អង្គការបរិស្ថាន WWF ចាត់ទុកថាឡាវកំពុងដាក់ជីវិតមេគង្គឲ្យប្រឈមនឹងភាពមហន្តរាយ
អង្គការបរិស្ថាន WWF នៅថ្ងៃព្រហស្បតិ៍៨វិច្ឆិកានេះ បានព្រមានថា ឆន្ទៈរបស់រដ្ឋាភិបាលឡាវក្នុងការបន្តការសាងសង់សំណង់ទំនប់វ៉ារីអគ្គិសនី សាយ៉ាបូរី ស្ថិតនៅភាគខាងជើងប្រទេសឡាវ ដែលពោរពេញដោយភាពចម្រូងចម្រាសនិងមានតម្លៃ ៣.៥០០ ពាន់លានដុល្លារអាមេរិក គឺជាការដាក់ធនធានជីវៈចម្រុះជលផលនិងការចិញ្ចឹមជីវិតរបស់ប្រជាជន ៦០ លាននាក់នៅក្នុងតំបន់មេគង្គទាំងមូលឲ្យប្រឈមទៅនឹងហានិភ័យដ៏ធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីប្រកាសព័ត៌មានរបស់អង្គការ WWF នៅថ្ងៃទី៨វិច្ឆិកានេះ បានលើកឡើងថា ទោះបីជាមានការប្រឆាំងជំទាស់យ៉ាងខ្លាំង ពីសំណាក់ប្រទេសជិតខាងនិងការលើកឡើងនូវក្តីបារម្ភ ដោយប្រតិភូដែលចូលរួមកិច្ចប្រជុំកំពូលអាស៊ី-អឺរ៉ុប លើកទី៩ ដែលធ្វើឡើងក្នុងសប្តាហ៍នេះ នៅក្នុងទីក្រុងវៀងច័ន្ទ ប្រទេសឡាវក៏ដោយ ក៏លោក វីរ៉ាផន វីរ៉ាវង្ស អនុរដ្ឋមន្រ្តីក្រសួងថាមពល និងរ៉ែ របស់ប្រទេសឡាវ បានប្រកាសថា ឡាវនឹងរៀបចំពិធីបើកការដ្ឋានសាងសង់ទំនប់ សាយ៉ាបូរី នៅទីតាំងទំនប់នៅថ្ងៃពុធទី៧ខែវិច្ឆិកាឆ្នាំ២០១២។
លោកបណ្ឌិត លី លីហ្វេង នាយកកម្មវិធីទឹកសាបនៃអង្គការ WWF បាននិយាយថា “ឡាវ ហាក់មានចេតនាបន្តការសាងសង់ ដោយមិនខ្វាយខ្វល់អំពីហានិភ័យនានា មុនពេលការសិក្សាស្តីពីហេតុផលប៉ះពាល់បញ្ចប់”។
សេចក្តីប្រកាសរបស់ WWF បង្ហាញថា នៅក្នុងខែមិថុនា ឆ្នាំ២០១០ ក្រុមហ៊ុនអគ្គិសនីឯកជន EGAT របស់ថៃ បានចុះកិច្ចព្រមព្រៀងជាមួយក្រុមហ៊ុន Ch. Kanrchang ដើម្បីទិញថាមពលអគ្គិសនីជាង ៩៥ ភាគរយ ដែលនឹងផលិតចេញពីទំនប់វារីអគ្គិសនី សាយ៉ាបូរី ហើយយ៉ាងហោចណាស់ មានធនាគារថៃ ចំនួន ៤ បានបង្ហាញចំណាប់អារម្មណ៍របស់ខ្លួន ក្នុងការផ្តល់ប្រាក់កម្ចី សម្រាប់ដំណើរការគម្រោងសាងសង់ទំនប់នេះ ទោះបីជាគម្រោងនេះ មានហេតុប៉ះពាល់បរិស្ថាន និងសង្គម និងភាពមិនច្បាស់លាស់ជុំវិញប្រាក់ចំណូល ដែលគម្រោងនេះ អាចរកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ