អ៊ីស្រាអែលបង្ហាញភាពល្អូនល្អើនជាមួយអឺរ៉ុបខាងកើត បញ្ឈឺសហភាពអឺរ៉ុប
នាយករដ្ឋមន្ត្រីអ៊ីស្រាអែល លោក បិនយ៉ាមែន នេតាន់យ៉ាហ៊ូ កំពុងបំពេញទស្សនកិច្ច ជាលើកដំបូង នៅប្រទេសហុងគ្រី។ ក្នុងជំនួបដ៏ល្អូនល្អើនជាមួយនឹងបណ្តាថ្នាក់ដឹកនាំប្រទេសនៅតំបន់អឺរ៉ុបខាងកើត នាទីក្រុងប៊ុលការ៉េស លោក នេតាន់យ៉ាហ៊ូ បានថ្លែងអំណរគុណក្រុមប្រទេសទាំងនេះ ដែលបានគាំទ្រអ៊ីស្រាអែល និងចាត់ទុកពាក្យរិះគន់របស់សហភាពអឺរ៉ុបថា មិនប្រក្រតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
លោក នេតាន់យ៉ាហ៊ូ ដែលកំពុងស្វែងរកសម្ព័ន្ធមិត្តលើឆាកអន្តរជាតិ បានអញ្ជើញទៅដល់ប្រទេសហុងគ្រី តាំងពីថ្ងៃចន្ទទី ១៧កក្កដាមក។ នេះជាទស្សនកិច្ចលើកដំបូងរបស់នាយករដ្ឋមន្ត្រីអ៊ីស្រាអែលហើយ គិតចាប់តាំងពីឆ្នាំ១៩៨៩មក។
បន្ទាប់ពីបានជួបពិភាក្សាជាមួយសមភាគី ហុងគ្រី ប៉ូឡូញ ឆែក និងស្លូវ៉ាគី (សម្ព័ន្ធបួនប្រទេសនៅអឺរ៉ុបខាងកើត Vesegrad) នៅថ្ងៃពុធនេះ លោកនេតាន់យ៉ាហ៊ូ បានសម្តែងអំណរគុណក្រុមសម្ព័ន្ធមិត្តដែលតែងការពារអ៊ីស្រាអែលនៅចំពោះសហភាពអឺរ៉ុបកន្លងមក និងបានឆ្លៀតវាយផ្លែឱ្យអឺរ៉ុបទៀត។
សហភាពអឺរ៉ុប មិនពេញចិត្តនយោបាយធ្វើអាណានិគមកិច្ច និងបានរិះគន់ជាញឹកញយសកម្មភាពសាងសង់លំនៅដ្ឋានជ្វីហ្វលើទឹកដីប៉ាឡេស្ទីន របស់អ៊ីស្រាអែល ក៏ដូចជាដំណើរស្វែងរកសន្តិភាពក្នុងជម្លោះអ៊ីស្រាអែល-ប៉ាឡេស្ទីន។ ប៉ុន្តែសម្រាប់លោកនេតាន់យ៉ាហ៊ូ ការរិះគន់របស់អឺរ៉ុបមិនប្រក្រតីទេ ! អឺរ៉ុបគួរតែពិចារណាមើលទំនាក់ទំនងជាមួយអ៊ីស្រាអែលឡើងវិញ ព្រោះអ៊ីស្រាអែលបានផ្តល់ដល់អឺរ៉ុបច្រើនណាស់ លើវិស័យសន្តិសុខនិងបច្ចេកវិទ្យា ហើយអ៊ីស្រាអែលជាប្រទេសប្រជាធិបតេយ្យតែមួយគត់នៅតំបន់ដើមបូព៌ា។
ចំណែកលោក វិចទ័រ អ័របាន Viktor Orban នាយករដ្ឋមន្ត្រីហុងគ្រី ដែលប្រធានផ្លាស់វេន ក្រុមសម្ព័ន្ធបួនប្រទេសអឺរ៉ុបខាងកើត ក៏បានអះអាងថា ចង់ឃើញសហភាពអឺរ៉ុបនិងអ៊ីស្រាអែលត្រូវរ៉ូវគ្នា មានកិច្ចសហប្រតិបត្តិការជាមួយគ្នា។ ការព្រងើយកន្តើយនឹងដៃគូអ៊ីស្រាអែល គឺប្រៀបដូចជាអឺរ៉ុបកំពុងដាក់ទណ្ឌកម្មខ្លួនឯង។
សម្ព័ន្ធបួនប្រទេសនៅអឺរ៉ុបខាងកើត ដែលជាកូនរឹងរូសរបស់សហភាពអឺរ៉ុប និងមានទំនាក់ទំនងតានតឹងជាមួយសមាជិកសហភាពផ្សេងទៀត បានចេញសេចក្តីថ្លែងការណ៍ សន្យារកវិធីរឹតចំណងសហភាពអឺរ៉ុបជាមួយអ៊ីស្រាអែល និងប្រកាសពង្រឹងកិច្ចសហប្រតិបត្តិការទ្វេភាគីរៀងៗខ្លួនជាមួយអ៊ីស្រាអែលនេះ ក្នុងវិស័យសេដ្ឋកិច្ចនិងសន្តិសុខ។ ប្រមុខសម្ព័ន្ធបួនប្រទេសអឺរ៉ុបខាងកើតនិងអ៊ីស្រាអែលត្រូវជួបគ្នាជាថ្មីនៅឆ្នាំ២០១៨ នៅទីក្រុងហ្សេរ៉ុយសាឡិម។
ថ្វីបើនេះជាជំហររបស់សមាជិកតែបួនប្រទេសមែន ប៉ុន្តែបើអ្នកវិភាគ ចាប់ពីនេះទៅសហភាពអឺរ៉ុបពិតជាត្រូវជួបការពិបាកក្នុងការចេញសេចក្តីសម្រេចចិត្តឯកច្ឆន្ទរិះគន់អ៊ីស្រាអែលហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ