អ៊ីរ៉ាក់បើកប្រតិបត្តិការវាយលុកយកក្រុងមូស៊ូលពីពួកជីហាតរដ្ឋអ៊ីស្លាម
ចុះផ្សាយនៅថ្ងៃ៖
ស្តាប់ - ០៦:៤៥
ក្រោយពីបានត្រៀមរៀបចំអស់ជាច្រើនខែ ប្រតិបត្តិការវាយលុកយកក្រុងមូស៊ូល ក្រុងទីពីររបស់អ៊ីរ៉ាក់ និងជាទីជង្រុកដ៏សំខាន់របស់ពួកជីហាតរដ្ឋអ៊ីស្លាមមកវិញ បានចាប់ផ្តើម។ នាយករដ្ឋមន្ត្រីអ៊ីរ៉ាក់ ជាអ្នកប្រកាសបើកយុទ្ធនាការនេះ ដោយផ្ទាល់ តាមកញ្ចក់ទូរទស្សន៍នៅយប់មិញ។ ជាប្រតិបត្តិការផ្តាច់ព្រ័ត្រក្នុងការប្រយុទ្ធប្រឆាំងនឹងពួកអង្គការរដ្ឋអ៊ីស្លាម ដែលមានភាពស្មុគស្មាញបំផុត។ គ្មាននរណាអាចទស្សន៍ទាយ បានឡើយ ថាតើទាហាននិងប៉ូលិសអ៊ីរ៉ាក់ ត្រូវការចំណាយពេលប៉ុណ្ណា និងកម្លាំងប៉ុណ្ណា ទើបអាចទម្លុះចូលដល់ក្នុងក្រុងកម្ចាត់ពួកជីហាតរដ្ឋអ៊ីស្លាមអស់ ហើយអាចគ្រប់គ្រងក្រុងបាន។
អ៊ីរ៉ាក់បានត្រៀមរៀបចំបើកប្រតិបត្តិការរំដោះខេត្តនីនីវ ដែលមានមូស៊ូលជាទីក្រុង តាំងពីខែមីនាមកម្ល៉េះ។ មូស៊ូលនេះ ជាទីក្រុងដ៏ធំសំខាន់ទីពីររបស់អ៊ីរ៉ាក់ សម្បូរទៅដោយធនធានធម្មជាតិ ជាពិសេសប្រេងកាត និងកប្បាស (កប្បាសសម្រាប់ផលិតក្រណាត់ប្រភេទមូសឺលីនដ៏ល្បីល្បាញ)។ មូស៊ូលជាក្រុងយុទ្ធសាស្ត្រ និងចិត្តសាស្ត្រ បានធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម នៅខែមិថុនា ឆ្នាំ២០១៤ តាមសម្រួល ព្រោះពេលនោះប្រជាពលរដ្ឋដែលភាគច្រើនជាអ្នកកាន់នីកាយស៊ុននីត មិនទុកចិត្តរដ្ឋាភិបាលក្រុងបាកដាត។ គឺពីទីក្រុងមូស៊ូលនេះតែម្តងដែលពួកអង្គការរដ្ឋអ៊ីស្លាម បានជ្រើសរើសធ្វើការស្វ័យប្រកាសជារដ្ឋកាលីហ្វា។ ប៉ុន្តែការបើកប្រតិបត្តិការត្រូវបានលើកពេលម្តងជាពីរដង ដោយសារ មានកងកម្លាំងទ័ពបរទេសច្រើនបក្សច្រើនពួក និយាយមិនត្រូវគ្នា និងដោយសារអ៊ីរ៉ាក់ខ្លួនឯងមានជម្លោះនយោបាយផ្ទៃក្នុង រវាងរដ្ឋាភិបាលនិងសភា។
ប្រតិបត្តិការយឺតយ៉ាវ
ប្រតិបត្តិការថ្ងៃនេះ ត្រូវបាននាយករដ្ឋមន្ត្រីអ៊ីរ៉ាក់ប្រកាសជាប្រតិបត្តិការជោគជ័យរំដោះមូស៊ូលពីអំពើហិង្សានិងពីកណ្តាប់ដៃពួកជីហាតរដ្ឋអ៊ីស្លាម។ ជាប្រតិបត្តិការយោធាដ៏ធំបំផុតមិនធ្លាប់មានគេគិតចាប់ពីឆ្នាំ២០០៣ ឆ្នាំដែលអាមេរិកចូលវាយលុកនៅអ៊ីរ៉ាក់មក។
អ្នកដែលចូលរួមក្នុងយុទ្ធនាការនេះមានច្រើនបក្សច្រើនក្រុមណាស់ ពោលគឺ យោធាអ៊ីរ៉ាក់ ឬកងកម្លាំងប្រយុទ្ធប្រឆាំងនឹងភេរវនិយម ប៉ូលិសសហព័ន្ធនិងប៉ូលិសតំបន់អ៊ីរ៉ាក់ យុទ្ធជនអ៊ីរ៉ាក់និកាយឈីអ៊ីត ដែលភាគច្រើនដើរតាមបញ្ជារបស់អ៊ីរ៉ង់ កងកម្លាំងគួដឌីស្ថាន តួកគី សហរដ្ឋអាមេរិក និងប្រទេសជាសមាជិកសម្ព័ន្ធមិត្តអន្តរជាតិ ...
កងកម្លាំងសម្ព័ន្ធមិត្តអន្តរជាតិដឹកនាំដោយសហរដ្ឋអាមេរិក ដែលធ្វើប្រតិបត្តិការផ្លូវអាកាស កងកម្លាំងទ័ពស្វ័យត្រាណអ៊ីរ៉ង់ ជាជំនួយកម្លាំងទ័ពថ្មើរជើង តាំងពីខែមីនាមកយោធាអ៊ីរាក់អាចរំកិលបន្តិចម្តងៗឆ្ពោះទៅក្រុងមូស៊ូល។ ចំណែកកងទ័ពគួដឌីស្ថានរំកិលចូលមូស៊ូលពីភាគខាងជើងមកវិញ។ ក្រៅអំពីក្រុមកម្លាំងទ័ពនេះ នៅមានទាហានតួកគីមួយក្រុមទៀត ដែលមានទីតាំងយោធាឈរជើងនៅជិតមូស៊ូលដែរ មានបំពាក់បំប៉នកម្លាំងទាហានអ៊ីរ៉ាក់និកាយស៊ុននីត ជាង២០០០នាក់ដែរ និងត្រូវបានរដ្ឋាភិបាលអ៊ីរ៉ាក់ចាត់ទុកជាទ័ពឈ្លានពាន។ ហើយបើតាមអ្នកជំនាញ វត្តមានកម្លាំងទ័ពជាមូលហេតុចំបងដែលធ្វើឱ្យប្រតិបត្តិការវាយលុកយកមូស៊ូលយឺតយ៉ាវ ព្រោះអ៊ីរ៉ាក់ ទាមទារឱ្យតួកគីដកទ័ពចេញ ឯអង់ការ៉ា ដាច់ខាតចង់ចូលជួយ ដោយខ្លាចពួកគួដឌីស្ថានឡើងកម្លាំង។
កងទ័ពនិងប៉ូលិសអ៊ីរ៉ាក់ចូលក្រុងមូស៊ូលម្នាក់ឯង
កងកម្លាំងទាហាននិងប៉ូលិសរដ្ឋាភិបាលអ៊ីរ៉ាក់ អាចរំពឹងលើកម្លាំងសម្ព័ន្ធមិត្តអន្តរជាតិ ដែលធ្វើការវាយប្រហារតាមអាកាសជាការបើកផ្លូវ និងមានទាហានអាមេរិក៤៦០០នាក់ ក្នុង៦០០នាក់ទើបបញ្ជូនមកបន្ថែម។ ចំណែកកងទ័ពគួដឌីស្ថានអ៊ីរ៉ាក់ តួកគី អ៊ីរ៉ង់ ត្រូវបញ្ឈប់សកម្មភាពត្រឹមមាត់ច្រកចូលក្រុងមូស៊ូល។ នាយករដ្ឋមន្ត្រីអ៊ីរ៉ាក់ បានប្រកាសយ៉ាងក្តែងៗ និងដាច់ណាត់ ថាមានតែកងទ័ពនិងប៉ូលិសរបស់រដ្ឋាភិបាលអ៊ីរ៉ាក់តែមួយគត់ដែលអនុញ្ញាតឱ្យចូលទៅប្រយុទ្ធបោសសម្អាត នៅក្នុងក្រុងមូស៊ូល។ ការធ្វើយ៉ាងនេះ ដើម្បីកំរិតកុំឱ្យមានការប៉ះទង្គិចបែបសហគមន៍រវាងកងកម្លាំងកាន់និកាយខុសគ្នាផង និងដើម្បីកុំឱ្យមានការហែកហួរមូស៊ូល ដណ្តើមឥទ្ធិពលគ្នាផង។
ប្រតិបត្តិការចំណាយពេលវែង និងវិបត្តិមនុស្សធម៌
នៅពេលប្រតិបត្តិការវាយលុកបានចូលទៅក្រុង ក្នុងដំណាក់កាលនោះ ការវាយប្រហារនឹងត្រូវប្រឈមគ្នាស្ទើរទល់មុខ ត្រូវវាយពីមួយផ្លូវទៅមួយផ្លូវ ទល់នឹងពួកទាហានជីហាតរដ្ឋអ៊ីស្លាម ដែលមានគ្នាប្រមាណពី ៣ពាន់ ទៅបួនពាន់ប្រាំរយនាក់។ នេះបើតាមការប៉ាន់ស្មានរបស់សម្ព័ន្ធអន្តរជាតិ។ ប្រភពខ្លះទៀត ថាមានដល់ទៅ ៩ពាន់នាក់។
បើតាមតាកទិចកន្លងមក ដែលទាហានអ៊ីរ៉ាក់ធ្លាប់ធ្វើ និងវាយឈ្នះអង្គការរដ្ឋអ៊ីស្លាមយកក្រុងទីគ្រីត កាលពីខែមីនា២០១៥ និងរ៉ាម៉ាឌី នៅខែកុម្ភៈ២០១៦ នោះគឺឡោមព័ទ្ធក្រុង ហើយបញ្ជូនទ័ពដៃឆើតឱ្យដើរជួរមុខក្នុងសមរភូមិ។ ប៉ុន្តែមុននឹងអាចចូលដល់ក្រុង កងទ័ពអ៊ីរ៉ាក់ត្រូវកម្ចាត់និងយកឈ្នះលើពួកជីហាត ដែលឈរជើងការពារក្រុងមូស៊ូលតាំងពីរាប់សិបគីឡូម៉ែត្រមុន។ ដោយសារតែពួកជីហាតរដ្ឋអ៊ីស្លាមត្រួតត្រាមូស៊ូលអស់ជាងពីរឆ្នាំ មានពេលត្រៀមប្រយុទ្ធ ពួកគេប្រើកម្លាំងស្នាព័រ បំផ្ទុះរថយន្ត ដាក់មីនបង្អាក់ដំណើររុលទៅមុខរបស់ទាហាននិងប៉ូលិសអ៊ីរ៉ាក់។ ប្រជាពលរដ្ឋស៊ីវិលអាចនឹងត្រូវពួកជីហាតយកមកប្រើខែលការពារផង។
ហេតុដូច្នេះហើយ បានជាចំណោទទាក់ទងនឹងបញ្ហាមនុស្សធម៌កំពុងចោទខ្លាំង។ ព្រោះគេមិនដឹងថាតើប្រតិបត្តិការនេះអាចអូសបន្លាយពេលយូរប៉ុណ្ណា តើប្រជាពលរដ្ឋស៊ីវិលជាងមួយលាននាក់កន្លះ អាចនឹងបញ្ចេញប្រតិកម្មបះបោរយ៉ាងណា រត់ទៅណា។ អង្គការសហប្រជាជាតិបានបង្ហាញក្តីព្រួយបារម្ភមុនគេ និងព្យាករអំពីវិបត្តិមនុស្សធម៌ដ៏ធ្ងន់ធ្ងរ។ លោក ពូទីន ប្រធានាធិបតី រុស្ស៊ី បានចំអកថាលោកសង្ឃឹមលើអាមេរិកនិងសម្ព័ន្ធមិត្តក្នុងការខិតខំប្រឹងប្រែងខ្ពស់មិនឱ្យប៉ះពាល់ដល់ជីវិតជនស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ