ភាគច្រើនជាបុរស ការស្រមុក មិនមែនជាអាការៈធ្ងន់ធ្ងរទេ សម្រាប់បុគ្គលផ្ទាល់ បើនិយាយពីខាងជំងឺរោគា តែជាការរំខានខ្លាំង សម្រាប់អ្នកគេងក្បែរ។ គ្មានទេថ្នាំព្យាបាលជាលក្ខណៈសកល មានតែដំណោះស្រាយមួយគ្រាៗ ខ្លះក៏មានប្រសិទ្ធិភាពខ្លាំង ខ្លះក៏គ្មាន។ នៅសប្តាហ៍នេះ អ្នកស្រាវជ្រាវជាតិប្រេស៊ីលម្នាក់ បានរកឃើញវិធីហាត់ប្រាណអណ្តាត ដែលអាចកាត់បន្ថយចំនួន ស្រមុកបាន៣៦% និងកម្លាំងស្នូរស្រមុកបាន៥៩%។ តើលោកអ្នកនាងចាប់អារម្មណ៍នឹងលំហាត់ប្រាណនេះទេ? នេះជាឱកាសមួយដែល អៀង សុខម៉ិញ សូមជម្រាបជូនអ្នកនាងអំពី មូលហេតុដែលនាំឱ្យមនុស្សគេងស្រមុក និងវិធីងាយមួយចំនួនសម្រាប់ទប់ស្កាត់ការស្រមុក។
ស្នូរស្រមុកលាន់ខ្លាំងអាចមានកំរិតដល់ទៅ ១០០ដេស៊ីប៊ែល ពោលគឺស្មើនឹងសំឡេងម៉ាស៊ីនកាត់ស្មៅ ឬម៉ាស៊ីនឡានធំ។ ស្រមុកជាប្រធានបទនៃការកំប្លែងលេងសើចរវាងមិត្តភក្តិ តែជាក្តីរំខានបំផុតប្តីប្រពន្ធ និងជាពិសេសមានមនុស្សម្នាច្រើនណាស់ មានបញ្ហាស្រមុកនេះ (ជិត៤០%)។ ថ្វីបើការស្រមុកភាគច្រើន ជាអាការៈមិនធ្ងន់ធ្ងរ តែសម្រាប់ក្រុមគ្រូពេទ្យ ស្រមុក ដោយថប់ ឬ ស្ទះខ្យល់ដង្ហើម ត្រូវការការព្យាបាលជាចាំបាច់។ បើតាមកាយវិភាគវិទ្យា មានករណីមិនធម្មតាកើតឡើងទើបមនុស្សដេកស្រមុក។ ស្រមុកគឺជារោគសញ្ញាដំបូងនៃបញ្ហាចរន្តដង្ហើម។ នេះបើតាមវេជ្ជបណ្ឌិត Gérard Vincent ឯកទេសវះកាត់ធ្មេញ ដែលសរសេរសៀវភៅមួយមានចំណងជើង បញ្ចប់ការស្រមុក “En finir avec le ronflement”។
ហេតុអ្វីបានជាយើងដេកស្រមុក ?
លាន់ស្នូរស្រមុក បណ្តាលមកពីផ្លូវដង្ហើមនៅត្រង់បំពង់ត្រូវត្អៀប ឬរួមតូច។ ក្នុងពេលលង់លក់ សាច់នៅចុងក្រអូមមាត់ កន្លើត អណ្តាត រលា។ ដូច្នេះបើសរីរាង្គណាមួយរីក-លាធំ សរីរាង្គនោះអាចជាឧបសគ្គបាំងស្ទះផ្លូវដង្ហើមបាន។ ហើយនៅពេលដកដង្ហើមចេញចូល ឆ្លងកាត់ វានឹងធ្វើឱ្យជាលិកាត្រង់កន្លែងនោះញ័ររង្គើ ទើបបង្កជាសំឡេង ដែលយើងហៅថាស្រមុកនេះឯង។ បញ្ហាស្រមុកនេះមានទំនាក់ទំនងយ៉ាងខ្លាំងនឹងទម្ងន់មាឌមនុស្សធាត់។ ជួនកាល ការទទួលទានសុរាច្រើននៅពេលបាយល្ងាចច្រើនពេក ឬការលេបថ្នាំគេងលក់ ក៏អាចជាភ្នាក់ងារបង្កឱ្យគេងស្រមុកដែរ ព្រោះស្រានិងថ្នាំលេងលក់ អាចពន្លារសាច់ដុំ ខ្លាំងជ្រុល។ សម្រាប់កុមារ មានដុះសាច់បំពង់កធំ amygdale ក៏ជានាំឱ្យគេងទៅស្រមុកដែរ។
តើមានសញ្ញាអ្វីគួរប្រុងប្រយ័ត្ន ?
ស្រមុកមានច្រើនប្រភេទ ! ស្រមុកម្តងម្កាល មិនសូវលាន់ខ្លាំង ច្រើនតែបង្កឡើងដោយកត្តាខាងក្រៅមួយចំនួន ដែលគេងាយរកឃើញនិងកំណត់បាន ព្រមទាំងអាចចៀសវាងបាន មានជាអាទិ៍ អាការៈផ្តាសាយ ជក់បារី ផឹកសុរា។ ស្រមុកព្រោះមូលហេតុនេះ មិនចាំបាច់មានការព្យាបាល ឬការពិគ្រោះជាមួយគ្រូពេទ្យទេ។
ស្រមុកខ្លាំង និងជាលក្ខណៈជំងឺ គឺជាផលវិបាកនៃគ្រោងកាយមនុស្សពីកំណើត ដូចជា មានឆ្អឹងថ្គាមតូចពេក អណ្តាតធំ ឬក៏មានភាពមិនប្រក្រតីនៃប្រព័ន្ធរាងកាយណា ក្រៅអំពីប្រព័ន្ធដកដង្ហើម។
ត្រូវបែងចែងឱ្យដាច់ រវាងការស្រមុករបស់មនុស្សម្នាក់ ព្រោះតែគាត់មានបញ្ហាដង្ហើម ពិបាកដកតាមច្រមុះ និងអ្នកដែលស្រមុកព្រោះខ្យល់ដង្ហើមត្រូវស្ទះនៅម្តុំបំពង់ខ្យល់។ នេះបើតាមការពន្យល់របស់វេជ្ជបណ្ឌិត ហ្សេរ៉ា វ៉ាំងសង់។ ក្នុងករណីទីមួយ គេសង្កេតមានក្នុងចំណោមអ្នកស្រមុកតែប្រមាណ១០%ប៉ុណ្ណោះ។ សំឡេងស្រមុកលាន់ចេញឡើង ដោយសារតែភាពញ័រនៃចុងក្រអូមមាត់លើ ពេល ខ្យល់ដង្ហើមឆ្លងកាត់ទៅប៉ះ។ អាការៈនេះ អាចព្យាបាលជា តែតម្រូវឱ្យអ្នកស្រមុកទៅជួបពិគ្រោះជាមួយគ្រូពេទ្យឯកទេសច្រមុះត្រចៀកបំពង់ក។ អ្នកមិនអាចដកដង្ហើមតាមច្រមុះបានស្រួល ជួនកាលអ្នកមានបញ្ហារលាកច្រមុះរ៉ាំរ៉ៃ។
ចំពោះករណីស្រមុកនៅបំពង់ខ្យល់វិញ អ្នកនឹងមានអារម្មណ៍ហត់ពេលភ្ញាក់ពីដំណេក ឈឺក្បាល វិបត្តិលិង្គ ការឡើងសម្ពាធឈាម ... ឬក៏ថប់-ស្ទះដង្ហើមពេលគេងផងក៏មាន។ ដូច្នេះត្រូវទៅពិគ្រោះជំងឺជាមួយគ្រួពេទ្យឯកទេសផ្នែកដំណេក (ឯកទេសសួត ឬបេះដូង) ដើម្បីវិភាគសញ្ញារោគ។
ដូច្នេះតើគួរឱ្យព្រួយបារម្ភខ្លាំងទេ ?
ការស្រមុក ភាគច្រើន គ្មានផ្តល់ផលវិបាកអ្វីទៅថ្ងៃក្រោយទេ។ ប៉ុន្តែ គួរតែមានការតាមដានជាចាំបាច់ ចំពោះករណីស្រមុកនៅបំពង់ខ្យល់ ក្រែងមានការថប់ដង្ហើមពេលគេង។ ភ្លាមៗ គ្មានការបន្សល់ទុកនូវផលវិបាកនៃការថប់ដង្ហើមញយៗបែបនេះទេ ក្រៅពីធ្វើឱ្យអ្នកគេងមិនស្កប់ លក់រលីវៗហើយ ត្រូវកន្ទ្រាក់ភ្ញាក់ក្រញាងឡើង នៅពេលគេង។ ហើយនៅពេលថ្ងៃ មានអារម្មណ៍គេងមិនឆ្អែត មិនពេញភ្នែក។ ប៉ុន្តែនៅថ្ងៃអនាគត និងសម្រាប់រយៈពេលយូរ វិបត្តិស្រមុករហូតថប់ដង្ហើម ស្ទះខ្យល់ ប្រមាណតែ១០វិនាទីម្តងនេះ ប្រសិនបើ អាចលេចឡើង ជាច្រើនដងក្នុងមួយយប់ៗ នឹងធ្វើឱ្យខ្លួនប្រាណខ្វះខ្យល់អុកស៊ីសែន ដូច្នេះយើងអាចមានគ្រោះកើតជំងឺបេះដូង ជំងឺលើសឈាម ឬជំងឺស្ទះសរសៃឈាមបេះដូង និងរំខានដល់ប្រព័ន្ធសរសៃឈាមបេះដូងទាំងមូល។
តើត្រូវព្យាបាលយ៉ាងដូចម្តេច ?
ចំពោះការស្រមុកដោយពិបាកដកដង្ហើមតាមច្រមុះ វិធីព្យាបាលមានលក្ខណៈងាយស្រួលទេ និងសម្រេចបានដោយវេជ្ជបណ្ឌិតឯកទេសច្រមុះត្រចៀកបំពង់ក។ តែបើជាការស្រមុកដល់ស្ទះបំពង់ខ្យល់ផង ពេលខ្លះគេអាចជ្រើសរើសវិធីសាស្ត្រធ្ងន់ធ្ងរគឺការវះកាត់ពង្រីកបំពង់ខ្យល់ បង្រួមសាច់ដុំនៅផ្លូវដង្ហើម ឬតម្រង់ច្រមុះ ឬពាក់ម៉ាស៊ីនជួយដកដង្ហើម ដែលរំខានខ្លាំងពេលគេង។
ជាលក្ខណៈទូទៅ ចៀសវាងការទទួលទានសុរានៅពេលបាយល្ងាច និងគេងផ្ងា។ សូមសម្រកទម្ងន់ និងគេងផ្អៀង ដើម្បីឱ្យកុំឱ្យអណ្តាតធ្លាក់ទៅបាំងបំពង់ខ្យល់ ជាហេតុនាំមានភាពញ័រនៅបំពង់ខ្យល់រួចបញ្ចេញជាសំឡេងស្រមុក ...
គ្រប់មធ្យោបាយដែលរៀបរាប់មកនេះ អាចជួយកាត់បន្ថយការស្រមុកបាន ប៉ុន្តែគ្មានដំណោះស្រាយជាលក្ខណៈសកលឡើយ។
នៅពេលថ្មីៗនេះ អ្នកស្រាវជ្រាវជាតិប្រេស៊ីល បានរកឃើញវិធីធ្វើលំហាត់ប្រាណអណ្តាត ដែលអាចកាត់បន្ថយការស្រមុកបានប្រមាណ៣៦% និងបើនៅស្រមុក ក៏សំឡេងលែងសូវលាន់ខ្លាំង និងថយចុះអស់៥៦%។ លំហាត់ប្រាណនេះប្រសិទ្ធិភាពចំពោះអ្នកស្រមុកខ្សោយ មធ្យម និងខ្លាំង ដែលរហូតមានការថប់ដង្ហើមពេលគេងលក់ ម្តងម្កាលផង។
មិនបាច់មានសម្លៀកបំពាក់កីឡា ស្បែកជើងអ្វីទាំងអស់ ! ប្រសិនបើអ្នកគេងស្រមុក សូមចំណាយពេលវេលាពីរបីនាទី ជារៀងរាល់ព្រឹក ហាត់ពត់អណ្តាត និងក្រអូមមាត់ ៖
- យកចុងអណ្តាតទៅទល់នឹងក្រអូមមាត់លើ រួចរំកិលអណ្តាតបន្តិចម្តងៗឱ្យទៅទល់នឹងគល់ក្រអូប ហើយរក្សាជំហរបែបនេះមួយស្របក់
- លាអណ្តាតទល់នឹងពេញផ្ទៃក្រអូមលើ រួចសង្កត់អណ្តាតទាំងមូល
- ប្រឹងធ្វើគល់អណ្តាតឱ្យឡើងរឹងទល់នឹងបំពង់ក តែត្រូវឱ្យអណ្តាតនៅប៉ះ ធ្មេញជានិច្ច
- រុញគល់អណ្តាតឱ្យប៉ះខាងលើគល់ក្រអូម រួចទន្ទេញពាក្យ “អា” ឱ្យបានញយដង។
លំហាត់នេះត្រូវធ្វើជាប្រចាំរាល់ថ្ងៃ ជាច្រើនខែទើបទទួលបានលទ្ធផលល្អ។
ហេតុអ្វីត្រូវគិតគូរព្យាបាលការស្រមុក ?
អ្នកដែលស្រមុកខ្លាំង ស្រមុកស្ទើរជាប់ឈ្មោះជាជំងឺ ភ្ញាក់ឡើងគ្មានកម្លាំងទេ ! ចេះតែងងុយពេលថ្ងៃ ចង់លក់ម្តងៗទាំងកណ្តាលថ្ងៃ។ គេងមិនឆ្អែត មិនពេញ ផ្តល់ផលវិបាកច្រើនដល់យន្តការសិក្សា និងការចងចាំ អារម្មណ៍ ស្ត្រេស អត្រាជាតិស្ករក្នុងឈាម អាយុ និងជំងឺសរសៃឈាមបេះដូង គ្រោះថ្នាក់ចរាចរណ៍ នៅកន្លែងធ្វើការ ព្រមទាំងធ្វើឱ្យឡើងទម្ងន់។ អ្នកស្រមុកមែនទែន មិនដែលបានគេងលក់ដល់ដំណាក់ស៊ុបខ្លាំងទេ ! ការលក់ស៊ុបខ្លាំងគឺជាដំណាក់កាលនៃការផលិតជាតិអ័រមូន IGF ដែលជាអ្នកចូលរួមចំណែកយ៉ាងខ្លាំង ខាងការលូតលាស់របស់កុមារ និងជាអ្នកដុតខ្លាញ់កុំឱ្យកកខ្លាំងក្នុងខ្លួនមនុស្សពេញវ័យ។ ការធាត់ជ្រុល ងាយនឹងប្ងកឱ្យមានការថប់ដង្ហើមពេលគេង ផ្ទុយទៅវិញ គេត្រូវព្យាបាលការថប់ដង្ហើមពេលគេងសិន ប្រសិនបើចង់បញ្ចុះទម្ងន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ