អ្នកជាប់ឃុំ នៅពន្ធនាគារបន្ទាយមានជ័យ១០នាក់មានផ្ទុកកូវីដដែលតា
យ៉ាងហោចណាស់មានអ្នកជាប់ឃុំចំនួន១០នាក់ នៅក្នុងពន្ធនាគារខេត្តបន្ទាយមានជ័យ រកឃើញផ្ទុកវីរុសដែលតា កាលពីពេលថ្មីៗនេះ។ សង្គមស៊ីវិលបានបង្ហាញក្ដីព្រួយបារម្ភបន្ទាប់ពីវីរុសដែលតា ចូលទៅដល់ពន្ធនាគារខណៈយន្តការដោះស្រាយបញ្ហាអ្នកទោសនិងអ្នកជាប់ឃុំនៅក្នុងពន្ធគារអំឡុងពេលកូវីដ១៩ នៅពុំទាន់មានដំណោះស្រាយក្រៅតែពីការចាក់វ៉ាក់សាំង។
ចុះផ្សាយនៅថ្ងៃ៖
ស្តាប់ - ០២:១០
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សាវនា បានប្រាប់វិទ្យុបារាំងអន្តរជាតិនៅថ្ងៃទី១កញ្ញានេះថា មុនរកឃើញអ្នកជាប់ឃុំទាំង១០នាក់ផ្ទុកវីរុសដែលតា ពន្ធនាគារបានដាក់ពួកគេធ្វើចត្តាឡីស័កដោយឡែកនិងបានធ្វើតេស្តរហ័សភ្លាមៗដែរ តែលទ្ធផលបង្ហាញមកថា អវិជ្ជមាន។បន្ទាប់ពីចត្តាឡីស័ក១៤ថ្ងៃតេស្តជាថ្មីក៏បង្ហាញថា ពួកគេវិជ្ជមានវីរុសដែលតាបន្ទាប់ពីពន្ធនាគារបញ្ជូនសំណាកអ្នកជាប់ឃុំទាំង១០នាក់មកវិភាគនៅភ្នំពេញ។ បើតាមលោក នុត សាវនា នៅថ្ងៃទី១កញ្ញានេះមន្ទីរពេទ្យបង្អែកក្រុងសេរីភណ្ឌក៏បានចុះយកសំណាកពួកគេជាថ្មីម្ដងទៀត និងបានបញ្ជូនសំណាកឡើងមកភ្នំពេញដើម្បីតាមដានអាការៈរបស់អ្នកជាប់ឃុំទាំង១០នាក់ធូរស្រាល ឬក៏មិនទាន់ធូរស្រាល។
លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូលើកឡើងថា នៅចំពោះមុខវត្តមានវីរុសដែលចូលទៅដល់ពន្ធគារបន្ថែមពីលើវីរុសកូវីដ១៩ដែលមានស្រាប់នេះ លោកចង់ឃើញភាគីពាក់ព័ន្ធពន្លឿនគោលនយោបាយ និងនីតិវិធីមានស្រាប់ របស់រដ្ឋាភិបាលក្នុងការជួយសម្រួលស្ថានភាពអ្នកទោសកុំឲ្យរងផលប៉ះពាល់ខ្លាំងពីជំងឺកូវីដ១៩។ ជាក់ស្ដែងការពន្លឿនការអនុវត្តទោសទៅតាមសេចក្ដីសម្រេចរបស់រដ្ឋាភិបាល ដោះលែងអ្នកជាប់ឃុំដែលជិតផុតទោសដោយភ្ជាប់ជាមួយលក្ខខណ្ឌ។ បន្ទាប់មកពិនិត្យលទ្ធភាពដោះលែងរាល់អ្នកជាប់ឃុំបណ្ដោះអាសន្ន ដែលកំពុងរងចាំសវនាការ និងពិនិត្យទៅលើជនជាប់ឃុំដែលកំពុងងាយរងគ្រោះ ដើម្បីឲ្យពួកគេបាននៅក្រៅឃុំបណ្ដោះអាសន្នដូចជាៈអនិតិជន ស្ត្រីមានផ្ទៃពោះ ជនពិការ និងអ្នកទោសមានជំងឺរាំរ៉ៃជាដើម។
បើតាមលោក អំ សំអាត បច្ចុប្បន្ននេះមានពន្ធនាគារ១០កន្លែងហើយនៅក្នុងប្រទេសកម្ពុជារកឃើញអ្នកទោសមានផ្ទុកវីរុសកូវីដ១៩។ តែអ្នកនាំពាក្យអគ្គនាយកដ្ឋានពន្ធនាគារអះអាង ក្នុងចំណោមពន្ធនាគារប្រមាណជា១០ដែលឆ្លងជំងឺកូវីដ-១៩កន្លងមក នៅមានតែពន្ធនាគារ៣ប៉ុណ្ណោះដែលកំពុងឆ្លងជំងឺកូវីដ-១៩ រួមមាន ពន្ធនាគារខេត្តបន្ទាយមានជ័យ ពន្ធនាគារខេត្តកំពង់ចាម និងពន្ធនាគារខេត្តត្បូងឃ្មុំ។
សូមជម្រាបជូនថា រាប់ចាប់តាំងពីប្រទេសកម្ពុជាជួបប្រទះព្រឹត្តការណ៍សហគមន៍២០កុម្ភៈមក មានអ្នកទោសម្នាក់ជាស្ត្រីវ័យជាង៦០ឆ្នាំ បានស្លាប់នៅក្នុងពន្ធនាគារខេត្តកំពង់ស្ពឺ បន្ទាប់ពីក្រុមគ្រូពេទ្យរកឃើញថាស្ត្រីរូបនោះ បានឆ្លងមេរោគកូវីដ-១៩។ អ្នកកំពុងជាប់ឃុំក្នុងពន្ធនាគារនៅទូទាំងប្រទេសចំនួន១១៤០០នាក់ក្នុងចំណោមអ្នកជាប់ឃុំសរុបប្រមាណ៣៨០០០នាក់ បានទទួលការចាក់វ៉ាក់សាំងបង្ការជំងឺកូវីដ១៩កាលពីខែកក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ