CNRP ថា លោកស្រី មួរ សុខហួរ ចាកចេញពីប្រទេសដោយសារការភ័យខ្លាច
កាលពីម្សិលមិញ អនុប្រធានគណបក្សប្រឆាំងម្នាក់ គឺលោកស្រី មួរ សុខហួរ បានចាកចេញពីប្រទេសកម្ពុជា។ នៅថ្ងៃពុធនេះ មន្ដ្រីជាន់ខ្ពស់គណបក្សសង្គ្រោះជាតិ អះអាងប្រាប់វិទ្យុបារាំងអន្តរជាតិថា លោកស្រី មួរ សុខហួរ ចាកចេញពីប្រទេសដោយសារតែលោកស្រីភ័យខ្លាច ក្រោយពីបានឮការព្រមានរបស់លោកនាយករដ្ឋមន្ដ្រី ហ៊ុន សែន ដែលថា នឹងចាត់វិធានការទៅលើមន្ដ្រីបក្សប្រឆាំងបន្ថែម ទៀត ទាក់ទងនឹងករណីលោក កឹម សុខា។ យ៉ាងណាក៏ដោយ បើតាមក្រសួងមហាផ្ទៃ អាជ្ញាធរគ្មានផែនការចាប់ខ្លួនអនុប្រធានបក្សប្រឆាំងនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
អត្ថបទដោយ៖ អ៊ឹង ប៊ុនថន
តំណាងរាស្ត្របក្សសង្រ្គោះជាតិ លោក ម៉ៅ មុនីវណ្ណ បានប្រាប់វិទ្យុបារាំងអន្តរជាតិ RFI នៅថ្ងៃពុធនេះថា ការចាកចេញរបស់លោកស្រី សុខហួរ ទៅប្រទេសថៃ គឺដោយសារតែការភ័យខ្លាចពីការគំរាមកំហែង។ បើតាម លោក ម៉ៅ មុនីវណ្ណ ការចាកចេញរបស់លោកស្រី សុខហួរ ធ្វើឡើងជាលក្ខណៈបុគ្គលប៉ុណ្ណោះ មិនមែនគណបក្សបញ្ជូនចេញឡើយ។
លោកស្រី មួរ សុខហួរ នៅថ្ងៃអង្គារ បានប្រាប់សារព័ត៌មាន REUTERS ថា សមត្ថកិច្ចមានផែនការចាប់ខ្លួនលោកស្រី ទាក់ទងនឹងករណីលោក កឹម សុខា។ ប៉ុន្តែលោក ខៀវ សុភ័គ អ្នកនាំពាក្យក្រសួងមហាផ្ទៃ បានអះអាងថា សមត្ថកិច្ចមិនបានគំរាមចាប់ខ្លួន លោកស្រី មួរ សុខហួរ ឡើយ។ ការចាប់ខ្លួនណាមួយអាចធ្វើទៅបើ លុះណាតែសមត្ថកិច្ចទទួលបានភ្លើងខៀវពីតុលាការជាមុនសិន។ នេះបើតាមលោក ខៀវ សុភ័គ។
ជាការកត់សម្គាល់ ក្រៅពីលោកស្រី មួរ សុខហួរ មន្ដ្រីជាន់ខ្ពស់សំខាន់ៗរបស់គណបក្សសង្គ្រោះជាតិជាច្រើនរូបទៀត ក៏កំពុងតែមានវត្តមាននៅក្រៅប្រទេសដែរ។ ក្នុងនោះមួយចំនួនបានបំពេញបេសកម្មនៅក្រៅប្រទេសតាំងពីមុនពេលមានការចាប់ខ្លួនលោក កឹម សុខា និងមួយចំនួនបានចាកចេញក្រោយមានព្រឹត្តិការណ៍នេះកើតឡើង។
តំណាងរាស្ត្របក្សសង្រ្គោះជាតិដែលនៅក្រៅប្រទេសរួមមាន លោក អេង ឆៃអ៊ាង លោក យឹម សុវណ្ណ លោក ងឹម ញ៉េង និងព្រះអង្គម្ចាស់ស៊ីសុវត្ថិ ធម្មិកោ ដែលបំពេញបេសកកម្ម នៅសហរដ្ឋអាមេរិក។
ចំណែក លោក ញ៉យ ចំរើន លោកស្រី ជូឡុង សួមូរ៉ា លោក ម៉ែន សុថាវរិន្ត្រ បំពេញបេសកកម្មនៅសហគមន៍អឺរ៉ុប ខណៈលោក អ៊ូ ច័ន្ទឫទ្ធិ លោក ហូរ វ៉ាន់ និងលោក យ៉ែម បុញ្ញឫទ្ធិ ត្រូវបានមន្ដ្រីគណបក្សកាន់អំណាចបង្ហើបថា កំពុងរត់គេចខ្លួន។
រីឯកូនស្រីលោក កឹម សុខា ទាំង ២ រូបគឺកញ្ញា កឹម មនោវិទ្យា និងកញ្ញា កឹម សម្មាធីតា រួមទាំងប្រធានក្រុមយុវជនគណបក្សសង្គ្រោះជាតិលោក ហ៊ីង សុខសាន្ត បានចាកចេញពីកម្ពុជាភ្លាមៗ ក្រោយការចាប់ខ្លួន លោក កឹម សុខា និងក្រោយពីរងការគំរាមថានឹងចាប់ខ្លួនពាក់ព័ន្ធនឹងសំណុំរឿងលោក កឹម សុខា។
គណបក្សសង្រ្គោះជាតិ បានអំពាវនាវឲ្យតំណាងរាស្ត្រដែលកំពុងនៅក្រៅប្រទេសវិលចូលស្រុកវិញ ព្រោះវត្តមានរបស់អ្នកតំណាងរាស្ត្រទាំងអស់នេះ គឺមានសារសំខាន់ណាស់ ក្នុងការជួយជម្រុញដំណើរការចុះឈ្មោះការបោះឆ្នោតនៅតាមមូលដ្ឋានរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ