អង្គការPLAN៖ កង្វះអាហារូបត្ថម្ភក្នុងចំណោមកុមារអាយុក្រោម ៥ឆ្នាំ រស់នៅភាគឦសានកម្ពុជា នៅតែមានកម្រិតខ្ពស់ជាងគេ
អង្គការភ្លែនអន្តរជាតិកម្ពុជា (Plan)៖ នៅថ្ងៃទី២៩ ខែមករា បានដាក់សម្ពោធនូវគម្រោង១០០០ថ្ងៃដំបូង ដើម្បីពង្រឹងភាពធន់របស់គ្រួសារ តាមរយៈការធ្វើឱ្យមានសន្តិសុខស្បៀង និងផ្តល់អាហារូបត្ថម្ភឱ្យកុមារ និងស្ត្រីដែលងាយរងគ្រោះ ស្ថិតនៅខេត្តរតនៈគិរី។ ខេត្តនេះត្រូវបានរកឃើញថា មានអត្រាកុមារងាយរងគ្រោះខ្លាំងជាងគេ ដោយសារកង្វះអាហាររូបត្ថម្ភ ដែលនាំឱ្យកុមារមានរូបរាងក្រិសក្រិនប្រមាណ ៣៩,៨% ខណៈតួលេខថ្នាក់ជាតិ មានតែប្រមាណ៣២,៤% ប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៥០
លោក យី គីមថាន នាយករងប្រចាំប្រទេសផ្នែកកម្មវិធីនៃអង្គការភ្លែនអន្តរជាតិកម្ពុជាបានឱ្យដឹងថា៖ អត្រានៃកង្វះអាហារូបត្ថម្ភក្នុងចំណោមកុមារអាយុក្រោម ៥ឆ្នាំ ដែលស្ថិតក្នុងគ្រួសារជនជាតិដើមភាគតិច នៅខេត្តរតនគិរី នៅតែមានកម្រិតខ្ពស់ បើប្រៀបធៀបនឹងអត្រាថ្នាក់ជាតិ។ ខេត្តរតនគិរី មានស្រុក២ដែលមានអត្រាភាពក្រីក្រច្រើនជាងគេ គឺស្រុកតាវែង និងស្រុកវឺនសៃ ដែលមានក្រីក្រភាពប្រមាណ២៥,៧% និង ២៧% បើប្រៀបធៀបនឹងថ្នាក់ខេត្ត ដែលមានអត្រាក្រីក្រចំនួន ១៩,៥%។
កង្វះអាហារូបត្ថម្ភ ក្នុងចំណោមកុមារអាយុក្រោម ៥ឆ្នាំនេះ បានរួមចំណែកដល់អត្រាមានជំងឺ និងមរណភាពដល់កុមារ ដោយប៉ះពាល់ដល់ការអភិវឌ្ឍរាងកាយ និងបញ្ញាស្មារតីនៅវ័យកុមារភាពរបស់កុមារ។ ក្នុងនោះ កុមារអាយុក្រោម ៥ឆ្នាំមានលក្ខណៈក្រិសក្រិនប្រមាណ ៣៩,៨% និងស្គមស្គាំង ៨,៣% និងស្រាលជាងទម្ងន់ស្តង់ដារ ២៦,២% បើធៀបទៅនឹងកម្រិតថ្នាក់ជាតិវិញ គឺកុមារអាយុក្រោម ៥ឆ្នាំ ក្រិសក្រិនតែចំនួន ៣២,៤% ស្គមស្គាំងតែ៩,៦% និងស្រាលជាទម្ងន់តែ២៣,៩%ប៉ុណ្ណោះ។
ការដាក់ចេញនូវគម្រោងនេះ នឹងត្រូវធ្វើឱ្យប្រសើរឡើងនូវវិធីសាស្រ្ត ការរៀនសូត្រពីបទពិសោធន៍ដែលបានអនុវត្តមុនៗ ដើម្បីលើកកម្ពស់សមភាពយេនឌ័រ ដោយអនុវត្តលើវិធីសាស្រ្តចម្បងៗចំនួន៥ ទី១. កែលម្អការទទួលបានសេវាសុខភាពសម្រាប់កុមារកង្វះអាហារូបត្ថម្ភស្រួចស្រាល់ធ្ងន់ធ្ងរ និងមធ្យមមានអាយុក្រោម៥ឆ្នាំ។ ទី.២ កែលម្អការអនុវត្តនៃភាពចម្រុះនៃរបបអាហារសម្រាប់ស្ត្រីមានផ្ទៃពោះ និងកុមារអាយុក្រោម ២ឆ្នាំ។ ទី.៣ បង្កើនឥរិយាបថប្រើប្រាស់ទឹកស្អាត និងអនាម័យក្នុងគ្រួសារសម្រាប់ការបំបៅទារក និងការផ្តល់អាហារបន្ថែមដល់កុមារ។ ទី.៤ បង្កើនផលិតផល ចំណីអាហារដែលមានលក្ខណៈចម្រុះបែបក្នុងរបបអាហារ។ និងទី.៥ លើកកម្ពស់សហគ្រាសខ្នាតតូចសម្រាប់បង្កើតប្រាក់ចំណូល។ នេះ បើតាមលោកលោក យី គីមថាន។
ជាមួយគ្នានេះ គម្រោងនឹងផ្តល់អត្ថប្រយោជន៍ផ្ទាល់ទៅស្ត្រីមានផ្ទៃពោះចំនួន ២៨០០នាក់ កុមារអាយុក្រោម ៥ឆ្នាំ ចំនួនជាង៤ពាន់នាក់ ក្នុងនោះមានកុមារអាយុក្រោម ២ឆ្នាំចំនួន ១,៦៧៣នាក់។ កុមារដែលកង្វះអាហារូបត្ថម្ភធ្ងន់ធ្ងរចំនួន៣៨៣នាក់ និងកុមារខ្វះអាហារូបត្ថម្ភស្រួចស្រាល់ កម្រិតមធ្យមចំនួន ៨០០នាក់ និងបុរស ឬឪពុកចំនួនប្រមាណ ជាង ២៧០០នាក់ ដែលមានកូនអាយុពី០ឆ្នាំ ដល់៥៩ខែ។ ក្រៅពីនោះក៏មានដែរ ស្ត្រីចំនួន ជាង៣៧០០នាក់ ដែលស្ថិតនៅក្នុងវ័យបន្តពូជចន្លោះអាយុពី ១៥ ដល់ ៤៤ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ