អភិបាលខេត្តកណ្តាលថាការឆ្លងជំងឺកូវីដ១៩ក្នុងពន្ធនាគារខេត្តស្ថិតក្នុងសភាពគ្រប់គ្រងបាន
ការឆ្លងរាលដាលនៃជំងឺកូវីដ១៩នៅក្នុងពន្ធនាគារខេត្តកណ្តាល បានស្ថិតក្រោមស្ថានការណ៍ដែលអាជ្ញាធរសមត្ថកិច្ចអាចគ្រប់គ្រងបាន។ នេះបើតាមការគូសបញ្ជាក់ពីលោក គង់ សោភ័ណ្ឌ អភិបាលខេត្តកណ្តាលនៅព្រឹកថ្ងៃអាទិត្យនេះ។ តាមលោកគង់ សោភ័ណ្ឌ សមត្ថកិច្ចបានញែកអ្នកទោសដែលមានផ្ទុកជំងឺកូវីដ១៩ឲ្យស្នាក់នៅមួយអគារដាច់ដោយឡែក ពីអ្នកទោសដែលមិនមានជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០១:៥១
ថ្លែងប្រាប់វិទ្យុបារាំងអន្តរជាតិ លោក គង់ សោភ័ណ្ឌ បានឲ្យដឹងថា អាជ្ញាធរសមត្ថកិច្ចបានដាក់កម្លាំងត្រួតពិនិត្យដោយម៉ត់ចត់ទៅលើអ្នកទោសដែលមានវិជ្ជមានកូវីដ១៩នៅក្នុងពន្ធនាគារ។ បន្ថែមពីនេះលោកថា អាជ្ញាធរខេត្តបានដាក់គ្រូពេទ្យនៅជាប្រចាំការដើម្បីតាមដានសុខភាព និងធ្វើតេស្តសំណាកភ្លាមៗក្នុងករណីមានអ្នកទោសរូបណាសង្ស័យថា មានវិជ្ជមានកូវីដ១៩។
ទោះបីជាមានការអះអាងបែបនេះក្តី ក៏ប៉ុន្តែស្ថានការណ៍ឆ្លងជំងឺកូវីដ១៩នៅក្នុងពន្ធនាគារបានក្លាយទៅជារឿងមួយដ៏គួរឲ្យព្រួយបារម្ភ។ ព្រួយបារម្ភក៏ព្រោះថា ស្ថានភាពក្នុងពន្ធនាគារមានភាពតូចចង្អៀត និងកកកុញ។ អង្គការសង្គមស៊ីវិលទាំងជាតិនិងអន្តរជាតិ បានអំពាវនាវឲ្យអាជ្ញាធរមានការចាត់វិធានការចាំបាច់នៅចំពោះមុខបញ្ហានេះ។ អង្គការឃ្លាំមើលសិទ្ធិមនុស្សអន្តរជាតិ Human Right Watch កាលពីថ្ងៃទី២៣កន្លងទៅ បានចេញនូវសេចក្តីថ្លែងការណ៍មួយស្នើឲ្យអាជ្ញាធរបន្ថយទំហំអ្នកទោសតាមដែលអាចធ្វើបាន ដោយស្របទៅតាមស្តង់ដារសិទ្ធិមនុស្សជាអន្តរជាតិ។
ប្រឈមនឹងបញ្ហានេះ អគ្គនាយកដ្ឋានពន្ធនាគារបានដាក់ចេញនូវវិធានការមួយចំនួនដើម្បីឆ្លើយតប ដោយកំណត់ឲ្យមានការធ្វើចត្តាឡីស័កចំនួន២០ថ្ងៃសម្រាប់អ្នកដែលទើបត្រូវបានកាត់ទោស។ នេះបើតាមលោក នុត សាវនា អ្នកនាំពាក្យអគ្គនាយកដ្ឋានពន្ធនាគារ។
គួរជ្រាបថា ការឆ្លងរាលដាលជំងឺកូវីដ១៩ចូលពន្ធនាគារបានកើតមាននៅឯពន្ធនាគារខេត្តព្រះសីហនុ ដែលតាមតួលេខការឆ្លងដំបូងនៅថ្ងៃទី៨ឧសភា មានចំនួនជាង៣០នាក់ ហើយបន្តមកទៀតមានការឆ្លងនៅពន្ធនាគារព្រៃសរចំនួន១៨នាក់ ដែលបណ្តាលឲ្យ ការស្នើផ្អាកបញ្ជូនជនជាប់ឃុំទៅតុលាការជាបណ្តោះអាសន្ន ហើយមកដល់ពេលនេះ ក៏មានការរាលដាលបន្តដល់ពន្ធនាគារនៅខេត្តកណ្តាល។
សូមរំលឹកដែរថា អគ្គនាយកដ្ឋានពន្ធនាគារ កាលពីដើមខែឧសភាកន្លងទៅ បានបើកយុទ្ធនាការចាក់វ៉ាក់សាំងការពារជំងឺកូវីដ-១៩ ដល់អ្នកជាប់ឃុំ ដោយផ្តើមចេញពីពន្ធនាគារនៅភ្នំពេញ ជាភូមិសាស្ត្រ ដែលមានការប្រឈមខ្លាំងនៃការឆ្លងជំងឺកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ