ស្ថានភាពភ្នែកស្តាំលោករ៉ុង ឈុន មើលឃើញឡើងវិញបាន៥០% ក្រោយទទួលការវះកាត់ដោយជោគជ័យ
ស្ថានភាពភ្នែកស្តាំលោក រ៉ុង ឈុន អាចមើលឃើញឡើងវិញ៥០%ហើយ បន្ទាប់ពីទទួលបានការវះកាត់ដោយជោគជ័យ កាលពីថ្ងៃពុធសប្តាហ៍កន្លងទៅ នៅឯមន្ទីរពេទ្យរុស្ស៊ី។ នេះបើតាមការបញ្ជាក់ពីលោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ប្រាប់វិទ្យុបារាំងអន្តរជាតិនៅព្រឹកថ្ងៃពុធទី២២កញ្ញានេះ។ បើទោះបីជាវះកាត់ដោយជោគជ័យពិតមែន តែបើតាមលោកស្រីអ៊ុក ឆាយ៉ាវី លោកស្រី និងក្រុមគ្រួសារលោករ៉ុង ឈុន នៅតែព្រួយបារម្ភពីបញ្ហាចំពោះមុខ ដ្បិតថាលោករ៉ុង ឈុន ត្រូវបានបញ្ជូនទៅសម្រាកនៅពន្ធនាគារវិញ ក្រោយការវះកាត់។ តែយ៉ាងណា អ្នកនាំពាក្យពន្ធនាគារបានបញ្ជាក់ថា មិនមានអ្វីត្រូវព្រួយបារម្ភនោះទេ ព្រោះពន្ធនាគារមានមន្រ្តីសុខាភិបាលមើលថែដិតដល់។
ចុះផ្សាយនៅថ្ងៃ៖
ស្តាប់ - ០២:២៥
បើទោះបីជាការវះកាត់ទទួលបានជោគជ័យ ហើយភ្នែកស្តាំលោករ៉ុង ឈុន មេដឹកនាំសហជីព និងជាអតីតប្រធានសមាគមគ្រូបង្រៀនកម្ពុជាឯករាជ្យចាប់ផ្តើមមើលឃើញឡើងវិញជាបណ្តើរៗក្តី ក៏ប៉ុន្តែសម្រាប់លោកស្រីអ៊ុក ឆាយ៉ាវី និងក្រុមគ្រួសារលោករ៉ុង ឈុន នៅតែដាក់ការព្រួយបារម្ភពីបញ្ហាដែលអាចកើតមាននៅពេលខាងមុខ ដោយហេតុថាលោករ៉ុង ឈុន មិនអាចបន្តទទួលបានសេវាថែទាំពីមន្ទីរពេទ្យខាងក្រៅ ហើយត្រូវបញ្ជូនទៅកាន់ពន្ធនាគារវិញភ្លាមៗ ក្រោយការវះកាត់បានជោគជ័យ។
សម្រាប់លោកស្រីអ៊ុក ឆាយ៉ាវី នេះក៏ព្រោះតែនៅក្នុងពន្ធនាគារ លោករ៉ុង ឈុន មិនអាចទទួលបានការមើលថែដិតដល់ ហើយបញ្ហាបរិយាកាសនិងអនាម័យក្នុងពន្ធនាគារ ក៏ជាក្តីកង្វល់មួយទៀតដែរ ព្រោះបើតាមលោកស្រីអ៊ុក ឆាយ៉ាវី អ្នកដែលទទួលការវះកាត់ភ្នែក ត្រូវតែមានអ្នកមើលថែដិតដល់ និងធ្វើអនាម័យខ្ពស់។ ក្រៅពីសុខភាពភ្នែក លោកស្រីអ៊ុក ឆាយ៉ាវី អះអាងថាសុខភាពលោករ៉ុង ឈុន ក៏មានសភាពទ្រុឌទ្រោមខ្លះដែរ ដោយលោករ៉ុង ឈុន មានសភាពស្លេកស្លាំង ខុសពីពេលដែលលោកស្រី ធ្លាប់បានឃើញកាលពីតុលាការប្រកាសសាលក្រម នៅពាក់កណ្តាលខែសីហាកន្លងទៅ។
ក៏ប៉ុន្តែ លោកនុត សាវនា អ្នកនាំពាក្យពន្ធនាគារ បានគូសបញ្ជាក់ថា បច្ចុប្បន្នលោករ៉ុង ឈុន បានដាក់ឲ្យសម្រាកក្នុងប៉ុស្ត៍សុខភាពនៃពន្ធនាគារ ជាមួយអ្នកជំងឺផ្សេងៗទៀត ដោយមានការរក្សាគម្លាតត្រឹមត្រូវ។ តាមលោកនុត សាវនា ក្នុងប៉ុស្ត៍សុខភាពគឺមានទាំងមន្ត្រីជំនាញ និងមន្ត្រីសុខាភិបាល មើលថែយ៉ាងដិតដល់ ហើយបើនិយាយពីលក្ខខណ្ឌសុវត្ថិភាព ក៏ប៉ុស្តិ៍សុខភាពក្នុងពន្ធនាគារមានសុវត្ថិភាពដែរ ដោយហេតុថាមិនសូវមានមនុស្សប្លែកចេញចូលប្រាស្រ័យទាក់ទង ខុសគ្នាពីមន្ទីរពេទ្យខាងក្រៅ។
អ្នកនាំពាក្យពន្ធនាគាររូបនេះ បានបន្តទៀតថា មន្ត្រីសុខាភិបាលក្នុងពន្ធនាគារ បានយកចិត្តទុកដាក់ថែទាំលោករ៉ុង ឈុន ជាជាងពួកគេថែទាំខ្លួនឯងទៅទៀត។ ក៏ប៉ុន្តែលោករ៉ុង ឈុន បានលួចអានសៀវភៅជាញឹកញយ ខុសពីការណែនាំរបស់ក្រុមមន្ត្រីជំនាញ ក្រោយទទួលបានការវះកាត់ ហើយនិយាយដល់ត្រង់ចំណុចអនាម័យវិញ លោកនុត សាវនា អះអាងថា គឺលោករ៉ុង ឈុន ខ្លួនឯងមិនសូវប្រតិបត្តិអនាម័យបានល្អប៉ុន្មាននោះទេ។
គួរជម្រាបថា លោករ៉ុង ឈុន ត្រូវបានសាលាដំបូងរាជធានីភ្នំពេញនៅថ្ងៃទី១៨សីហា២០២១ សម្រេចផ្តន្ទាទោសដាក់ពន្ធនាគារចំនួន២ឆ្នាំនិងពិន័យជាប្រាក់ចូលរដ្ឋ២លាន ព្រមទាំងបង្គាប់ឲ្យរួមគ្នាសងជំងឺចិត្តទៅគណៈកម្មាធិការកិច្ចព្រំដែនកម្ពុជាចំនួន៤០០លានរៀលឬប្រហាក់ប្រហែលនឹង១០ម៉ឺនដុល្លារ ជុំវិញការរិះគន់បញ្ហាព្រំដែនកម្ពុជា-វៀតណាម នៅឯខេត្តត្បូងឃ្មុំ កាលពីឆ្នាំ២០២០កន្លងទៅ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ