាកយីហោកម្ពុជា និងផលិតផលរបស់កម្ពុជា។
កិច្ចខិតខំប្រឹងប្រែងនេះត្រូវបានលោករដ្ឋមន្ត្រីលើកឡើងថា ក្រសួងបានស្តាប់រាល់បញ្ហានិងការលំបាកនានារបស់វិស័យឯកជន ហើយប្រមូលរាល់បញ្ហាទាំងអស់នោះយកទៅដោះស្រាយ ដែលជាផ្នែកមួយនៃការធ្វើកំណែទម្រង់ស៊ីជម្រៅផងដែរ។ ហើយក្រសួងក៏បានធ្វើការសិក្សាពីតំលៃទីផ្សារផលិតផលកសិកម្មនានានៅលើទីផ្សារអន្តរជាតិ ដើម្បីផ្តល់ជាព័ត៌មានទុកជាមុនសម្រាប់ប្រជាពលរដ្ឋកម្ពុជា កុំឲ្យចេះតែដាំដំណាំផ្អើលតាមគ្នា ហើយមិនបានគិតពីការប្រែប្រួលនៃតំលៃទីផ្សារ។
នៅចុងបញ្ចប់នៃសិក្ខាសាលាជាស៊េរីនេះ លោករដ្ឋមន្ត្រីក្រសួងពាណិជ្ជក៏បានបង្ហើបឲ្យដឹងដែរថា នៅក្នុងឆ្នាំ ២០១៥នេះ ក្រុមហ៊ុនកូកាកូឡានឹងបើករោងចក្រមួយនៅកម្ពុជា ជាមួយនិងទឹកប្រាក់វិនិយោគចំនួន ១០០លានដុល្លាអាមេរិក។ លោកបានបន្តថា ការសម្រេចចិត្តរបស់ក្រុមហ៊ុនកូកាកូឡានៅពេលនេះ នឹងផ្តល់ឱកាសការងារកាន់តែបន្ថែមទៀតដល់ប្រជាពលរដ្ឋខ្មែរ ហើយក៏បានបង្ហាញពីភាពជឿជាក់មកលើស្ថានភាពនយោបាយ និងការអភិវឌ្ឍន៍នៅកម្ពុជាផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ