ខេត្តព្រះសីហនុ៖ ព្យុះនូល បង្កឲ្យមានជំនន់ទឹកភ្លៀងប៉ះពាល់ដល់ពលរដ្ឋជិត២ពាន់គ្រួសារ
គិតត្រឹមល្ងាចថ្ងៃទី១៩ ខែកញ្ញានេះ ស្ថានភាពជំនន់ទឹកភ្លៀង ដែលបង្កឡើងដោយព្យុះទី១១ ឈ្មោះ “នូល” នៅឯខេត្តព្រះសីហនុបានបណ្តាលឲ្យប៉ះពាល់ដល់ប្រជាពលរដ្ឋជិត២ពាន់គ្រួសារ ក្នុងឃុំចំនួន១១នៃស្រុកព្រៃនប់។ នេះបើតាមអាជ្ញាធរខេត្តព្រះសីហុន។
ចុះផ្សាយនៅថ្ងៃ៖
របាយការណ៍របស់រដ្ឋបាលខេត្តព្រះសីហនុបានឲ្យដឹងថា ចាប់តាំងពីយប់ថ្ងៃទី១៧ ដល់ថ្ងៃទី១៩ ខែកញ្ញានេះ ជំនន់ទឹកភ្លៀងបានជន់លិចឃុំចំនួន១១ នៅក្នុងស្រុកព្រៃនប់ ខេត្តព្រះសីហនុ ដែលបណ្តាលឲ្យប៉ះពាល់ដល់ប្រជាពលរដ្ឋ ១ ៩៥៨គ្រួសារ(៧ ៨៥៤នាក់) និងផ្ទះចំនួន ១ ៩៥៥ខ្នងផ្ទះ។ តាមរយៈរបាយការណ៍ដដែលក៏បានឲ្យដឹងដែរថា អាជ្ញាធរបានជម្លៀសប្រជាជនទៅកាន់ទីទួលសុវត្ថិភាពចំនួន៤៧៥នាក់។ ក្រៅពីនេះក៏បានបង្កឲ្យមានផលប៉ះពាល់ដល់ហេដ្ឋារចនាសម្ព័ន្ធមួយចំនួនដែរ។
លោក ឃាង ភារម្យ អ្នកនាំពាក្យសាលាខេត្តព្រះសីហនុបានអះអាងប្រាប់វិទ្យុបារាំងអន្តរជាតិនារសៀលនេះថា ស្ថានភាពអាកាសធាតុនៅក្នុងខេត្តព្រះសីហនុ គឺកំពុងប្រឈមនឹងស្ថានភាពអាក្រក់បំផុតសម្រាប់ខេត្តនេះ ពោលគឺភ្លៀងបន្តបង្អុរចុះមកដោយសារតែសម្ពាធពីខ្យល់ព្យុះទី១១។ លោកបន្ថែមថា ស្ថានភាពអាកាសធាតុនេះ បានបណ្តាលឲ្យប៉ះពាល់ដល់ទូកនេសាទ ទូកទេសចរណ៍ ដែលមិនអាចចេញធ្វើចរាចរណ៍បានដូចធម្មតា។ យ៉ាងណាក៏ដោយអ្នកនាំពាក្យរួបនេះបញ្ជាក់ថា ស្ថានភាពទឹកជំនន់នៅអាចគ្រប់គ្រងបាន។
សូមបញ្ជាក់ថា តាមការព្យាករណ៍របស់ក្រសួងធនធានទឹក និងឧតុនិយម គឺព្យុះទី១១ ឈ្មោះ "នូល"បានវាយលុកចូលកម្ពុជានៅថ្ងៃទី១៨ កញ្ញា ហើយបន្តរហូតដល់ថ្ងៃទី២០ ខែកញ្ញា ឥទ្ធិពលនៃព្យុះនេះ នឹងធ្វើឲ្យបណ្តាខេត្តនៅតំបន់វាលទំនាប អាចមានភ្លៀងធ្លាក់ពីធម្យមទៅច្រើន។
ចំណែកបណ្តាខេត្តនៅតំបន់ជាប់ជួរភ្នំដងរែក និងខ្ពង់រាបឥសាន នឹងអាចមានភ្លៀងធ្លាក់ពីធម្យមទៅច្រើន រួមជាមួយខ្យល់បង្គួរអាចប្រឈមខ្ពស់នឹងជំនន់ទឹកភ្លៀង។ រីឯ តំបន់មាត់សមុទ្រ និងនៅលើផ្ទៃសមុទ្រ នឹងអាចមានភ្លៀងធ្លាក់ច្រើនប្រឈមខ្ពស់នឹងជំនន់ទឹកភ្លៀង រួមជាមួយខ្យល់បក់បោកខ្លាំង និងរលកសមុទ្រខ្ពស់ៗ ខណៈស្ថានភាពទឹកទន្លេមេគង្គចាប់ផ្តើមឡើងបន្តិចជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ