តើអ្វីជាកម្មវិធីXKeyscoreដែលទីភ្នាក់ងារNSA ប្រើដើម្បីលួចយកព័ត៌មានពីអ្នកប្រើប្រាស់អ៊ីនធ័រណេត
ចុះផ្សាយនៅថ្ងៃ៖
ស្តាប់ - ០៥:២៥
យុវជនEdward Snowden អតីតបុគ្គលិក បម្រើការឲ្យទីភ្នាក់ងារNSA បានទទួលសិទ្ធិជ្រកកោន មួយឆ្នាំនៅរស្ស៊ី កាលពីចុងសប្តាហ៍មុននេះ។ ក្នុងទឹកដីរុស្ស៊ី Snowden បានរួចផុតពីការតាមចាប់របស់អាជ្ញាធរអាមេរិកដែលបានចោទរូបគេ ពីបទឧក្រិដ្ឋ លួចបញ្ចេញឯកសារសម្ងាត់របស់រដ្ឋាភិបាលទៅឲ្យអ្នកកាសែត។ ឯកសារដែល Snowdenបញ្ចេញទៅឲ្យកាសែតអង់គ្លេសThe Guardian បានបង្ហាញ ពីមួយថ្ងៃ ទៅមួយថ្ងៃ នូវយុទ្ធសាស្រ្តរបស់ទីភ្នាក់ងារសន្តិសុខអាមេរិក ក្នុងការប្រមូលលួចយកព័ត៌មានពីអ្នកប្រើប្រាស់អ៊ីនធ័រណេតក្នុងពិភពលោក។
ដោយហ៊ានចេញមុខផ្ចាញ់រដ្ឋាភិបាលរបស់ប្រទេសមហាអំណាចអាមេរិក យុវជន Edward Snowdenបានបូជាសេរីភាព និងអត្តសញ្ញាណជាតិអាមេរិកាំងរបស់ខ្លួន។ បន្ទាប់ពីលួចបញ្ចេញព័ត៌មានសម្ងាត់ទាក់ទងនឹងការលួចស្តាប់យកការណ៍សម្ងាត់របស់រដ្ឋាភិបាលពីប្រជាជនអាមេរិក Edward Snowdenបានរត់គេចពីប្រទេសកំណើត និងសឹងតែរកកន្លែងជ្រកមិនបាន ដោយសារតែការប្រម៉ាញ់របស់ក្រុមភ្នាក់ងារសម្ងាត់អាមេរិក។ ប្រសិនបើអាជ្ញាធររុស្ស៊ីមិនផ្តល់សិទ្ធិជ្រកកោនបណ្តោះអាសន្នទេ នោះ Edward Snowdenប្រាកដជាត្រូវធ្លាក់ក្នុងសំណាញ់ច្បាប់របស់អាមេរិក ដែលរង់ចាំកាត់ទោសយុវជន Edward Snowdenដែលរដ្ឋាភិបាលបានចាត់ទុកជាជនក្បត់ជាតិ។
ការប្រថុយគ្រោះថ្នាក់របស់យុវជនអាមេរិកាំងរូបនេះ ពិតជាមានន័យ។ ដោយសារតែឯកសារសម្ងាត់ដែល Snowdenបានលួចបញ្ចេញទៅឲ្យអ្នកកាសែត មនុស្សនៅក្នុងពិភពលោក ជាពិសេសអ្នកប្រើប្រាស់អ៊ីនធ័រណេត ឬអ្នកប្រើទូរស័ព្ទ បានដឹង ថា ពួកគេមិនអាចលាក់កំបាំងអ្វីពីភ្នែករបស់អាមេរិកបានទេ។ និយាយដោយសាមញ្ញ គឺគ្មានអ្វីដែលអាចជាការណ៍សម្ងាត់សម្រាប់ទីភ្នាក់ងារអាមេរិក។ តាមរយៈ ការទម្លាយឯកសារសម្ងាត់របស់ Snowden គេបានឃើញច្បាស់ពីមុខមាត់ពិតរបស់ប្រទេសមហាអំណាចដូចជាអាមេរិក។ ជាការពិត ប្រទេសណាក៏មានទីភ្នាក់ងារ ឬឧបករណ៍ស៊ើបការសម្ងាត់ដែរ។ ប៉ុន្តែ អាមេរិក ក្នុងនាមជាប្រទេសមហាអំណាច មានសមត្ថភាព និងបច្ចេកវិទ្យា ដ៏វិសេសវិសាលជាងគេ ក្នុងការប្រមូលលួចស្តាប់យកការណ៍។
ឧទាហរណ៍ជាក់ស្តែង នៅក្នុងការចុះផ្សាយលើកមុនៗរបស់កាសែត The Guardian យើងបានដឹងថា ទីភ្នាក់ងារសន្តិសុខអាមេរិកបានប្រើប្រាស់កម្មវិធីPrisme ដើម្បីលួចស្តាប់ទូរស័ព្ទរបស់ប្រជាជនអាមេរិក។ កាលពីចុងសប្តាហ៍ កាសែត អង់គ្លេស The Guardian បានចេញផ្សាយឯកសារសម្ងាត់មួយទៀត ដែលបង្ហាញពីកម្មវិធីជ្រើសរើស និងវិភាគទិន្នន័យដែលទីភ្នាក់ងារសន្តិសុខNSA បានប្រមូលទុក នោះគឺកម្មវិធី XKeyscore។ តើកម្មវិធីXKeyscoreជាអ្វី?
គេបានដឹងថា កម្មវិធី Xkeyscore មានរូបរាងតាំងពីយូរហើយ ប៉ុន្តែ គេប្រហែលជាមិនបានដឹងពីដំណើរការរបស់វា ឬសមត្ថភាពរបស់វាកម្រិតណាទេ។ នៅទីស្នាក់ការកណ្តាលរបស់ទីភ្នាក់ងារសន្តិសុខជាតិអាមេរិក អ្នកវិភាគព័ត៌មានប្រើកម្មវិធី Xkeyscore ដើម្បីចូលទៅរុករកព័ត៌មានលម្អិត ដែលគេលាក់កំបាំង នៅក្នុងវិបសៃតិ៍។ កម្មវិធី Xkeyscoreក៏អាចជួយឲ្យមន្រ្តីស៊ើបការណ៍សម្ងាត់អាមេរិកចូលមើលខ្លឹមសារ នៅក្នុងសារអេឡិចត្រូនិក ដោយមិនចាំបាច់ត្រូវការឈ្មោះ ឬពាក្យសម្ងាត់។ លើសពីនោះ គេប្រើកម្មវិធី Xkeyscoreដើម្បីចូលមើលសារ ដែលគេសរសេរឆ្លងឆ្លើយគ្នា ជាលក្ខណៈឯកជននៅក្នុងបណ្តាញសង្គមFacebook។ នៅត្រង់ចំណុចនេះ អ្នកទទួលខុសត្រូវម្នាក់របស់Facebook នៅប្រទេសបារាំងបានបដិសេធថា គេមិនអាចចូលមើលសារសម្ងាត់ ជាលក្ខណៈឯកជននៅក្នុងFacebook ដោយសេរីបានទេ។ ក្រុមហ៊ុនអនុញ្ញាតឲ្យមន្រ្តី អាមេរិកចូលមើលទិន្នន័យរបស់ខ្លួន តែក្នុងលក្ខខណ្ឌណាដែលមានដីកាពីតុលាការតែប៉ុណ្ណោះ។
ទោះបីជាក្រុមហ៊ុនFacebook អះអាងថា គេមិនអាចចូលមើលសារសម្ងាត់ នៅក្នុងបណ្តាញសង្គមបាន ប៉ុន្តែ បើមើលទៅលើឯកសារដែលពន្យល់យ៉ាងលម្អិតពីសមត្ថភាពរបស់កម្មវិធី Xkeyscore នោះ គឺគ្មានអ្វីជាអាថ៌កំបាំងសម្រាប់អាជ្ញាធរអាមេរិកាំង។ និយាយឲ្យចំ កម្មវិធី Xkeyscoreគឺដូចជាវិបសៃត៍Google ដែលជាប្រព័ន្ធរុករកព័ត៌មាន នៅក្នុងអ៊ីនធ័រណេត យ៉ាងដូច្នេះដែរ។ ប៉ុន្តែ គ្រាន់តែថា Xkeyscoreគឺជាប្រព័ន្ធរុករកព័ត៌មានផ្នែកចារកម្ម។ កម្មវិធី Xkeyscore គឺជាឧបករណ៍ដែលច្រោះព័ត៌មាន ជួយឲ្យគេវែករកព័ត៌មាន ឬទិន្នន័យសង្ស័យនានា ដែល បន្ទាប់មក នឹងអនុញ្ញាត ឲ្យក្រុមស៊ើបការណ៍សម្ងាត់ធ្វើការវិភាគ។ គេអាចរកក្រុមភេរវករ ឬរកឃើញសកម្មភាពទាំងឡាយណាដែលមានលក្ខណៈមិនធម្មតា។ ឧទាហរណ៍ ដូចជា ការនិយាយភាសារបស់មនុស្សម្នាក់ មិនស៊ីសង្វាក់គ្នានឹងតំបន់ដែលគេស្ថិតនៅ ឬលិខិតដែលសរសេរដោយអក្សរ ឬសញ្ញាសម្ងាត់ ដែលគេដាក់នៅក្នុងអ៊ីនធ័រណេតជាដើម។
កម្មវិធី Xkeyscore ស័ក្តិសិទ្ធិខ្លាំងណាស់ ដែលធ្វើឲ្យគេបានទទួលព័ត៌មានស៊ីជម្រៅទាក់ទងនឹងបុគ្គលម្នាក់ ក្រុមអង្គការណាមួយ។ គេគ្រាន់តែតែសរសេរថា បង្ហាញខ្ញុំរាល់ឈ្មោះអ្នកផ្គត់ផ្គង់បណ្តាញអ៊ីនធ័រណេត ដែលធានាសុវត្ថិភាពសិទ្ធិឯកជន ក្នុងប្រទេសមួយ ឬបង្ហាញខ្ញុំរាល់ទិន្នន័យ ដែលអាចឲ្យខ្ញុំបំបែកយល់បាន និងរកឃើញឈ្មោះ ម្ចាស់អ្នកប្រើប្រាស់អ៊ីនធ័រណេត ប៉ុណ្ណេះ កម្មវិធីនឹងស្វែងរក និងផ្តល់ចម្លើយបានភ្លាមៗ។
ការស្រាវជ្រាវដ៏ស៊ីជម្រៅ និងដ៏លម្អិតនេះហើយ ដែលធ្វើឲ្យរកបានឯកសារទាំងឡាយណាដែលទាក់ទងនឹងអូសាម៉ា បិនឡាដិន។ បើតាមទីភ្នាក់ងារ សន្តិសុខជាតិ NSA គេចាប់បានភេរវករប្រមាណ៣០០នាក់ ដោយសារតែកម្មវិធី Xkeyscore។ នៅក្នុងលិខិតមួយផ្ញើទៅកាសែត The Guardian NSAបានបញ្ជាក់ថា គេប្រើកម្មវិធីសម្រាប់តែការរុករកពិសេសមួយចំនួន ក្នុងបេសកកម្មច្បាស់លាស់មួយ ប៉ុន្តែ មិនដោយសេរីទេ។ មិនមែនមនុស្សទាំងអស់សុទ្ធតែមានសិទ្ធិចូលប្រើកម្មវិធី Xkeyscoreនេះដែរ។ ដូច្នេះ ការចុះផ្សាយកន្លងមក ដែលថា កម្មវិធី Xkeyscoreប្រើដើម្បីលួចយកស្តាប់ជីវិតឯកជនរបស់ប្រជាជនអាមេរិកាំង នោះ គឺជារឿងមិនពិត។ មួយវិញទៀត ទីភ្នាក់ងារNSA អះអាងថា គេប្រើកម្មវិធី Xkeyscore សម្រាប់ប្រឆាំងតែគោលដៅណា ដែលជាក្រុមជនបរទេស ពោល គឺដើម្បីការពារជាតិ និងប្រយោជន៍របស់ប្រជាជនអាមេរិកាំង និងសម្ព័ន្ធមិត្តរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ