ទិវាកុមារអន្តរជាតិ៖ អង្គការលីកាដូលើកឡើងពីបញ្ហាវិសមភាពអប់រំសម្រាប់កុមារនៅជនបទ
បញ្ហាវិសមភាពក្នុងការទទួលបានការអប់រំសម្រាប់កុមារ ត្រូវបានអង្គការលីកាដូ លើកមកនិយាយ ក្នុងឱកាសទិវាកុមារអន្តរជាតិ១មិថុនា។ វិសមភាពអប់រំសម្រាប់កុមារ បានកើតមានឡើង ក្រោយពេលសាលារៀននៅទូទាំងប្រទេសបានផ្អាកជាបណ្តោះអាសន្ន ដោយសារបញ្ហាជំងឺកូវីដ-១៩។ បើតាមអង្គការលីកាដូ សម្រាប់កុមារនៅទីជនបទ ពួកគេមិនអាចមានលទ្ធភាពគ្រប់គ្រាន់ផ្គត់ផ្គង់សម្ភារៈសិក្សាពីចម្ងាយ។
ចុះផ្សាយនៅថ្ងៃ៖
ស្តាប់ - ០២:៤៧
តាមរយៈសេចក្តីថ្លែងការណ៍ចំនួន៣ទំព័រ នៅក្នុងទិវាកុមារអន្តរជាតិ អង្គការលីកាដូបានកំណត់យកប្រធានបទមួយថា «កុមារមិនគួរត្រូវបានមើលរំលងក្នុងការឆ្លើយតបនឹងជំងឺកូវីដ-១៩»។ បើតាមអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ ក្នុងអំឡុងពេលរាលដាលជំងឺកូវីដ-១៩ កុមារបានជួបប្រទះនឹងបញ្ហាជាច្រើន ដូចជាការទទួលបានការអប់រំ កង្វះអាហាររូបត្ថម្ភ និងការតានតឹងផ្នែកផ្លូវចិត្ត។
ការផ្អាកជាបណ្តោះអាសន្ននូវសាលារៀនទូទាំងប្រទេស ដោយសារបញ្ហាជំងឺកូវីដ-១៩ បានធ្វើឲ្យកុមារ និងសិស្សនុសិស្សជាង៣.២លាន ប្រឈមនឹងការទទួលបានការអប់រំដោយផ្ទាល់។ ជំនួសមកវិញនូវយន្តការការសិក្សាពីចម្ងាយ សិស្សានុសិស្សមួយចំនួនអាចមានលទ្ធភាពផ្គត់ផ្គង់សម្ភារៈដើម្បីសិក្សា។ ក៏ប៉ុន្តែ នៅទន្ទឹមនេះ តាមរយៈការវាយតម្លៃពីតម្រូវការនៃអប់រំ ក្រសួងអប់រំបានរកឃើញដែរថា ប្រមាណ៣០%នៃសិស្សានុសិស្ស៣.២លាននាក់ មិនមានលទ្ធភាពប្រើប្រាស់ទម្រង់ណាមួយនៃការសិក្សាពីចម្ងាយ ដោយភាគច្រើនពួកគេ ជាកុមារដែលមានគ្រួសារក្រីក្រ និងរស់នៅតាមជនបទដាច់ស្រយាល។
បរិការណ៍នេះបានបង្កើតឲ្យមានកំណើនអត្រាសិស្សបោះបង់ការសិក្សាជាហូរហែ ហើយបើតាមក្រសួងអប់រំ មានសិស្សានុសិស្សប្រមាណ១៦%ប្រឈមនឹងការបោះបង់ការសិក្សារៀនសូត្រ និង៦%ងាកទៅស្វែងការងារធ្វើពេញម៉ោង។ អង្គការលីកាដូ ថារដ្ឋាភិបាលគួរណាគិតគូពីការបើកសាលារៀនឡើងវិញ នៅខណៈដែលទីតាំងទីប្រជុំជនមួយចំនួនបានបើកឲ្យដំណើរឡើងវិញនោះ។
ពាក់ព័ន្ធនឹងបញ្ហានេះ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់វិទ្យុបារាំងអន្តរជាតិនៅថ្ងៃនេះថា គ្រឹះស្ថានសិក្សាបន្តផ្អាកដំណើរការជាបណ្តោះអាសន្ន ខណៈព្រឹត្តិការណ៍សហគមន៍២០កុម្ភៈមិនទាន់បានបិទបញ្ចប់។ បើតាមអ្នកនាំពាក្យរូបនេះ ក្រសួងនឹងនៅបន្តការបង្រៀនសិក្សាពីចម្ងាយ ដោយប្រែសម្រួលកាលវិភាគសិក្សាឆ្នាំ២០២០-២០២១ គិតចាប់ពីថ្ងៃទី១១មករាឆ្នាំ២០២១ និងបិទបវេសនកាលនៅថ្ងៃទី៣០វិច្ឆិកា២០២១។ ហើយទន្ទឹមនេះ ក្រសួងក៏បានវាយតម្លៃពីការសិក្សាតាមបណ្តុំតូចៗក្នុងតំបន់មូលដ្ឋានដែលមានកម្រិតហានិភ័យឆ្លងជំងឺកូវីដ-១៩ ទាប មធ្យម និងខ្ពស់។
លោក រស់ សុវាចា បានបន្ថែមដែរថា ក្នុងបរិការណ៍នៃការាលដាលជំងឺកូវីដ-១៩ និងការសិក្សាតាមប្រព័ន្ធអនឡាញ ពិតជាលំបាក ក៏ប៉ុន្តែអាណាព្យាបាលកុមារគួរណាបន្តលើកទឹកចិត្តកុមារឲ្យសិក្សារៀនសូត្រ តាមគន្លងថ្មីនៃវិស័យអប់រំ។
ក្នុងឱកាសខួបលើកទី៧២នៃទិវាកុមារអន្តរជាតិនេះដែរ ប្រមុខរដ្ឋាភិបាលកម្ពុជា លោកហ៊ុន សែន ក៏បានចេញនូវលិខិតអបអរទិវានេះដូចគ្នា។ តាមរយៈលិខិតចំនួន៤ទំព័រ លោកនាយករដ្ឋមន្ត្រីហ៊ុន សែន បានលើកឡើងពីការអនុវត្តបាននូវការលើកកម្ពស់សិទ្ធិកុមារនៅទូទាំងប្រទេស។ ទោះជាយ៉ាងនេះក្តី លោកក៏បានបញ្ជាក់ដែរថា នៅក្នុងស្ថានការណ៍ជំងឺកូវីដ-១៩ កុមារពិតជាត្រូវការការគាំទ្រនិងអន្តរាគមន៍ជាចាំបាច់។
បើតាមប្រមុខរដ្ឋាភិបាល អាជ្ញាធរត្រូវធ្វើយ៉ាងធានាបាននូវការយកចិត្តទុកដាក់ ក៏ដូចជាឈានដល់ការលុបបំបាត់អំពើហិង្សា និងជួញដូរកុមារនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ