គ្រួសារបុរសដែលស្លាប់ បន្ទោសមន្ត្រីពន្ធនាគារថាយឺតយ៉ាវក្នុងការបញ្ជូនជនរងគ្រោះទៅព្យាបាល
អ្នកនាំពាក្យអគ្គនាយដ្ឋានពន្ធនាគារទទួលស្គាល់ពីភាពយឺយ៉ាវនៃការជូនដំណឹងទៅកាន់ក្រុមគ្រួសារ ករណីដែលអ្នកជាប់ឃុំម្នាក់មានជំងឺ ហើយដែលបានស្លាប់ក្រោយពីបញ្ជូនទៅព្យាបាលនៅមន្ទីរពេទ្យបាន២ថ្ងៃ។ ការបកស្រាយរបស់មន្ត្រីពន្ធនាគារបែបនេះ គឺជាការឆ្លើយតបនឹងការលើកឡើងរបស់គ្រួសារជនរងគ្រោះ ដែលថាខាងពន្ធនាគារមិនអនុញ្ញាតឲ្យយកអ្នកជំងឺទៅព្យាបាលក្រៅពន្ធនាគារ ដោយទុករហូតដល់អ្នកជំងឺធ្លាក់ខ្លួនឈឺធ្ងន់មិនអាចសង្គ្រោះបាន។
ចុះផ្សាយនៅថ្ងៃ៖
ស្តាប់ - ០២:១២
លោក នុត សវនា អ្នកនាំពាក្យអគ្គនាយកដ្ឋានពន្ធនាគារប្រាប់វិទ្យុបារាំងអន្តរជាតិRFIថា លទ្ធផលនៃការធ្វើកោសល្យវិច្ច័យរបស់ក្រុមគ្រូពេទ្យបញ្ជាក់ថាការស្លាប់របស់ឈ្មោះ ប៊ុន ចាន់សិដ្ឋ គឺដោយសារគាំងបេះដូង។ បើតាមលោកដឹង បុរសរូបនេះមានជំងឺប្រចាំកាយតាំងពីមុនពេលជាប់ឃុំមកម៉្លេះ ដោយមានលើសជាតិអាស៊ីត អាលែកហ្ស៊ី ហើយចុងក្រោយមានការតឹងទ្រូងពិបាកដកដង្ហើម។ លោកថាខាងពន្ធនាគារបានអនុញ្ញាតឲ្យអ្នកជាប់ឃុំរូបនេះ ទៅសម្រាកនៅមណ្ឌលសុខភាពក្នុងពន្ធនាគារជាច្រើនថ្ងៃ តែចុងក្រោយអ្នកជំងឺមានអាការៈធ្ងន់ក៏សម្រេចបញ្ជូនទៅមន្ទីរពេទ្យជ័យជំនះបានតែ២ថ្ងៃក៏ស្លាប់។
ប៉ុន្តែភរិយាសកម្មជនដីធ្លីរូបនេះ និយាយថា កន្លងមកគាត់តែងតែព្រួយបារម្ភពីសុខភាពរបស់ប្តី និងបានស្នើមន្ត្រីពន្ធនាគារអនុញ្ញាតឲ្យយកប្តីចេញទៅព្យាបាលជំងឺខាងក្រៅពន្ធនាគារ ប៉ុន្តែមន្ត្រីពន្ធនាគារតែងតែបដិសេធដោយលើកឡើងថា ខាងពន្ធនាគារមានគ្រូពេទ្យពិនិត្យជំងឺហើយ។ លោក នុត សវនាការ ទទួលស្គាល់ថា ខាងពន្ធនាគារ«មានកំហុស»ត្រង់ការយឺតយ៉ាវនៃការជូនដំណឹងទៅកាន់ក្រុមគ្រួសារ ដោយសារមានការមមាញឹកច្រើន។ ប៉ុន្តែលោកចាត់ទុកការលើកឡើងរបស់ក្រុមគ្រួសារសពថា មានលក្ខណៈលំអៀង។
សូមបញ្ជាក់ថា លោក ប៊ុន ចាន់សិដ្ឋ គឺពលរដ្ឋម្នាក់ក្នុងចំណោមអ្នកមានបញ្ហាដីធ្លី២នាក់ផ្សេងទៀត ដែលសមត្ថកិច្ចខេត្តកណ្តាលចាប់ខ្លួនកាលពីថ្ងៃទី២ ខែកក្កដា ពាក់ព័ន្ធនឹងបញ្ហាដីធ្លីមួយកន្លែង នៅស្រុកស្អាង បន្ទាប់ពីពួកគាត់ចេញមុខការពារដីស្រែពលរដ្ឋសរុបទំហំ ១៧៥ហិកតា កាលពីចុងខែមិថុនា ដែលមានឈ្មួញមិនស្គាល់អត្តសញ្ញាណបានរំលោភយកដីនោះ។ ចៅក្រមស៊ើបសួរនៃសាលាដំបូងខេត្តកណ្ដាល បានសម្រេចឃុំខ្លួនពលរដ្ឋទាំង៣នាក់នោះ ក្រោមបទចោទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ដោយឡែក អ្នកការពារសិទ្ធិមនុស្សនៃអង្គការលីកាដូ លោក អំ សំអាត គូសបញ្ជាក់ថា អ្នកជាប់ឃុំមានសិទ្ធិទទួលបានសេវាសុខភាពដូចពលរដ្ឋធម្មតាដែរ ដោយគ្មាននរណាដកហូតសិទ្ធិនេះបានទេ។ ការបណ្តោយឲ្យអ្នកជាប់ឃុំធ្លាក់ខ្លួនឈឺធ្ងន់ធ្ងរនៅក្នុងពន្ធនាគារ ហើយទើបបញ្ជូនទៅព្យាបាល គឺជាការបំពានសិទ្ធិទទួលបានសេវាសុខភាពរបស់អ្នកជាប់ឃុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ