ចលនាបះបោរនៅតែត្រូវការជំនួយអន្តរជាតិទៀត
បន្ទាប់ពីកាន់កាប់បានទីក្រុង ទ្រីប៉ូលីមក ចលនាបះបោរ ឥឡូវនេះ តម្រង់ទិសដៅទៅកាន់ ទីក្រុង Syrte ដែលជាស្រុកកំណើតនិងកំពែងការពារចុងក្រោយរបស់ កាដាហ្វី ដើម្បីតាមស្វែងចាប់ខ្លួនប្រមុខលីប៊ីដែលនៅតែរកពុំទាន់ឃើញ។ ទន្ទឹមគ្នានេះដែរ ចលនាបះបោរលីប៊ី ក៏ទទួលរងនូវសកម្មភាពវាយប្រហារតបតជាហូរហែ ពីសំណាក់បក្សព័ន្ធគាំទ្រលោកកាដាហ្វីដែលនៅសេសសល់។ ប្រធានក្រុមប្រឹក្សាជាតិអន្តរកាលលីប៊ី លោក Moustapha ABDELJALIL បានស្នើសុំឲ្យកងទ័ពអន្តរជាតិបន្តការគាំទ្រ ចំពោះចលនាបះបោរទៀតដោយរំលឹកថា លោក កាដាហ្វី នៅតែជាមនុស្សដ៏គ្រោះថ្នាក់បំផុតសំរាប់លីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ការវាយរុលទៅមុខរបស់ចលនាបះបោរលីប៊ីសំដៅទៅទីក្រុង Syrte ត្រូវអមជំនួយពីសំណាក់អង្គការអូតង់ជានិច្ចនៅក្នុងការវាយប្រហារតាមជើងអាកាស ។ ចលនាបះបោរ ដែលកាន់តែ វាយរុលទៅមុខជានិច្ចនិងទៅជិតដល់ ទីក្រុង Syrte ប៉ែកខាងលិចប្រទេសរំពឹងទុកថានឹងវាយយកបានទីក្រុងនេះ ចាប់ពីពេលនេះ ទៅ១០ថ្ងៃខាងមុខទៀត បើសិនជាបក្សព័ន្ធ របស់លោកកាដាហ្វី នៅមិនព្រមទម្លាក់អាវុធចុះទេ។ ម្យ៉ាងទៀត កងទ័ពចលនាបះបោរ ឥឡូវនេះ ស្ថិតនៅចម្ងាយ តែ៣០គមប៉ុណ្ណោះ ពីសមរភូមិគ្រោះថ្នាក់។
នៅជិតព្រំដែន ទុយនីស៊ី វិញ កងទ័ពចលនាបះបោរ បាន ប៉ះទង្គិចយ៉ាងខ្លាំងជាមួយកងទ័ព កាដាហ្វី នៅជិត តំបន់ Ragdalin ។ ចលនាបះបោរ ក៏ មានការព្រួយបារម្ភខ្លាំងដែរ អំពីជោគវាសា្នរបស់ ជនចំនួន ៥ ម៉ឺននាក់ ដែលត្រូវរបបកាដាហ្វីចាប់ខ្លួនតាំងពីប៉ុន្មានសប្តាហ៍មុននិង ដែលគេនៅតែពុំទាន់រកឃើញ ។ ទន្ទឹមនេះ ចលនាបះបោរ បាន រំដោះអ្នកទោសនយោបាយ លីប៊ី ប្រមាណជា ១ ម៉ឺននាក់ចេញពីពន្ធនាគារ នានានៃរបបកាដាហ្វី នៅថ្ងៃម្សិលមិញ បន្ទាប់ពីវាយយកបានទីក្រុងទ្រីប៉ូលីមក ។ ដោយឡែក ប្រជាជនជាច្រើននៅទីក្រុងទ្រីប៉ូលី បានអះអាងថា រកឃើញ រណ្តៅកប់ខ្មោចរួមជាច្រើននៅជុំវិញអតីតគុកនានា។ដោយឡែក នៅទ្រីប៉ូលី ការ ផ្ទុះគ្រាប់យ៉ាងខ្លាំងបំផុត ត្រូវបាន គេឮសូរកាលពីយប់ មិញ តែវា អាចជា ការវាយប្រហារថ្មីៗទៀតរបស់អង្គការ អូតង់ ទៅលើក្រុមតូចៗ នៃ ពួកយុទ្ធជនគាំទ្រ លោកកាដាហ្វី។
នៅលើវិស័យការទូត ខណៈដែល លោកកាដាហ្វីនៅមិនទាន់ត្រូវចាប់ខ្លួនបាន នៅថ្ងៃចន្ទ២៩សីហា នេះ ប្រទេស Qatar ទទួលស្វាគមន៍ការរួមប្រជុំមួយ នៃ នាយសេនាធិការ ដ្ឋានរបស់បណ្តាប្រទេសនានា ដែលបានចូលរួម ក្នុងការវាយប្រហារនៅលីប៊ី។
នៅឱកាសនេះដែរ លោក Moustapha ABDELJALIL ប្រធានក្រុមប្រឹក្សាជាតិអន្តរកាលលីប៊ី CNT នៅ Benghazi បានស្នើសុំ ឲ្យកងទ័ពអន្តរជាតិ បន្តការគាំទ្រ ចំពោះ ចលនាបះបោរលីប៊ី ដោយរំលឹកជាថ្មីថា លោកកាដា ហ្វី នៅតែជាមនុស្សដ៏គ្រោះថ្នាក់បំផុតសំរាប់លីប៊ី។
នៅលើវិស័យការទូតជានិច្ច ប្រទេសថ្មីចំនួន៤ទៀត បានទទួលស្គាល់ ក្រុមប្រឹក្សាជាតិអន្តរកាលលីប៊ី CNT ជាអ្នកតំណាងផ្លូវការរបស់ប្រជាជនលីប៊ី នាចុងសប្តាហ៍នេះ។ប្រទេសទាំងនោះ មាន ដូចជា Kosovo Togo Niger និង Guinée ។
សញ្ញាមួយទៀតនៃទំព័រប្រវត្តិសាស្ត្រកាដាហ្វី ត្រូវបានបិទបញ្ចប់ហើយ គឺនៅថ្ងៃចន្ទនេះ ទង់ជាតិរបស់ចលនាបះបោរលីប៊ី ត្រូវបានដាក់ជំនួសទង់ជាតិចាស់នៃអតីតរបបលីប៊ី នៅស្ថានទូតលីប៊ី ប្រចាំប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ