អាមេរិកប្រកាសអាសន្នពីគម្រោងធ្វើភេរវកម្មរបស់ក្រុមអាល់កៃដា
ចុះផ្សាយនៅថ្ងៃ៖
ស្តាប់ - ០៧:១៨
កាលពីថ្ងៃសុក្រទី ២ សីហា រដ្ឋាភិបាលអាមេរិកបានចេញសេចក្តីប្រកាសអាសន្ន ដែលថា នឹងអាចមានអំពើភេរវកម្ម របស់ក្រុមអាល់កៃដា នៅក្នុងពិភពលោក។ កាលពីមួយថ្ងៃមុន គឺថ្ងៃព្រហស្បតិ៍ ទី ១ សីហា អាមេរិកទើបបានប្រកាសបិទទ្វារស្ថានទូត និងកុលស៊ុលរបស់ខ្លួន ដែលមាន នៅក្នុងពិភពលអារ៉ាប់ ចំនួន ១៤ នៅថ្ងៃអាទិត្យទី៤ សីហានេះ។ អាមេរិក អង់គ្លេស អាល្លម៉ង់ បានប្រកាសបិទស្ថានទូតរបស់ខ្លួន នៅក្នុងប្រទេសយេម៉ែន ដោយហេតុផលសន្តិសុខ។
កាលពីថ្ងៃព្រហស្បតិ៍ ក្នុងមូលហេតុសន្តិសុខរបស់មន្រ្តីស្ថានទូតអាមេរិក នៅបរទេស ក្រសួងការបរទេសអាមេរិកគ្រាន់តែបញ្ជាឲ្យគេបិទស្ថានទូត អាមេរិក ចំនួន ១៤ ដែលតាមទម្លាប់បើកទ្វារ ធ្វើការ នៅថ្ងៃអាទិត្យ នៅក្នុងប្រទេសអារ៉ាប់។ ត្រូវដឹងថា នៅប្រទេសអារ៉ាប់ ថ្ងៃអាទិត្យ ជាថ្ងៃធ្វើការដំបូងនៃសប្តាហ៍។
ប៉ុន្តែ ទើបតែថ្ងៃសុក្រម្សិលមិញ ដែលក្រសួងការបរទេសប្រកាសបន្ថែមថា នឹងអាចមានការវាយប្រហារ ធ្វើភេរវកម្ម របស់ក្រុមអាល់កៃដា នៅក្នុងដើមបូព៌ា និងនៅអាហ្រ្វិកខាងជើង។ ដូច្នេះ នៅក្នុងពិភពអារ៉ាប់ ស្ថានទូតអាមេរិកមិនត្រឹមតែបិទទ្វារប៉ុណ្ណោះទេ ប៉ុន្តែ កម្រិតការពារសន្តិសុខបានកើនឡើងទ្វេថែមទៀត។ ដើម្បីសន្តិសុខដដែល អាមេរិកគ្រោងនឹងពន្យារបិទទ្វាស្ថានទូតរបស់ខ្លួន មួយរយៈ គឺមិនមែនត្រឹមតែថ្ងៃចុងសប្តាហ៍នេះទេ។
ការដែលអាមេរិកហ៊ានចេញសញ្ញាប្រកាសអាសន្ននៅពេលនេះ គឺដោយសារតែមន្ទីរបញ្ចកោណបានទទួលព័ត៌មានដ៏គួរឲ្យជឿជាក់ ច្បាស់ និងមិនក្លែងបន្លំ។ នោះគឺទីភ្នាក់ងារស៊ើបការណ៍សម្ងាត់អាមេរិក បានចាប់បានសំឡេងសន្ទនារបស់ក្រុមមេដឹកនាំអាល់កៃដា និងបណ្តាញរបស់ខ្លួន ដែលនិយាយពីសកម្មភាពរៀបចំគម្រោងវាយប្រហារទៅលើអាមេរិក។ តាមមន្រ្តីអាមេរិកដែលសុំមិនបញ្ចេញឈ្មោះ ព័ត៌មានគឺគួរឲ្យជឿជាក់ ព្រោះគេតាមដានឃើញថា កិច្ចសន្ទនាស្តីពីការរៀបចំផែនការធ្វើភេរវកម្មបានកើតមានជាប់មិនដាច់។
មួយវិញទៀត ប្រមុខដឹកនាំក្រុមអាល់កៃដា ថ្មី បន្ទាប់ពីអូសាម៉ា បិនឡាដិន ដែលជាជនជាតិអេហ្ស៊ីប ទើបតែបានប្រកាសអំពាវនាវ កាលពីថ្ងៃម្សិលមិញ ឲ្យប្រជាជនកាន់សាសនាអ៊ីស្លាមនៅអេហ្ស៊ីបងើបប្រឆាំងនឹងអាមេរិក ដែលគេចោទថា ជាអ្នកនៅពីក្រោយកងទ័ពដើម្បីទម្លាក់លោកប្រធានាធិបតីម៉រស៊ី។
តាមក្រសួងការបរទេសអាមេរិក សញ្ញាប្រកាសអាសន្ននឹងមានសុពលភាពរហូតដល់ចុងខែសីហា ពោលគឺអំពើភេរវកម្មវាយប្រហារបស់ក្រុមអាល់កៃដា នឹងមានគ្រប់ពេលវេលា ចាប់ពីចុងសប្តាហ៍នេះ រហូតដល់ចុងខែ។ មន្រ្តីអាមេរិកមិនបានបញ្ជាក់ពីថ្ងៃពិតប្រាកដ ឬទីកន្លែងណាដែលនឹងអាចរងអំពើភេរវកម្មរបស់ក្រុមអាល់កៃដាទេ ប៉ុន្តែ គេគ្រាន់តែបញ្ជាក់ថា មធ្យោបាយធ្វើដំណើរសាធារណៈ និងកន្លែងសំបូរអ្នកទេសចរ គឺជាគោលដៅវាយប្រហាររបស់ក្រុមអាល់កៃដា។ ហើយអំពើភេរវកម្មវាយប្រហារលើប្រយោជន៍អាមេរិកាំង នឹងអាចរាលដាល ចេញពីតំបន់អារ៉ាប់ និងអាហ្វ្រិក នេះទៅទៀត។
បើតាមអាមេរិក លទ្ធភាពធ្វើភេរវកម្មរបស់ក្រុមអាល់កៃដា តែងតែកើតមានច្រើន នៅក្នុងពេលជិតអាមេរិកប្រារព្ធខួបថ្ងៃភេរវកម្ម១១កញ្ញា។ តាមអ្នកជំនាញអំពើភេរវកម្មវិញ គម្រោងវាយប្រហាររបស់ក្រុមអាល់កៃដានឹងអាចកើតមានច្រើន នៅក្នុងថ្ងៃបិទបញ្ចប់បុណ្យសាសនារ៉ាម៉ាដង់របស់ប្រជាជនអ៊ីស្លាម ដែលត្រូវធ្វើនៅចុងសប្តាហ៍ក្រោយ។ គេតែងតែខ្លាច បារម្ភ ព្រោះថា នៅពេលចប់បុណ្យសាសនារ៉ាម៉ាដង់ បាតុកម្មតវ៉ារបស់ក្រុមអ៊ីស្លាមតែងតែងពុះកញ្រ្ចោលខ្លាំងប្រឆាំងនឹងអាមេរិក។
ក្នុងបទពិសោធន៍ជាក់ស្តែង កាលពីឆ្នាំមុន អំពើភេរវកម្មវាយប្រហារស្ថានទូតអាមេរិក នៅទីក្រុងBengaziរបស់លីប៊ីបានកើតមាន នៅក្រោយបាតុកម្មតវ៉ារបស់ប្រជាជនអ៊ីស្លាម ប្រឆាំងនឹងកុនអាមេរិកមួយ ដែល បណ្តុះបង្អាប់ព្រះមូហាមេដរបស់ពួកអ៊ីស្លាម។ នៅមុនបាតុកម្ម លើកនោះ អាមេរិកបានប្រកាសអាសន្នម្តងហើយ ស្តីពីភេរវកម្មដែលអាចកើតមានជាយថាហេតុ។ មន្រ្តីស៊ើបការណ៍CIA ក៏មានគ្នីគ្នាជាច្រើន នាក់ ប៉ុន្តែ គេនៅតែមិនអាចទប់ស្កាត់អំពើភេរវកម្មវាយប្រហារទៅលើស្ថានទូត ដែលកាលនោះ បានសម្លាប់ឯកអគ្គរដ្ឋទូតអាមេរិក និងមន្រ្តីអាមេរិកបីនាក់ផ្សេងទៀត។
អាមេរិកមិនសូវមានប្រជាប្រិយភាពប៉ុន្មានទេ នៅក្នុងបណ្តាប្រទេសអារ៉ាប់ ដែលជាអ្នកកាន់សាសនាអ៊ីស្លាម។ អាមេរិកបានបង្កើតសត្រូវច្រើនជាងមិត្តនៅដើមបូព៌ា ជាពិសេសជាមួយនឹងពួកអ៊ីស្លាម ក្រុមអ៊ីស្លាមជ្រុលនិយម ដែលគាំទ្រ ដោយបណ្តាញអាល់កៃដា។ នៅយ៉េមែន យន្តហោះDronesរបស់អាមេរិកបានសម្លាប់មេដឹកនាំទីពីររបស់អាល់កៃដា កាលពីដើមឆ្នាំនេះ។ ស្ថានភាពប្រកាសអាសន្នខ្ពស់ជាងគេ នៅយេម៉ែន ហើយស្ថានទូតរបស់ប្រទេសបី អាមេរិក អង់គ្លេស និងអាល្លឺម៉ង់ បានប្រកាសបិទទ្វារ នៅថ្ងៃអាទិត្យ និងថ្ងៃចន្ទ ដើម្បីហេតុផលសន្តិសុខ។
យោងទៅតាមច្បាប់ រដ្ឋាភិបាលអាមេរិកចាំបាច់ ត្រូវប្រកាសអាសន្ន និងចែករំលែកព័ត៌មានជាមួយប្រជាជនអាមេរិក ស្តីពីគម្រោងធ្វើភេរវកម្មនានា។ គោលនយោបាយនេះ មានចាប់តាំងពីឆ្នាំ ១៩៨៨ បន្ទាប់ពីមានអំពើភេរវកម្ម វាយប្រហារយន្តហោះ នៅLockebie ក្នុងប្រទេសស្កុតឡែន ដែលអ្នកដំណើរស្លាប់ភាគច្រើន ជាជនជាតិអាមេរិកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ