លោក ហ៊ុន សែន បបួលលោកសម រង្ស៊ី ស្បថ
រដ្ឋសភាជាតិនៅថ្ងៃចន្ទ ទី៨ មិថុនានេះបើកកិច្ចប្រជុំបន្តដើម្បីអនុម័តទៅលើច្បាប់ស្តីពីគ្រោះមហន្តរាយ។ ប៉ុន្តែនៅក្នុងកិច្ចប្រជុំនេះ លោកនាយករដ្ឋមន្ត្រីហ៊ុន សែនបានប្រតិកម្មខ្លាំងៗចំពោះការលើកឡើងរបស់តំណាងរាស្ត្រគណបក្សសង្គ្រោះជាតិដែលបានលើកឡើងពីបញ្ហាព្រំដែន ការលួចបន្លំសន្លឹកឆ្នោត របស់បក្សអំណាចនិង ការប្រកាន់បក្ខពូករបស់កាកបាទក្រហមជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
នេះជាការលើកឡើងរបស់លោកនាយករដ្ឋមន្ត្រីហ៊ុន សែន ដែលបានប្រតិកម្មខ្លាំងឆ្លើយតបការលើកឡើងរបស់តំណាងរាស្ត្រគណបក្សសង្គ្រោះជាតិលោក លឹម គឹមយ៉ា។ តំណាងរាស្ត្រមណ្ឌលកំពង់ធំរូបនេះ បានលើកឡើងនៅក្នុងសភាថា រដ្ឋាភិបាលគណបក្សប្រជាជនកម្ពុជាបានប្រើប្រាស់ផែនទីក្លែងក្លាយក្នុងសំណុំរឿងព្រំដែនជាមួយប្រទេសវៀតណាម និងការប្រកាន់បក្ខពួកពេលចែកអំណោយពីកាកបាទក្រហមកម្ពុជាដែលមានភរិយាលោកនាយករដ្ឋមន្ត្រីជាប្រធាន។ លោកលឹម គឹមយ៉ា ដដែល បានបន្ថែមថា បច្ចុប្បន្នកម្ពុជាត្រូវការសុំការអនុញ្ញាតិពីប្រទេសវៀតណាមដើម្បីនាំផលិតផលចេញទៅក្រៅប្រទេសតាមរយៈផ្លូវសមុទ្រជាដើម។ ប្រមុខបក្សកាន់អំណាច បានហៅការលើកឡើងនេះ ជាការលាបព័ណ៌នយោបាយ និងកេងចំណេញពីគណបក្សប្រឆាំង។
បន្ថែមពីលើនេះ លោកនាយករដ្ឋមន្ត្រីហ៊ុន សែន បានស្នើឱ្យផ្សព្វផ្សាយឡើងវិញពីការបកស្រាយរបស់លោកស្តីពីបញ្ហាព្រំដែនរយៈ៥ម៉ោងនៅសភា។ ប្រតិកម្មឆ្លើយតបរបស់លោកនាយករដ្ឋមន្ត្រីនេះ គឺធ្វើឡើងនៅអំឡុងពេលដែលសភាបានបើកកិច្ចប្រជុំពិភាក្សាបន្តស្តីពីការគ្រប់គ្រងគ្រោះមហន្តរាយ។ ច្បាប់នេះមាន១០ ជំពូក និង៤៧មាត្រា។ ជាច្បាប់ដែលនឹងកំណត់អំពីការគ្រប់គ្រងគ្រោះមហន្តរាយប្រកបដោយប្រសិទ្ធភាពទៅលើការត្រៀមបង្ការ បន្ស៊ាំការកាត់បន្ថយគ្រោះមហន្តរាយ និងការសង្គ្រោះបន្ទាន់ រួមទាំងការស្តារឡើងវិញក្រោយគ្រោះមហន្តរាយ។ យ៉ាងណាក៏ដោយច្បាប់គ្រប់គ្រងគ្រោះមហន្តរាយនេះ បានត្រូវបានរដ្ឋសភាជាតិអនុមត័រួចហើយនៅព្រឹកថ្ងៃចន្ទទី០៨ មិថុនានេះ។
សូមបញ្ជាក់ថា ក្រោយប្រតិកម្មខ្លាំងចំពោះការលើកឡើងរបស់តំណាងរាស្ត្របក្សប្រឆាំងលោកហ៊ុន សែន បានឈរជជែកគ្នាដោយបិទទ្វាក្នុងសភា ប្រមាណជាង១០នាទីបន្ថែមទៀត ជាមួយតំណាងរាស្ត្របក្សប្រឆាំងចំនួនជិត១០រូបបន្ថែមទៀត មុននឹងសភាបន្តការអនុម័តច្បាប់បញ្ចប់។
លោកយឹម សុវណ្ណ អ្នកនាំពាក្យគណបក្សសង្គ្រោះជាតិ មិនអត្ថាធិប្បាយយ៉ាងណានោះទេ ចំពោះការបបួលស្បថពីប្រមុខរដ្ឋាភិបាលស្តីពីបញ្ហាព្រំដែន ការលួចបន្លំសន្លឹកឆ្នោត ដោយលោកបញ្ជាក់ថា ទុកឱ្យលោកសម រង្ស៊ីជាអ្នកសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ