ក្រុមសហជីពស្នើរដ្ឋាភិបាលកុំធ្វើវិសោធនកម្មច្បាប់ការងារ ដោយហេតុខាតបង់ប្រយោជន៍កម្មករ
ក្រុមមេដឹកនាំសហជីពនៅក្នុងប្រទេសកម្ពុជា នៅព្រឹកថ្ងៃសុក្រនេះ បានឯកភាពគ្នាដាក់សំណើរទៅក្រសួងការងារ ស្នើសុំកុំឲ្យរដ្ឋាភិបាលធ្វើវិសោធនកម្មមាត្រាចំនួន៣នៃច្បាប់ស្តីពីការងារ ក្នុងនោះមានមាត្រា១៤៤ មាត្រា១៦២ និងមាត្រា៣០០។ មាត្រាទាំង៣នៃច្បាប់ស្តីពីការងារនេះ ត្រូវក្រុមមេដឹកនាំសហជីពមើលឃើញថា ធ្វើឲ្យប៉ះពាល់ដល់ផលប្រយោជន៍កម្មករ និយោជិតយ៉ាងខ្លាំងខណៈដែលកម្មករ និយោជិត កំពុងប្រឈមនឹងបញ្ហាសេដ្ឋកិច្ច អំឡុងពេលនៃការឆ្លងរាតត្បាតនៃមេរោគកូវីដ១៩។
ចុះផ្សាយនៅថ្ងៃ៖
ស្តាប់ - ០២:១៦
មាត្រា១៤៤ មាត្រា១៦២ និងមាត្រា៣០០ ដែលក្រុមសហជីពយល់ថាបានប៉ះពាល់ដល់អត្ថប្រយោជន៍កម្មករជាច្រើន នៅពេលដែលរដ្ឋាភិបាលធ្វើវិសោធនកម្មនោះ ត្រូវបានលើកយកមកជជែកគ្នាយ៉ាងផុលផុសជាថ្មីម្តងទៀត ដោយអ្នកសហជីពសម្រេចថានឹងស្នើទៅរដ្ឋាភិបាលឲ្យបញ្ឈប់ការធ្វើវិសោធនកម្មវិញ ដើម្បីកុំឲ្យប៉ះពាល់ដល់កម្មករ និយោជិតដែលកំពុងជួបប្រទះការលំបាកក្នុងជីវភាព។
ក្រុមមេដឹកនាំសហជីពបានបង្ហាញនូវការទំទាស់ចំពោះការប៉ុនប៉ងធ្វើវិសោធនកម្មច្បាប់ការងារមាត្រា១៤៤ ដែលវិសោធនកម្មនេះ នឹងធ្វើឲ្យកម្មករ និយោជិត ទទួលបានប្រាក់ឈ្នួលដូចជាការងារវេនថ្ងៃដែរ។ ការងារវេនយប់គឺជាការងារដែលកម្មករ និយោជិត ធ្លាប់ទទួលបានប្រាក់ឈ្នួល១៣០% ដែលធ្វើការចាប់ពីម៉ោង២២ដល់ម៉ោង៥ភ្លឺ។ មាត្រា១៤៤នៃច្បាប់នេះ រដ្ឋាភិបាលធ្លាប់បានធ្វើវិសោធនកម្មម្តងហើយកាលពីឆ្នាំ២០០៧ ដោយមានការកាត់បន្ថយប្រាក់ឈ្នួលពី២០០%មកត្រឹម ១៣០%។
ជាមួយគ្នានេះ មាត្រា១៦២ បានលើកឡើងពីការឈប់សម្រាកថ្ងៃបុណ្យចំថ្ងៃអាទិត្យ នឹងត្រូវលើកទៅឈប់នៅថ្ងៃបន្ទាប់ ដែលការឈប់សម្រាកនេះនឹងមិនមានទេ ប្រសិនបើមាត្រានេះត្រូវបានគេធ្វើវិសោធនកម្ម។ ការជំទាស់របស់អ្នកសហជីពដូច្នេះ គឺកម្មករអាចខាតបង់ពី២ទៅ៣ថ្ងៃ ក្នុងមួយឆ្នាំបន្ថែមពីលើការកាត់បន្ថយថ្ងៃឈប់សម្រាកសាធារណៈចំនួន៦ថ្ងៃរួចទៅហើយ ដែលស្នើដោយភាគីនិយោជក។
ដោយឡែកមាត្រា៣០០ វិញគឺទាក់ទងទៅនឹងវិវាទបុគ្គល ដែលក្រុមអ្នកសហជីពចង់ឲ្យវិវាទរួមនិងវិវាទបុគ្គលត្រូវឆ្លងកាត់ក្រុមប្រឹក្សាអាជ្ញាកណ្តាល ជាជាងបញ្ជូនជំលោះនេះ ទៅកាន់តុលាការតែម្តង។
ក៏ប៉ុន្តែរដ្ឋាភិបាលអះអាងថា ការធ្វើវិសោធនកម្មលើមាត្រាច្បាប់សហជីពនេះ គឺដើម្បីទាក់ទាញអ្នកវិនិយោគបន្ថែមទៀតនៅក្នុងឧស្សាហកម្មថ្មី ដែលធ្វើការ២៤ម៉ោង និងបង្កើនការប្រកួតប្រជែងនៅក្នុងក្របខណ្ឌជាតិនិងអន្តរជាតិ ហើយក៏ជាការបើកឱកាសថ្មីសម្រាប់កម្មករបន្ថែមទៀតនៅក្នុងជម្រើសដ៏ច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ