ពន្ធនាគារព្រៃសស្នើសុំផ្អាកនាំជនជាប់ឃុំទៅតុលាការ ដោយសារមានឆ្លងកូវីដ-១៩ នៅក្នុងពន្ធនាគារ
មណ្ឌលអប់រំកែប្រែទី១ ឬពន្ធនាគារព្រៃស កាលពីថ្ងៃទី២០ ខែឧសភា ម្សិលមិញ បានផ្ញើលិខិតមួយច្បាប់ ទៅកាន់ប្រធានសាលាដំបូងរាជធានីភ្នំពេញ ដើម្បីសុំផ្អាកនាំជនជាប់ឃុំទៅជំនុំជម្រះ និងសាកសួរនៅតុលាការក្រុងភ្នំពេញមួយរយៈ ដោយគិតចាប់ពីថ្ងៃព្រហស្បតិ៍ទី២០ ខែឧសភាទៅ។ ការស្នើពីខាងពន្ធនាគារ សុំផ្អាកបញ្ជូនអ្នកជាប់ឃុំទៅតុលាការពេលនេះ គឺដោយសារមានអ្នកជាប់ឃុំជិត២០នាក់ បានឆ្លងជំងឺកូវីដ-១៩។
ចុះផ្សាយនៅថ្ងៃ៖
ស្តាប់ - ០១:៥៦
នៅក្នុងលិខិត ដែលផ្ញើទៅសាលាដំបូងរាជធានីភ្នំពេញ លោក យិន គន្ធ ប្រធានមណ្ឌលអប់រំកែប្រែទី១ បញ្ជាក់ថា ការផ្អាកបញ្ជូនជនជាប់ឃុំទៅតុលាការពេលនេះ គឺដោយសារនៅមណ្ឌលអប់រំកែប្រែទី១ មានជនជាប់ឃុំចំនួន ១៨នាក់ មានវិជ្ជមានជំងឺកូវីដ-១៩ ហើយបច្ចុប្បន្នមណ្ឌលកំពុងអនុវត្តវិធានការទប់ស្កាត់ការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគម ២០កុម្ភៈ និងកំពុងស្រាវជ្រាវរកអ្នកពាក់ព័ន្ធដោយផ្ទាល់ និងប្រយោលមកយកសំណាកពិនិត្យធ្វើតេស្តរកជំងឺកូវីដ-១៩។
ទោះយ៉ាងណា ខាងអគ្គនាយកដ្ឋានពន្ធនាគារក្រសួងមហាផ្ទៃ ក៏ដូចជាមណ្ឌលអប់រំកែប្រែ«ម១» ផ្ទាល់មិនបានបញ្ជាក់ច្បាស់លាស់នៅឡើយថា ការឆ្លងជំងឺកូវីដ-១៩ទៅក្នុងពន្ធនាគារ គឺមានប្រភពមកពីណា និងឆ្លងដោយរបៀបណា ហើយមកទល់ពេលនេះមានអ្នកជាប់ឃុំប៉ុន្មាននាក់បន្ថែមទៀត ត្រូវបានរកឃើញថាឆ្លងជំងឺកូវីដ-១៩។
កាលពីថ្ងៃទី៨ ខែឧសភា អ្នកជាប់ឃុំចំនួនជាង៣០នាក់ ត្រូវបានរកឃើញថាឆ្លងជំងឺកូវីដ-១៩ នៅក្នុងពន្ធនាគារខេត្តព្រះសីហនុ។ ភ្លាមៗអគ្គនាយកដ្ឋានពន្ធនាគារក្រសួងមហាផ្ទៃ បានធ្វើការញែកអ្នកជាប់ឃុំដាច់ចេញពីគ្នា រវាងអ្នកវិជ្ជមាន និងអ្នកជាប់ពាក់ព័ន្ធដោយផ្ទាល់ និងប្រយោល ដោយក្នុងនោះអ្នកជាប់ឃុំមួយចំនួនត្រូវបានជន្លៀសទៅកាន់ពន្ធនាគារខេត្តកំពតជាបណ្តោះអាសន្ន។ សមត្ថកិច្ចសុខាភិបាលក៏បានធ្វើតេស្តក្នុងចំណោមអ្នកពាក់ព័ន្ធទាំងអស់នោះផងដែរ ដើម្បីបន្តគ្រប់គ្រងការឆ្លងរាលដាលជំងឺកូវីដ-១៩ នៅក្នុងពន្ធនាគារ។
សូមរំលឹកថា អគ្គនាយកដ្ឋានពន្ធនាគារ កាលពីដើមខែឧសភាកន្លងទៅ បានបើកយុទ្ធនាការចាក់វ៉ាក់សាំងការពារជំងឺកូវីដ-១៩ យ៉ាងសកម្មដល់អ្នកជាប់ឃុំ ដោយផ្តើមចេញពីពន្ធនាគារនៅភ្នំពេញ ជាភូមិសាស្ត្រ ដែលមានការប្រឈមខ្លាំងនៃការឆ្លងជំងឺកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ