សហជីពចាប់ផ្តើមយុទ្ធនាការក្រោមពាក្យស្លោក«និយាយថាទេ! ចំពោះការស្រេកឃ្លានរបស់កម្មករ»
មេដឹកនាំសហជីព និងសមាគមមកពីច្រើនវិស័យការងារ នៅថ្ងៃសុក្រនេះ បានជួបប្រជុំគ្នានៅក្នុងខណ្ឌមានជ័យ ដើម្បីប្រកាសបើកយុទ្ធនាការទាមទារឲ្យមានការទូទាត់ប្រាក់បំណាច់អតីតភាពការងារ និងលុបចោលលិខិតរបស់នាយកដ្ឋានអធិការកិច្ចការងារលេខ២៩៥។ ការជួបជជែកគ្នារបស់ក្រុមមេដឹកនាំសហជីព និងសមាគមនៅពេលនេះ គឺធ្វើឡើងបន្ទាប់ពីកម្មករ និយោជិត បានបាត់បង់ផលប្រយោជន៍ដោយសារការបកស្រាយខ្លឹមសារមួយចំនួនពីក្រសួងការងារ និងការពន្យាពេលបើកប្រាក់អតីតភាពការងារឆ្នាំ២០២០នេះ។
ចុះផ្សាយនៅថ្ងៃ៖
ស្តាប់ - ០២:៣៤
នៅចំពោះមុខអ្នកចូលរួម ដែលជាកម្មករយោជិតមកពីវិស័យការងារផ្សេងៗគ្នាជាច្រើននាក់ ក្រុមមេដឹកនាំសហជីព និងសមាគម បានលើកឡើងថាការស្នើសុំទៅរដ្ឋាភិបាល ឲ្យជួយដោះស្រាយនូវការបាត់បង់ផលប្រយោជន៍កម្មករនិយោជិត ដោយសារតែការបកស្រាយរបស់នាយកដ្ឋានអធិការកិច្ចក្រសួងការងារជុំវិញ ប្រាក់សោហ៊ុយជំងឺចិត្ត និងប្រាក់បំណាច់ទូទាត់ជួសការឲ្យដំណឹងមុន មិនត្រូវបានឆ្លើយតប។
អ្នកសហជីពបានលើកឡើងថា លិខិតលេខ២៩៥របស់លោក អ៊ុក ចាន់ធូ ដែលជាប្រធាននាយកដ្ឋានអធិការកិច្ច ក្រសួងការងារ កាលពីចុងខែមិថុនា បានអនុញ្ញាតឲ្យនិយោជកអាចបញ្ឈប់ការងារកម្មករនិយោជិតភ្លាមៗបាន ដោយពុំចាំបាច់ផ្តល់ប្រាក់សោហ៊ុយជំងឺចិត្ត និងប្រាក់បំណាច់ទូទាត់ជួសការឲ្យដំណឹងមុន ក្នុងករណីសហគ្រាស និងគ្រឹះស្ថានទាំងនោះត្រូវបានបិទស្របតាមខ្លឹមសារប្រកាសរបស់ក្រសួងទទួលបន្ទុកវិស័យការងារ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ និងមេដឹកនាំសហជីពឯទៀតបានលើកឡើងស្រដៀងគ្នាថា លិខិតរបស់អធិការកិច្ចការងារ បានផ្តល់ឱកាសដល់និយោជក ក្នុងការរកលេសដើម្បីបិទរោងចក្របន្ទាប់ពីព្យួរនៅក្នុងអំឡុងពេលវិបត្តិកូវីដ១៩ ដោយមេដឹកនាំសហជីពរូបនេះ បានលើកឡើងជាឧទាហរណ៍ ដែលបានកើតឡើងជាក់ស្តែងចំពោះ ការបិទរោងចក្រវ៉ាយអូលែតកាលពីពេលថ្មីៗនេះ។
ឆ្លៀតក្នុងឱកាសនេះ ក្រុមមេដឹកនាំសហជីព និងសមាគម ក៏បានប្រើប្រាស់សារស័ព្ទនៅថ្ងៃនេះរួមមានដូចជា«និយាយថាទេ! ចំពោះការស្រេកឃ្លានរបស់កម្មករ» «គ្រប់គ្នាខ្លាចកូវីដ! ខ្ញុំខ្លាចដាច់បាយ សូមផ្តល់ប្រាក់អតីតភាពការងារឲ្យខ្ញុំ»។ ក្រៅពីនេះ អ្នកសហជីពក៏បានស្នើឲ្យសមាជិករបស់ពួកគេរាប់ម៉ឺននាក់ប្តូរឡូហ្គូហ្វេសប៊ុកផ្ទាល់ខ្លួន ហើយដាក់ជំនួសឡូហ្គូដែលមានខ្លឹមសារជាសារទាំងអស់នេះវិញ ចាប់ពីពេលនេះទៅ។
សូមរំលឹកថា មេដឹកនាំសហជីព និងសមាគមប្រមាណជាង១០ស្ថាប័ន បានធ្វើការដាក់លិខិតតវ៉ា និងសុំអន្តរាគមន៍ជាបន្តបន្ទាប់ចាប់ពីខែមករា ឆ្នាំ២០២០ រហូតមកដល់បច្ចុប្បន្នទៅកាន់ក្រសួងការងារ និងខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីស្នើសុំលុបចោលលិខិតរបស់អធិការកិច្ចការងារ និងស្នើសុំលុបចោលការពន្យាពេលបើកប្រាក់អតីតភាពការងារសម្រាប់ឆ្នាំ២០២០ ទៅឆ្នាំក្រោយ។ ក៏ប៉ុន្តែការស្នើសុំទាំងអស់នេះ មិនទាន់ឃើញមានការឆ្លើយតបពីរដ្ឋាភិបាលនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ