លោកហ៊ុន សែន កំណត់យកថ្ងៃ ០១សីហា ចេញចាក់វ៉ាក់សាំងបង្ការកូវីដដល់កុមារអាយុ ១២-១៧ឆ្នាំ
លោកនាយករដ្ឋមន្ត្រីហ៊ុន សែន បានប្រកាសបើកយុទ្ធនាការចាក់វ៉ាក់សាំងបង្ការកូវីដ១៩ ដល់កុមារ និងក្មេងជំទង់ ដែលមានអាយុចាប់ពី ១២ ដល់ ១៧ឆ្នាំ ចាប់ពីថ្ងៃទី ០១ ខែសីហា ឆ្នាំ ២០២១ខាងមុខតទៅ។ ការប្រកាសរបស់លោកហ៊ុន សែន យ៉ាងដូច្នេះ បានធ្វើឡើងតាមរយៈសារព័ត៌មានស្និទ្ធិនឹងរដ្ឋាភិបាល នៅរសៀលថ្ងៃសុក្រ ទី ២៣ខែកក្កដានេះ។
ចុះផ្សាយនៅថ្ងៃ៖
តាមបណ្តាញព័ត៌មាន Fresh News លោកប្រមុខរដ្ឋាភិបាលកម្ពុជា ហ៊ុន សែន បានកំណត់យុទ្ធនាការចាក់វ៉ាក់សាំងបង្ការកូវីដ១៩ ដល់កុមារ និងក្មេងជំទង់ ដែលមានអាយុពី ១២ ដល់ ១៧ឆ្នាំ ចាប់ពីថ្ងៃទី ០១ ខែសីហា ខាងមុខ។ ការកំណត់នេះ គឺជាជម្រើសដំណើរការស្របគ្នា ជាមួយការចាក់វ៉ាក់សាំងដល់មនុស្សមានអាយុលើសពី ១៨ឆ្នាំ ដែលពេលនេះ អាចសម្រេចបានជិត ៦៥ភាគរយ ឬ ស្មើនឹងចំនួនពលរដ្ឋជាង ៦ ៥០០ ០០០នាក់។
ថ្លែងប្រាប់សារព័ត៌មានស្និទ្ធិនឹងរដ្ឋាភិបាលនេះដដែល លោកហ៊ុន សែន អះអាងថា លោកនឹងធ្វើជាអធិបតី ក្នុងពិធីបើកយុទ្ធនាការចាក់វ៉ាក់សាំងដល់កុមារ និងក្មេងជំទង់នេះ នៅមន្ទីរពេទ្យកាល់ម៉ែត្រ រាជធានីភ្នំពេញ ដោយលោកនឹងនាំយក ចៅរបស់លោក ដែលមានអាយុពី ១២ ដល់ ១៧ឆ្នាំទាំងអស់ ទៅចាក់នៅថ្ងៃបើកឆាកដំបូងតែម្តង។ បន្ទាប់មក កូនចៅរបស់ថ្នាក់ដឹកនាំសំខាន់ៗផ្សេងទៀត ក៏នឹងទៅទទួលការចាក់វ៉ាក់សាំងជាបន្តបន្ទាប់ដែរ។
សូមបញ្ជាក់ថា នៅពាក់កណ្តាលខែកក្កដានេះ លោកនាយករដ្ឋមន្ត្រីហ៊ុន សែន បានប្រកាសពីផែនការចាក់វ៉ាក់សាំងដូសទី ៣ ដល់ពលរដ្ឋទូទៅ និងចាក់វ៉ាក់សាំងដល់ក្រុមកុមារអាយុក្រោម ១៨ឆ្នាំ ដើម្បីប្រយុទ្ធប្រឆាំងនឹងរលកឆ្លងនៃជំងឺកូវីដ ១៩ ដែលហាក់មិនមានសញ្ញាថមថយ។ មួយវិញទៀត ការចាក់វ៉ាក់សាំងដល់ក្រុមកុមារ និងក្មេងជំទង់នេះ ក៏ជាក្តីសង្ឃឹម ក្នុងការបើកដំណើរការសាលារៀនឡើងវិញ ក្រោយពេលបានបិទដំណើរការអូសបន្លាយដល់ជាង ២០០ថ្ងៃទៅហើយ។
សូមបញ្ជាក់ថា លោកនាយករដ្ឋមន្ត្រី ហ៊ុន សែន បានបញ្ជាឱ្យគណៈកម្មាធិការគ្រប់គ្រងការចាក់វ៉ាក់សាំងការពារកូវីដ១៩ ត្រៀមវ៉ាក់សាំង Sinovac របស់ចិនចំនួន ៥លានដូស ដើម្បីចាក់ដល់ក្មេងអាយុពី ១២ ដល់ ១៧ឆ្នាំ ចំនួនជាង ២លាននាក់ ក្នុងប្រទេសកម្ពុជា។ នេះគឺជាការបញ្ជាក់របស់លោកស្រី យក់ សម្បត្តិ រដ្ឋលេខាធិកាក្រសួងសុខាភិបាល នៅថ្ងៃទី ២២ខែកក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ