កូវីដ១៩៖ កុមារកម្ពុជាអាយុក្រោម៥ឆ្នាំ ៣នាក់ មានម្នាក់កង្វះអាហារូបត្ថម្ភរ៉ាំរ៉ៃ
អង្គការសហប្រជាជាតិប្រចាំកម្ពុជានៅថ្ងៃទី០១ មិថុនានេះ មានការបារម្ភអំពីផលប៉ះពាល់នៃជំងឺកូវីដ១៩ លើសន្តិសុខស្បៀង និងស្ថានភាពអាហារូបត្ថម្ភ ដោយបានបង្ហាញថា ក្នុងចំណោមកុមារកម្ពុជាអាយុក្រោម ៥ឆ្នាំ ៣នាក់មានម្នាក់កង្វះអាហារូបត្ថម្ភរ៉ាំរ៉ៃ ហើយក្នុងចំណោមកុមារ ១០នាក់ មានម្នាក់ជួបប្រទះនឹងបញ្ហាអាហារូបត្ថម្ភស្រួចស្រាវ។ បន្ថែមពីលើក្តីបារម្ភចំពោះកង្វះអាហារូបត្ថម្ភ បញ្ហាកុមារធាត់ជ្រុលក៏បានក្លាយជាក្តីព្រួយបារម្ភក្នុងបរិបទកូវីដ១៩ដែរ។
ចុះផ្សាយនៅថ្ងៃ៖
ស្តាប់ - ០២:១៤
មូលហេតុដែលនាំឱ្យកុមារ ប្រឈមនឹងកង្វះអាហារូបត្ថម្ភ ដោយសារនៅក្នុងរយៈពេល ៦ខែចុងក្រោយនេះ ប្រជាពលរដ្ឋបានប្រើប្រាស់គ្រប់វិធីសាស្រ្តដើម្បីទប់ទល់នឹងបញ្ហាខ្វះខាតស្បៀង ដោយពួកគេបានកាត់បន្ថយបរិមាណអាហារហូបចុកជ្រើសយកអាហារមានតម្លៃថោក និងការខ្ចីបុលជាដើម។ ការសិក្សាទាំងនេះក៏បានរំលេចផងដែរថា គ្រួសារក្រីក្រដែលមានសមាជិកពី១នាក់ទៅ៣នាក់និងគ្រួសារដែលមានសមាជិកពិការភាពទំនងជាមានស្ថានភាពសន្តិសុខស្បៀង និងអាហារូបត្ថម្ភក្នុងកម្រិតទាប។
ដើម្បីដោះស្រាយលើបញ្ហានេះការវិនិយោគលើការការពារសន្តិសុខស្បៀងនិងអាហារូបត្ថម្ភគឺជារឿងចាំបាច់ក្នុងការឆ្លើយតបចំពោះវិបត្តិកូវីដ១៩ព្រោះថា កង្វះអាហារូបត្ថម្ភនៅវ័យកុមារ និងក្នុងអំឡុងពេលមានផ្ទៃពោះ បានបង្កផលលំបាកអវិជ្ជមានឆ្លងជំនាន់ ដល់ការលូតលាស់ ការអភិវឌ្ឍរបស់កុមារ និងបង្កផលប៉ះពាល់ពេញមួយជីវិតទៅលើការអប់រំ ក៏ដូចជាការប្រឈមនឹងជំងឺឆ្លងរ៉ាំរ៉ៃនានា។ របបអាហារដែលមានតុល្យភាព និងជួយទ្រទ្រង់សុខភាព អាចបង្កើនភាពស៊ាំរបស់រាងកាយបង្ការនឹងជំងឺឆ្លងនានាដែលអាចគេចផុតពីហានិភ័យឈឺឬស្លាប់ដោយជំងឺឆ្លងកូវីដ១៩បាន។
ក្រៅពីកុមារស្រ្តីមានផ្ទៃពោះក៏ជួបបញ្ហាស្រដៀងនេះដែរ។ ជាក់ស្តែងនៅចុងឆ្នាំ២០២០ អង្គការសហប្រជាជាតិបានរកឃើញថា មានស្ត្រីកម្ពុជាមានអាយុពី១៥ដល់៤៩ឆ្នាំ ត្រឹមតែពាក់កណ្តាលប៉ុណ្ណោះ ដែលទទួលបានរបបអាហារចម្រុះគ្រប់គ្រាន់ ដែលចំនួននេះថយចុះប្រមាណពី៧០% បើធៀបនឹងដើមឆ្នាំ២០២០ដដែល។ ហើយអ្នកជំនាញផ្នែកសុខភាពសាធារណៈបានព្យាករថា បញ្ហាអាហារូបត្ថម្ភស្រួចស្រាវនៅក្នុងប្រទេសដែលមានចំណូលទាប និងមធ្យម នឹងអាចកើនឡើង១៤% ដោយសារវិបត្តិកូវីដ១៩។
បើតាមអង្គការសហប្រជាជាតិដដែល ប្រសិនបើបញ្ហាអសន្តិសុខស្បៀង និងអាហារូបត្ថម្ភមិនត្រូវបានចាត់ទុកជាអាទិភាពនៅក្នុងការដោះស្រាយ វានឹងប៉ះពាល់នឹងប៉ះពាល់ដល់សេចក្តីថ្លៃថ្នូររបស់មនុស្ស ព្រោះការទទួលបានស្បៀង និងអាហារូបត្ថម្ភ ជាសិទ្ធិមូលដ្ឋានរបស់មនុស្សគ្រប់រូប។
សូមរម្លឹកជូនថា នៅក្នុងឆ្នាំ២០១៦ មានការប៉ាន់ប្រមាណមួយថា បញ្ហាហរិញ្ញវត្ថុអាហារូបត្ថម្ភ ធ្វើឱ្យសេដ្ឋកិច្ចខាតបង់ទឹកប្រាក់ចំនួនប្រមាណ២៦៦លានដុល្លារ នៅក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ