ទស្សនកិច្ចរបស់ប្រមុខរដ្ឋអាល្លឺម៉ង់នៅភូមិ Oradour ជានិមិត្តរូបនៃការផ្សះផ្សារវាងអាល្លឺម៉ង់ និងបារំាង
ចុះផ្សាយនៅថ្ងៃ៖
ស្តាប់ - ០៥:០៤
នៅថ្ងៃពុធ ទី៤ កញ្ញានេះ លោកប្រធានាធិបតីបារំាង François Hollande និងលោកប្រធានាធិបតីអាល្លឺម៉ង់ Joachim Gauck បានធ្វើដំណើររួមគ្នាទៅកាន់ភូមិ Oradour-sur-Glane ស្ថិតប៉ែកកណ្តាលប្រទេសបារំាង។ គឺនៅក្នុងភូមិនោះឯងដែលកាលពីថ្ងៃទី១០ មិថុនា ឆ្នំា ១៩៤៤ មានកើតឡើងនូវព្រឹត្តិការណ៍សម្លាប់រង្គាលលើអ្នកភូមិទំាងអស់ដោយកងទ័ពអាល្លឺម៉ង់ណាហ្ស៊ី។ ទស្សនកិច្ចរបស់ប្រមុខរដ្ឋអាល្លឺម៉ង់នៅភូមិ Oradour គឺជានិមិត្តនៃការផ្សះផ្សារវាងអាល្លឺម៉ង់ និងបារំាងក្រោមអតីតកាលយ៉ាងជូរចត់។
Oradour គឺជាភូមិមួយដែលមានចម្ងាយប្រមាណជា ២០គីឡូម៉ែត្រពីខេត្ត Limoges ស្ថិតប៉ែកកណ្តាលប្រទេសបារំាង។ កាលពី ៦៩ឆ្នំាមុន ពោលនៅថ្ងៃទី១០ មិថុនា ឆ្នំា ១៩៤៤ មានអ្នកភូមិ Oradour ចំនួន ៦៤២នាក់ ក្នុងនោះមានកូនក្មេងក្រោមអាយុ ១៥ឆ្នំាចំនួន ២០៥នាក់ត្រូវបានកងទ័ពអាល្លឺម៉ង់ណាហ្ស៊ីសម្លាប់ចោលក្នុងរយៈពេលតែមួយថ្ងៃ គឺនៅថ្ងៃទី១០ មិថុនា ឆ្នំា ១៩៤៤។ តាមគម្រោង កងទ័ពអាល្លឺម៉ង់ណាហ្ស៊ីគ្រោងសម្លាប់អ្នកភូមិ Oradour ទំាងអស់ ដោយមិនរើសមុខ តែសំណាងល្អមានអ្នករត់រួចខ្លួន និងរស់រានមានជីវិតមកដល់សព្វថ្ងៃចំនួន ៦នាក់។
នៅរសៀលថ្ងៃទី១០ មិថុនា ឆ្នំា ១៩៤៤ ក្នុងអំឡុងសង្រ្គាមលោកលើកទី២ មានទ័ពអាល្លឺម៉ង់ណាហ្ស៊ីពី ១២០ ទៅ ២០០នាក់បានព័ទ្ធជុំវិញភូមិ Oradour ដោយបានអំពាវនាវឲ្យអ្នកភូមិទំាងអស់ ក្មេងចាស់ ប្រុសស្រីប្រមូលផ្តុំគ្នានៅលើទីលានមួយ ក្រោមលេសថា ត្រួតពិនិត្យក្រដាសស្នាម។ ការប្រមូលផ្តុំត្រូវបានចែកជាពីរក្រុម គឺក្រុមបុរស និងក្រុមស្រ្តី រួមជាមួយកូនក្មេង។ នៅពេលជួបជុំគ្នាអស់ហើយ ទ័ពអាល្លឺម៉ង់ណាហ្ស៊ីក៏ផ្តើមធ្វើការបាញ់រះទៅហ្វូងបុរស រួចយកសាកសពទៅគរលើគ្នាកប់ក្រោមចម្បើងដើម្បីដុតចោល។ សំណាងល្អនាពេលនោះ មានបុរស ៥នាក់បានរត់រួចខ្លួន។ ព្រមពេលជាមួយគ្នានោះ ទាហានអាល្លឺម៉ង់ណាហ្ស៊ីមួយក្រុមទៀតក៏បានផ្តើមសម្លាប់ស្រ្តី និងកូនក្មេងដែលប្រមូលផ្តុំគ្នានៅក្នុងវិហារមួយបិទជិត ដោយបញ្ចូលឧស្ម័នហ្គាសទៅខាងក្នុង រួចអុជភ្លើងដុតទំាងរស់។ សំណាងល្អ មានស្រ្តីម្នាក់បានរត់គេចខ្លួនរួចតាមបង្អួច។
ព្រឹត្តិការណ៍នៅភូមី Oradour បានកើតមានឡើង ៤ថ្ងៃ បន្ទាប់ពីកម្លំាងទ័ពអាមេរិកបានឡើងគោកនៅ Normandie ក្នុងប្រទេសបារំាងដើម្បីជួយវាយបណ្តេញទ័ពអាល្លឺម៉ង់ណាហ្ស៊ីឈ្លានពានចេញពីបារំាង ក៏ដូចជាប្រទេសអឺរ៉ុបផ្សេងទៀតផង។ បច្ចុប្បន្ន ភូមិ Oradour គ្មានមនុស្សរស់នៅ និងដែលត្រូវបានគេចាត់ទុកជាកន្លែងដែលមានការសម្លាប់រង្គាលលើជនស៊ីវិលច្រើនជាងគេនៅក្នុងប្រទេសបារំាង ដោយទាហានអាល្លឺម៉ង់ណាហ្ស៊ី។
តំាងពីក្រោយការបិទបញ្ចប់សង្រ្គាមលោកមក បារំាង និងអាល្លឺម៉ង់បានព្យាយាមជាបង្រួបបង្រួមគ្នាថ្មី។ ជាក់ស្តែង និមិត្តរូបនៃការកាន់ដៃគ្នារវាងលោកអតីតប្រធានាធិបតីបារំាង François Mitterrand និងលោកអតីតប្រមុខរដ្ឋាភិបាលអាល្លឺម៉ង់ Helmut Khol កាលពីថ្ងៃទី២៥ កញ្ញា ឆ្នំា ១៩៨៤។ កាលណោះ គឺក្នុងឱកាសពិធីរម្លឹកវិញ្ញាណក្ខន្ធទាហានបាត់បង់ជីវិតក្នុងសម័យសង្រ្គាមលោកនៅឯកន្លែងបញ្ចុះសព Douaumont ក្នុងប្រទេសបារំាង។ ដៃកាន់ដៃរវាងលោក Mitterrand និងលោក Kohl ពេលនោះ ត្រូវបានគេចាត់ទុកជាកាយវិការយ៉ាងសំខាន់មួយនៃទសវត្សនៃការបង្រួបប្រង្រួមរវាងបារំាង និងអាល្លឺម៉ង់។
ទស្សនកិច្ចជាប្រវត្តិសាស្រ្តរបស់ប្រមុខរដ្ឋអាល្លឺម៉ង់នៅភូមិ Oradour
តំាងពីក្រោយព្រឹត្តិការណ៍សម្លាប់រង្គាលនៅភូមិ Oradour ដោយទាហានអាល្លឺម៉ង់ណាហ្ស៊ីកាលពី ៦៩ឆ្នំាមុនមក នេះជាលើកទីមួយបង្អស់ដែលមានរូបប្រធានាធិបតីអាល្លឺម៉ង់ម្នាក់បានដាក់ជើងជាន់លើភូមិ Oradour។ ភូមិ Oradour ដែលត្រូវបានបារំាងរក្សាទុកនូវទិដ្ឋភាពដើមតំាងពីពេលនោះរហូតមកដល់សព្វថ្ងៃ និងថែមទំាងបានចុះក្នុងបញ្ជីបូជនីស្ថានប្រវត្តិសាស្រ្តតំាងពីឆ្នំា ១៩៤៥។
គឺលោកប្រធានាធិបតីបារំាងដែលជាអ្នកផ្តួចផ្តើមគំនិតអញ្ជើញលោកប្រធានាធិបតីអាល្លឺម៉ង់ឲ្យទៅទស្សនាភូមិ Oradour។ លោកប្រមុខរដ្ឋអាល្លឺម៉ង់ក៏បានយល់ព្រម និងថែមបានពន្យល់បកស្រាយថា ដំណើរទៅកាន់ភូមិ Oradour ពេលនេះ គឺជាសក្ខីកម្មមួយដែលលោកចង់បង្ហាញពីភាពខុសគ្នារវាងប្រទេសអាល្លឺម៉ង់ដែលលោកតំណាងឲ្យនាពេលនេះ និងប្រទេសអាល្លឺម៉ង់ក្នុងជំនាន់អ៊ីត្លែរ។
ដូច្នេះគេអាចនិយាយបានថា ទោះបីជាលោកប្រធានាធិបតីអាល្លឺម៉ង់បានព្យាយាមពន្យល់បកស្រាយពីភាពខុសគ្នារវាងប្រទេសអាល្លឺម៉ង់បច្ចុប្បន្ន និងប្រទេសអាល្លឺម៉ង់ក្នុងអាតីតកាលក៏ដោយ ក៏វាជាសក្ខីកម្មមួយដែលបញ្ជាក់ពីការទទួលខុសត្រូវ និងការទទួលស្គាល់នូវទង្វើសម្លាប់រង្គាលលើពលរដ្ឋបារំាងពីសំណាក់ទាហានអាល្លឺម៉ង់កាលពី ៦៩ឆ្នំាមុនដែរ។
ម្យ៉ាងទៀត ដំណើរទស្សនកិច្ចលើកទីមួយរបស់លោកប្រមុខរដ្ឋអាល្លឺម៉ង់នៅ ភូមិ Oradour នាពេលនេះ ក៏ជាសក្ខីកម្មមួយដែលបញ្ជាក់ពីការបើកទំព័រសករាជថ្មីនៃការផ្សះផ្សា និងការបង្រួបបង្រួមរវាងបារំាង អាល្លឺម៉ង់ក្រោមអាតីតកាលដ៏ល្វីងជួរចត់។ ទីក្រុងប៊ែរឡំាង និងទីក្រុងប៉ារីសសុទ្ធតែបានប្តេជ្ញាចិត្តរៀងខ្លួនថា គេពិតជាមិនអាចបំភ្លេចរឿងអាតីតកាលបានឡើយ អាតីតកាលនៅតែជាអាតីតកាល តែអាល្លឺម៉ង់ និងបារំាងចំាបាច់ត្រូវតែកសាងអនាគតកាលរួមគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ