ការវាយប្រហារជាលើកទីមួយនៃកងកម្លាំងសម្ព័ន្ធភាពលោកខាងលិចទៅលើប្រទេសលីប៊ី
កងកម្លាំងសម្ព័ន្ធភាពនៃប្រទេសលោកខាងលិចទាំងប្រាំបានចាប់ផ្តើម ធ្វើការវាយប្រហារជាលើកទីមួយកាលពីថ្ងៃសៅរ៍ម្សិលមិញទៅលើប្រទេសលីប៊ី ដោយបានបាញ់កាំជ្រួចមីស្ស៊ីលនិងទម្លាក់គ្រាប់បែកទៅលើទីតាំងយោធា លីប៊ីសំខាន់ៗ ដើម្បីបង្ខំឲ្យមូអាម៉ារកាដាហ្វីបញ្ឈប់ការវាយប្រហារទៅលើប្រជាពលរដ្ឋ ស្លូតត្រង់របស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
កងកម្លាំងសម្ព័ន្ធភាពនៃប្រទេសលោកខាងលិចទាំងប្រាំដែលក្នុងនោះមាន៖ ប្រទេសបារាំង ប្រទេសអង់គ្លេស សហរដ្ឋអាមេរិក ប្រទេសអ៊ីតាលី និងប្រទេសកាណាដាបានរួបរួមគ្នាធ្វើអន្តរាគមន៍យោធាមួយដ៏ធំធេងទៅលើប្រទេសលីប៊ី។ អន្តរាគមន៍យោធារបស់កងកម្លាំងសម្ព័ន្ធភាពនៃប្រទេសលោកខាងលិចទៅលើប្រទេសលីប៊ីនេះ ជាអន្តរាគមន៍យោធាដ៏ធំធេងពុំដែលកើតមាននៅក្នុងពិភពអារ៉ាប់ចាប់តាំងពីមានអន្តរាគមន៍យោធានៅប្រទេសអ៊ីរ៉ាក់នៅឆ្នាំ២០០៣មក។ ប្រទេសកាតាដែលជាប្រទេសអារ៉ាប់ឋិតនៅតំបន់ឈូងសមុទ្រពែសឹ៍ក៏បានសន្យាថា នឹងចូលរួបរួមជាមួយធ្វើអន្តរាគមន៍ជាមួយកងកម្លាំងសម្ព័ន្ធភាពនៃប្រទេសលោកខាងលិច។
កម្មវត្ថុនៃអន្តរាគមន៍យោធារបស់កងកម្លាំងសម្ព័ន្ធភាពនៃប្រទេសលោកខាងលិចនេះគឺ៖
ទី១-អនុវត្តន៍សេចក្តីសម្រេចចិត្ត១៩៧៣អនុម័តកាលពីថ្ងៃព្រហស្បតិ៍កន្លងទៅដោយក្រុមប្រឹក្សាសន្តិសុខនៃអង្គការសហប្រជាជាតិ។
ទី២-បង្កើតតំបន់មួយដែលដាក់ឲ្យឋិតនៅក្រោម “ការហាមឃាត់ពុំឲ្យមានយន្តហោះហោះហើរ”។
ទី៣-ដាក់ល័ក្ខខ័ណ្ឌឲ្យឈប់បាញ់គ្នា។
ប៉ុន្មានម៉ោងក្រោយពីជំនួបកំពូលនៅទីក្រុងប៉ារីសកាលពីថ្ងៃសៅរ៍ម្សិលមិញបានបិទបញ្ជប់ កងកម្លាំងអាកាសបារាំងបានធ្វើការវាយប្រហារភ្លាមទៅលើប្រទេសលីប៊ី។ ជំនួបកំពូលនៅទីក្រុងប៉ារីសដែលមានអ្នកដឹកនាំ២២ប្រទេស អង្គការសហប្រជាជាតិ សហភាពអឺរ៉ុប ហើយនិងអង្គការសម្ព័ន្ធភាពអារ៉ាប់មកចូលរួម។
គួរកត់សម្គាល់ថា យន្តហោះប្រដេញបារាំងម្ភៃប្លាយគ្រឿងបានចូលរួមបេសកកម្មយោធានេះ ដោយបានហោះទៅទម្លាក់គ្រាប់បែកនៅម្តុំទីក្រុងបេនហ្កាហ្ស៊ី ដោយបានកំទេចរថក្រោះជាច្រើនគ្រឿងរបស់កងកម្លាំងស្មោះស្ម័គ្រនឹងមូអាម៉ារកាដាហ្វី។
ហើយចាប់ពីម៉ោង១៩ម៉ោងសកល នាវាចម្បាំងនិងនាវាមុជទឹកនៃកងកម្លាំងយោធាអង់គ្លេសនិងអាមេរិកាំងបានបាញ់កាំជ្រួចមីស្ស៊ីលTomahawkជាង១១០ដើមទៅលើទីតាំងសំខាន់ៗនៃកងកម្លាំងយោធាការពារដែនអាកាសរបស់កាដាហ្វី ដោយបានធ្វើឲ្យមានការខូចខាតយ៉ាងដំណំ។ នេះបើយោងតាមអ្នកទទួលខុសត្រូវនៃក្រុមប្រឹក្សាសន្តិសុខជាតិអាមេរិកាំង។
ចំណែកឯលោកប្រធានាធិបតីបារាំងនីកូឡាសាកូហ្ស៊ីវិញបានថ្លែងគូសបញ្ជាក់ថា “ច្រកទ្វារនៃវិស័យការទូតនឹងបើកចំហឡើងវិញ នៅខណៈពេលដែលមូអាម៉ារកាដាហ្វីបញ្ឈប់ទង្វើឈ្លានពានរបស់ខ្លួន”។
ដូច្នេះ តើកាដាហ្វីមានប្រតិកម្មយ៉ាងដូចម្តេចដែរនៅចំពោះមុខអន្តរាគមន៍យោធានៃកងកម្លាំងសម្ព័ន្ធភាពនៃប្រទេសលោកខាងលិចទាំងប្រាំ?
មេដឹកនាំផ្តាច់ការលីប៊ីមូអាម៉ារកាដាហ្វីដែលបានវាយប្រហារនិងវាយបង្ក្រាបប្រជាពលរដ្ឋលីប៊ីបះបោរនៅប៉ែកខាងកើតនៃប្រទេសកាលពី១ខែមុនបានថ្លែងថា "អន្តរាគមន៍យោធានៃកងកម្លាំងសម្ព័ន្ធភាពនៃប្រទេសលោកខាងលិចគឺជាទង្វើឈ្លានពានរបស់ពួកអាណានិគមនិយម”។
ហើយមូអាម៉ារកាដាហ្វីបានថ្លែងប្រកាសទៀតថា ចាប់ពីពេលនេះតទៅ តំបន់មេឌីទែរ៉ាណេនិងតំបន់អាហ្វ្រិកខាងជើងក្លាយជា “សមរភូមិប្រយុទ្ធ” ហើយផ្ទាំងស៊ីប្លឺ៍ទាំងយោធាទាំងស៊ីវិលនឹងឋិតនៅក្រោមគ្រោះថ្នាក់នៃការគំរាម។ ហើយមេដឹកនាំផ្តាច់ការលីប៊ីមូអាម៉ារកាដាហ្វីនឹងចែកសព្វាវុធឲ្យប្រជាជនលីប៊ីប្រមាណជាងមួយលាននាក់ដើម្បីការពារឯករាជភាព និងកិត្តិយសរបស់ប្រទេសលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ