ប្រធានយុវជនសម រង្ស៊ីត្រៀមចូលតុលាការតាមដីកា
លោកសួង សុភ័ណ្ឌ ប្រធានចលនាយុវជនរបស់គណបក្សសម រង្ស៊ីនឹងចូលខ្លួនទៅតុលាការ នៅថ្ងៃទី៧ខែធ្នូសប្តាហ៍នេះ តាមការកោះហៅរបស់ព្រះរាជអាជ្ញាអមសាលាដំបូង។ លោកសួង សុភ័ណ្ឌថ្លែងថា លោកនឹងនាំយកភស្តុតាងទៅជាមួយដែលមានទាំងវីដេអូនៃជនរងគ្រោះនៅលើស្ពានកោះពេជ្រទៀតផង។ ដើមបណ្តឹងរូបនេះនឹងការពារខ្លួនឯង ដោយមិនចាំបាច់មានមេធាវី។
ចុះផ្សាយនៅថ្ងៃ៖
ស្តាប់ - ០១:៤៥
ដើមបណ្តឹងប្រឆាំងលោកនាយករដ្ឋមន្ត្រីហ៊ុន សែន ក្នុងសំណុំរឿងសោកនាដកម្មកោះពេជ្រនឹងចូលខ្លួនបង្ហាញភស្តុតាង នៅសាលាដំបូងនៅថ្ងៃសុក្រទី៧ខែធ្នូក្នុងសប្តាហ៍នេះ។ ដើមបណ្តឹងដែលជាប្រធានចលនាយុវជនគណបក្សសម រង្ស៊ី ឈ្មោះសួង សុភ័ណ្ឌបានអះអាងប្រាប់វិទ្យុបារាំងអន្តរជាតិនៅរសៀលថ្ងៃពុធនេះថា លោកនឹងចូលខ្លួនតាមដីកាកោះរបស់ព្រះរាជអាជ្ញារងសាលាដំបូងរាជធានីភ្នំពេញ។
លោកព្រះរាជអាជ្ញាសុខ រឿនបានចេញដីកា កាលពីថ្ងៃទី៣ខែធ្នូនេះ កោះហៅដើមបណ្តឹងសួង សុភ័ណ្ឌដើម្បីសាកសួរបន្ថែមអំពីបណ្តឹង និងបានស្នើអោយដើមបណ្តឹងយកឯកសារពាក់ព័ន្ធមកជាមួយផង។
លោកសួង សុភ័ណ្ឌបានបញ្ជាក់ថា លោកនឹងនាំយកភស្តុតាងនានាដែលបង្ហាញអំពីទីកន្លែង និងព្រឹត្តិការណ៍សោកនាដកម្មលើស្ពានពេជ្រ ដោយមានជាឯកសារវីដេអូផងទៅបង្ហាញលោកព្រះរាជអាជ្ញា ហើយថា លោកនឹងទៅតុលាការតែម្នាក់ដោយគ្មានទីប្រឹក្សាច្បាប់ ឬមេធាវីទៅជាមួយនោះទេ។ អតីតនិស្សិតច្បាប់រូបនេះអះអាងថា លោកនឹងប្រើប្រាស់ចំណេះដឹងផ្នែកច្បាប់ដើម្បីការពារខ្លួនឯងនៅតុលាការ។
គួររម្លឹកថា ប្រធានចលនាយុវជនគណបក្សសម រង្ស៊ី លោកសួង សុភ័ណ្ឌបានដាក់បណ្តឹងប្រឆាំងលោកនាយករដ្ឋមន្ត្រីអោយទទួលខុសត្រូវចំពោះព្រឹត្តិការណ៍កោះពេជ្រ ក្នុងឆ្នាំ២០១០ដែលបានធ្វើអោយមនុស្សស្លាប់ជាង៣៥០នាក់ និងរបួសប្រមាណ៤០០នាក់ផ្សេងទៀត។
ក្នុងសំណុំរឿងក្តីក្តាំនេះ តំណាងរាស្ត្រគណបក្សសម រង្ស៊ី លោកសុន ឆ័យបានថ្លែងបញ្ជាក់ថា នេះមិនមែនជាការផ្តួចផ្តើមគំនិតរបស់គណបក្សសម រង្ស៊ីទេ តែវាជាសិទ្ធិរបស់លោកសួង សុភ័ណ្ឌ។ ប្រមុខរដ្ឋាភិបាលកម្ពុជាវិញ បានប្រកាសហើយថា លោកនឹងប្តឹងបកប្រឆាំងយុវជនសួង សុភ័ណ្ឌវិញ ប្រសិនបើតុលាការរកមិនឃើញកំហុសរបស់លោកនោះ។ លោកនាយករដ្ឋន្ត្រីហ៊ុន សែនធ្លាប់បានឈ្នះក្តី តែរហូតមក លើបណ្តឹងរបស់លោកសម រង្ស៊ី និងលោកស្រីមូ សុខហួរដែលបានប្តឹងប្រឆាំងរូបលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ