ផ្ទុះឡចំហាយ៖ សមត្ថកិច្ចចាប់ខ្លួនកម្មករម្នាក់ពីបទធ្វេសប្រហែស ប៉ុន្តែសហជីពថា អ្នកគ្រប់គ្រងក្រុមហ៊ុន មន្ត្រីជំនាញ និងអាជ្ញាធរទៅវិញទេ ដែលធ្វេសប្រហែស!
ករណីផ្ទុះឡចំហាយរោងចក្រ ZHEN TAI សម្លាប់មនុស្សម្នាក់និងរបួស៧នាក់, សមត្ថកិច្ចបានចាប់ឃាត់ខ្លួនកម្មករដុតឡចំហាយនោះ តាំងតែពីថ្ងៃកើតហេតុ។ នៅថ្ងៃសៅរនេះ សមត្ថកិច្ចខណ្ឌសែន សុខ នឹងបញ្ចូនខ្លួនកម្មកររូបនោះ ទៅកាន់តុលាការ ដោយចោទពីបទធ្វេសប្រហែសក្នុងការងារ។ ក៏ប៉ុន្តែតំណាងសហជីពជាច្រើននាក់ មើលឃើញថា រឿងហេតុនេះ គឺជាកំហុសរបស់អ្នកគ្រប់គ្រងក្រុមហ៊ុន និងអាជ្ញាធរទៅវិញទេ ដែលធ្វេសប្រហែស។
ចុះផ្សាយនៅថ្ងៃ៖
ស្តាប់ - ០២:៣៤
ការផ្ទុះឡចំហាយក្នុងរោងចក្រ បណ្តាលឲ្យស្លាប់និងរបួសនេះ បានកើតឡើងនៅថ្ងៃទី២២មីនា វេលាម៉ោងប្រមាណ១១និង៤០នាទី គឺចំពេលសម្រាកទទួលទានអាហារថ្ងៃត្រង់ របស់ក្រុមកម្មករ។ ភ្លាមៗក្រោយកើតហេតុ អាជ្ញាធរពាក់ព័ន្ធនិងនគរបាលខណ្ឌ សែនសុខ បានចុះទៅត្រួតពិនិត្យ និងបានចាប់ឃាត់ខ្លួនកម្មករម្នាក់ ដែលជាអ្នកដុតឡចំហាយ។
លោក កឹម សុខភេន ប្រធានសហជីពស្មារតីកម្មករខ្មែរ ដែលជាសហជីពក្នុងរោងចក្រនេះ បានបញ្ជាក់ប្រាប់វិទ្យុបារាំងថា កម្មករដែលត្រូវចាប់ខ្លួននោះ គឺជាអ្នករង់ចាំតែស្តាប់បញ្ជានិងធ្វើតាមការណែនាំរបស់អ្នកគ្រប់គ្រងក្រុមហ៊ុនតែប៉ុណ្ណោះ ហើយគាត់ត្រូវធ្វើការតែម្នាក់ឯងទៅទៀត។ ចំពោះករណីកើតហេតុនោះ គឺចំម៉ោងសម្រាករបស់គាត់ទៀតផង។ តាមប្រធានសហជីពស្មារតីកម្មករខ្មែរ សមត្ថកិច្ចមិនគួរចាប់កម្មកររូបនោះ ហើយទម្លាក់កំហុសលើរូបគាត់នោះឡើយ។ លោក កឹម សុខភេន ថាគួរតែស្រាវជ្រាវឲ្យបានស៊ីជម្រៅជាងនេះ ដើម្បីផ្តល់យុត្តិធម៌ចំពោះកម្មករដុតឡចំហាយ។
ចំណែក លោក អាត់ ធន់ ប្រធានសហភាពការងារកម្ពុជា ដែលបានតាមដានរឿងនេះ យ៉ាងស្និត គិតថា អាជ្ញាធរមានសមត្ថកិច្ច គួរណាស់តែស៊ើបអង្កេតឲ្យច្បាស់ជាងនេះ ព្រោះអាចនឹងមានភាគីដល់ទៅបី ដែលត្រូវទទួលសុខត្រូវ។ នោះគឺអ្នកមើលការខុសត្រូវ ឡចំហាយ អ្នកគ្រប់គ្រងរោងចក្រ និងអាជ្ញធរដែលចុះត្រួតពិនិត្យបច្ចេកទេសតាមរោងចក្រនេះតែម្តង។
ស្រដៀងគ្នានេះដែរ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ថាអ្នកគ្រប់គ្រងផ្នែក មន្ត្រីជំនាញ រួមទាំងអ្នកគ្រប់គ្រងក្រុមហ៊ុន ដែលត្រូវទទួលខុសត្រូវ គឺមិនមែនកម្មករដុតឡចំហាយ ដែលត្រូវរងថ្មបាក់តែម្នាក់ឯងនោះទេ។
តាមគំនិតរបស់មេៗសហជីពទាំងនេះ, កម្មករដុតឡចំហាយនោះ មិនគួរត្រូវបានចាប់ខ្លួន ឬត្រូវគេទម្លាក់កំហុសលើ ដោយសារតែខ្លួនជាកម្មករក្រីក្រតូចទាបនោះទេ។
ទន្ទឹមនឹងនេះ លោក កឹម សុខភេន ដែលជាប្រធានសហជីពស្មារតីកម្មករខ្មែរ ធ្វើការក្នុងរោងចក្រនោះ បានដាក់ការសង្ស័យលើស្តង់ដារបច្ចេកទេសរបស់ឡចំហាយនោះ ហើយលោកសូមឲ្យអ្នកជំនាញត្រួតពិនិត្យបច្ចេកទេសចំពោះឡនោះឲ្យបានត្រឹមត្រូវ ដើម្បីបើកកកាយការពិត។
ជាការកត់សម្គាល់ ក្រោយការផ្ទុះឡចំហាយនោះបាន២ថ្ងៃ ក្រសួងការងារកោះប្រជុំ ធ្វើសិក្ខាសាលាស្តីពី ការពង្រឹងសុខដុមរមនានៃទំនាក់ទំនងវិជ្ជាជីវៈ ហើយក៏បានដាក់ចេញគោលការណែនាំ៩ចំណុច ដូចជា ការបញ្ជាឲ្យរោងចក្រត្រួតពិនិត្យជាប្រចាំប្រព័ន្ធសន្តិសុខ អនាម័យ ពិសេសរឿងប្រព័ន្ធកម្តៅ ដែលត្រូវរៀបចំស្រោចទឹកលើដំបូលអគារផលិតកម្ម ឲ្យបាន២ដងក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ