រាជធានីភ្នំពេញ និងខេត្តបីផ្សេងទៀតត្រៀមចាក់វ៉ាក់សាំងកូវីដ១៩ដល់កុមារដំណាលគ្នា
រាជធានីភ្នំពេញ និងខេត្តចំនួន៣ផ្សេងទៀត ត្រៀមចាក់វ៉ាក់សាំងកូវីដ១៩ លើកុមារដែលមានអាយុចាប់ពី១២ឆ្នាំទៅដល់១៧ឆ្នាំ ដំណាលគ្នានៅថ្ងៃទី១សីហាខាងមុខនេះ។ ការកំណត់នេះ គឺធ្វើឡើងបន្ទាប់ពីប្រមុខរដ្ឋាភិបាលកម្ពុជា លោក ហ៊ុន សែន នឹងដឹកនាំចៅរបស់លោកចាប់ពីអាយុ១២ឆ្នាំចាក់វ៉ាក់សាំង នៅថ្ងៃទី១សីហាខាងមុខនេះ នៅទីស្ដីការគណៈរដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០២:៤៦
យុទ្ធនាការចាក់វ៉ាក់សាំងកូវីដ១៩ លើកុមារដែលជាវ៉ាក់សាំងចិនប្រភេទ Sinovac នឹងចេញដំណើរព្រមគ្នារវាងរាជធានីភ្នំពេញ និងខេត្តចំនួន៣ផ្សេងទៀតដែលរួមមាន៖ ខេត្តកណ្តាល ខេត្តព្រះសីហនុ និងខេត្តកោះកុង ចាប់ផ្តើមនៅថ្ងៃទី០១ សីហានេះរហូតដល់ថ្ងៃទី១៨ សីហា ឆ្នាំ២០២១ ដោយស្ម័គ្រចិត្ត និងឥតគិតថ្លៃ។ នេះបើតាមសេចក្តីជូនដំណឹងរបស់ក្រសួងសុខាភិបាលនៅថ្ងៃទី២៧ កក្កដាម្សិលមិញ។
ដំណើរការចាក់វ៉ាក់សាំងជាដំបូងនេះ ផ្ដើមពីកូនៗ និងចៅៗ របស់ឥស្សរជនដែលមានតួនាទីជាឧបនាយករដ្ឋមន្រ្តី ឬមានឋានៈស្មើ រហូតដល់មន្រ្តីរាជការ និងមន្រ្តីជាប់កិច្ចសន្យា បម្រើការនៅថ្នាក់ជាតិ កូនចៅអ្នកឧកញ៉ា និងកូនចៅរបស់មន្រ្តីការទូត មន្រ្តីអង្គការសហប្រជាជាតិ តំណាងហិរញ្ញវត្ថុអន្តរជាតិ អង្គការអន្តរជាតិ និងកូនចៅអ្នកសារព័ត៌មានជាដើម។
ចំពោះកូនៗ ចៅៗរបស់ឥស្សរជនដែលមានតួនាទីជាឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តី រដ្ឋលេខាធិការ ឬមានឋានៈស្មើ នឹងត្រូវចាក់ចាក់វ៉ាក់សាំងកូវីដ១៩នៅមន្ទីរពេទ្យកាល់ម៉ែត។ សម្រាប់កូន ចៅអនុរដ្ឋលេខាធិការ អគ្គនាយក អគ្គនាយករង និងអ្នកមានអ្នកឋានៈស្មើត្រូវចាក់វ៉ាក់សាំងនៅមន្ទីរពេទ្យព្រះអង្គឌួង។ ចំពោះកូនចៅរបស់ប្រធាន-អនុប្រធាននាយកដ្ឋាន ប្រធានការិយាល័យ បុគ្គលិក និងមន្រ្តីជាប់កិច្ចសន្យាទាំងអស់ត្រូវទៅចាក់វ៉ាក់សាំងនៅមន្ទីរពេទ្យគន្ធបុប្ផាភ្នំពេញម្តុំវត្តភ្នំ ហើយនៅមន្ទីរពេទ្យកុមារជាតិវិញ គឺសម្រាប់កូនចៅរបស់មន្រ្តីរាជការ និងអ្នកសារព័ត៌មាន។ សម្រាប់កូនចៅរបស់ប្រជាពលរដ្ឋ និងមន្រ្តីក្រោមឱវាទសាលារាជធានីភ្នំពេញនឹងទៅចាក់នៅតាមទីតាំងចាក់វ៉ាក់សាំងចំនួន ៤២ទីតាំង ដែលស្ថិតក្នុងខណ្ឌទាង១៤ និងកំណត់ដោយសាលារាជធានីភ្នំពេញ។
ជាមួយគ្នានេះ សេចក្តីជូនដំណឹងបានបញ្ជាក់បន្ថែមទៀតថា ចំពោះកូនចៅរបស់ពលរដ្ឋដែលមិនទាន់ដល់វេនចាក់វ៉ាកើសាំងសូមអត់ធ្មត់រង់ចាំ ពីព្រោះថាវ៉ាក់សាំងមានចាក់ជូនជាបន្តបន្ទាប់ទៅគ្រប់ៗកុមារ និងក្មេងវ័យជំទង់ទាំងអស់ នៅទូទាំងប្រទេស ទៅតាមការកំណត់របស់គណៈចំពោះកិច្ចចាក់វ៉ាក់សាំងកូវីដ១៩។ ជាការគូសបញ្ជាក់បន្ថែមការចាក់វ៉ាក់សាំងដូសទី២ ដល់កុមារ និងវ័យជំទង់ ត្រូវមានគម្លាតរយៈពេល២១ថ្ងៃ។ នេះបើតាមសេចក្តីជូនដំណឹងរបស់ក្រសួងសុខាភិបាលដដែល។
សូមជម្រាបជូនថា លោកនាយករដ្ឋមន្ត្រី ហ៊ុន សែន កាលពីយប់ថ្ងៃទី២៣ កក្កដា បានប្តេជ្ញាចាក់វ៉ាក់សាំងកូវីដ១៩ឱ្យពលរដ្ឋ ទោះបីក្នុងតម្លៃណាក៏ដោយ ដើម្បីបង្កើនភាពស៊ាំនៅក្នុងសង្គមទប់ទល់នឹងជំងឺកូវីដ១៩។ ជាគោលដៅចាក់វ៉ាក់សាំងដល់ពលរដ្ឋ លោកហ៊ុនសែនថា នឹងធ្វើឱ្យបាន ១៣លាននាក់ ឬស្មើជាង ៨០%នៃចំនួនប្រជាជនកម្ពុជាសរុបដែលចំនួននេះជាចំនួនលើសពីផែនការចាក់វ៉ាក់សាំងបច្ចុប្បន្ន ដែលមានត្រឹម១០លាននាក់ និងសម្រេចបានជិត៧០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ