អង្គការ«ជំហានដំបូង» សង្កេតឃើញថា កុមារកម្ពុជាប្រមាណ៨០% មានសម្ពាធផ្លូវចិត្តអំឡុងពេលកូវីដ-១៩
នៅថ្ងៃទី១មិថុនាស្អែកនេះ គឺជាទិវាកុមារអន្តរជាតិ។ នៅកម្ពុជាបញ្ហារបស់កុមារ អង្គការជំហ៊ានដំបូងកម្ពុជាសង្កេតឃើញថា កុមារប្រមាណ៨០ភាគរយ ដែលមានសម្ពាធផ្លូវចិត្តអំឡុងពេលកូវីដ-១៩ ជាពិសេសអំឡុងពេលបិទខ្ទប់។ បើតាមអង្គការជំហ៊ានដំបូងកម្ពុជា កុមារប្រមាណ៨០%នេះ ជាចំនួនមួយដែលអង្គការបានធ្វើការជាមួយក្រុមគ្រួសារមួយចំនួនរបស់កុមារនៅក្នុងប្រទេសកម្ពុជាប៉ុណ្ណោះ ហើយសម្ពាធផ្លូវចិត្តកើតលើកុមារអំឡុងពេលបិទខ្ទប់នេះមានសភាពធ្ងន់ធ្ងរជាងមនុស្សធំទៅទៀត។
ចុះផ្សាយនៅថ្ងៃ៖
ស្តាប់ - ០២:០០
សម្ពាធផ្លូវចិត្តរបស់កុមារនៅអំឡុងពេលបិទខ្ទប់ដែលបណ្ដាលមកពីវិបត្តិកូវីដ១៩នេះ ស្ដែងឡើងតាមរយៈមូលហេតុមួយចំនួនដូចជាៈ បាត់បង់ទំនាក់ទំនងខាងក្រៅដោយសារសាលាផ្អាកការបង្រៀនបណ្ដោះអាសន្ន ទោះបីជាមានការបង្រៀនតាមអនឡាញ ក៏មិនអាចឆ្លើយតបនឹងភាពរីករាយរបស់កុមារបានដែរ។ ក្រៅពីនេះកុមារខ្វះការកំសាន្ត ដែលផ្ទុយពីការវិវត្តន៍តាមវ័យរបស់ពួកគេ។
បើតាមលោក យុង ចាន់ថាវ ប្រធានបច្ចេកទេសនៃអង្គការជំហានដំបូងកម្ពុជា កុមារដែលរស់នៅក្នុងស្ថានភាពភាពក្រីក្រកាន់ តែប្រឈមនឹងសម្ពាធផ្លូវចិត្ត បើធៀបនឹងកុមារដែលគ្រួសារមានជីវភាពរស់នៅមធ្យម និងសមរម្យ។ ចំពោះកុមាររស់នៅក្នុងគ្រួសារក្រីក្ររងសម្ពាធផ្លូវចិត្តខ្លាំង ដោយសារគ្រួសារមិនអាចបំពេញតម្រូវការចង់បានរបស់ពួកគេបានជាពិសេសសម្ភារៈកំសាន្តនានា។
នៅចំពោះមុខបញ្ហានេះ លោក យុង ចាន់ថាវ មើលឃើញថា គ្រួសារបានដើរតួនាទីសំខាន់ក្នុងការសង្គ្រោះកុមារពីសម្ពាធផ្លូវចិត្ត ហើយក្រៅពីគ្រួសារមណ្ឌល ដែលទទួលថែទាំកុមារ ក៏ត្រូវអនុវត្តដូចគ្នាដែរតាមរយៈការបញ្ចេញសកម្មភាពកំសាន្ត ជជែកលេងពីរឿងព្រេង ឬរឿងនិទានជាដើម។
មន្ត្រីអង្គការសង្គមស៊ីវិលរូបនេះ បានលើកឡើងទៀតថា នៅពេលដែលក្រសួងអប់រំសម្រេចបើកសាលារៀនឡើងវិញ នឹងជាចំណែកមួយដ៏សំខាន់ក្នុងការកាត់បន្ថយសម្ពាធផ្លូវចិត្ត សម្រាប់កុមារព្រោះកុមារនឹងចាប់ផ្ដើមមានទំនាក់ទំនងឡើងវិញជាមួយមិត្តភក្តិ លោកគ្រូ អ្នកគ្រូ និងសកម្មភាពនានានៅក្នុងសាលារៀនរបស់ពួកគេ។ ទោះជាសាលាមិនទាន់បើកទ្វារឡើងវិញក៏ដោយ លោកយុង ចាន់ថាវ ផ្ដល់យោបល់ថា នៅអំឡុងពេលនេះ ក្រសួងអប់រំក៏អាចធ្វើសកម្មភាពមួយចំនួនលើកទឹកចិត្តសិស្ស ដែលជាកុមារតូចៗ ឲ្យពួកគេធូរស្បើយក្នុងចិត្តដែរ។
សូមជម្រាបជូនថា ក្រសួងអប់រំបានប្រជុំរួចហើយអំពីផែនការសម្រាប់ត្រៀមបើកសាលារៀនឡើងវិញ នៅក្រោយបិទបញ្ចប់ព្រឹត្តិការណ៍សហគមន៍២០កុម្ភៈ។ នេះបើតាមការឲ្យដឹងពីអ្នកនាំពាក្យក្រសួងអប់រំ យុវជន និងកីឡាដែលបានប្រាប់វិទ្យុបារាំងអន្តរជាតិRFI នាពេលកន្លងមក។ ផែនការនេះត្រូវបានប្រកាសស្របពេលដែលគ្រូបង្រៀនប្រមាណ៨៥% បានចាក់វ៉ាក់សាំងប្រឆាំងកូវីដ-១៩ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ