របាយការណ៍ខេមបូចា៖ អ្នកកាសែត៨នាក់រងការគំរាមកំហែង និងម្នាក់ជាប់ពន្ធនាគារ ក្នុងរយៈពេលត្រីមាសទី៣នេះ
សម្ព័ន្ធអ្នកសារព័ត៌មានកម្ពុជា(ខេមបូចា)នាព្រឹកថ្ងៃទី១៩តុលានេះ បានចេញរបាយការណ៍ថ្មីប្រចាំត្រីមាសទី៣ឆ្នាំ២០២១ ដោយបានបង្ហាញអំពីការយាយីរបស់អ្នកកាសែតអំឡុងពេលបម្រើការងារ។ ក្នុងនោះ អ្នកកាសែតចំនួន៨នាក់ រងការគំរាមកំហែង ការឃាត់ខ្លួន និងម្នាក់បញ្ចូនទៅកាន់ពន្ធនាគារពីសំណាក់អាជ្ញាធរ។ ជុំវិញរបាយការណ៍នេះ សម្ព័ន្ធអ្នកសារព័ត៌មានកម្ពុជានៅតែបន្តស្នើឱ្យអាជ្ញាធរគោរពសិទ្ធសេរីភាពអ្នកសារព័ត៌មាននៅក្នុងប្រទេសកម្ពុជាបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៣៤
ក្នុងរបាយការណ៍ថ្មីមួយរបស់សម្ព័ន្ធអ្នកសារព័ត៌មានកម្ពុជាស្តីអំពីស្ថានភាពអ្នកសារព័ត៌មានកម្ពុជាបានបង្ហាញឱ្យដឹងថា អ្នកសារព័ត៌មានចំនួន៩នាក់ ក្នុងចំណោម ២១នាក់ត្រូវបានរងការគំរាមកំហែង ការរំលោភសិទ្ធបញ្ចេញមតិដោយសេរីរបស់ពួកគេក្នុងអំឡុងពេញបំពេញកិច្ចការងារ ខណៈ៨នាក់ត្រូវបានយាយី និងម្នាក់ត្រូវបានកាត់ទោសឱ្យជាប់ពន្ធនាគារ។
ក្នុងនោះ បើតាមរបាយការណ៍ដដែល ការយាយី និងធ្វើទុកបុកទម្នេញទៅលើអ្នកសារព័ត៌មានទាំង៩ករណី នោះ ភាគីច្រើន គឺកើតឡើងនៅពេលដែលពួកគេធ្វើការរាយការណ៍អំពីបញ្ហាជម្លោះដីធ្លី រួមទាំងករណីគម្រោងអភិវឌ្ឍព្រលានយន្តហោះថ្មីនៅក្នុងខេត្តកណ្តាលជាដើម។
ជាក់ស្តែង អ្នកសារព័ត៌មាន១នាក់ ក្នុងចំណោម៩នាក់ដែលរងការយាយីពីអាជ្ញាធរ នឹងត្រូវបានផ្តន្ទាទោសពីបទញុះញង់ និងសម្រេចដាក់ពន្ធនាគាររយៈពេល១ឆ្នាំ ដោយពិន័យជាប្រាក់ប្រមាណ៥០០ដុល្លារ ក្រោយអ្នកសារព័ត៌មានរូបនេះផ្សាយព័ត៌មានពាក់ព័ន្ធនិងជម្លោះដីធ្លីនៅឯឧទ្យានជាតិបុទុមសាគរ។ បន្ថែមពីនេះ អ្នកសារព័ត៌មានចំនួន២នាក់ត្រូវបានបញ្ឈប់ និងរងការគំរាមកំហែងពីសំណាក់ប៉ូលីស និងអាជ្ញាធរតាមមូលដ្ឋាន ក្នុងអំឡុងពេលពួកគេចុះយកព័ត៌មាននៅទីតាំងមានបញ្ហាជម្លោះដីធ្លីរបស់ប្រជាពលរដ្ឋនៅតំបន់បឹងតាមោក។ និងអ្នកសារព័ត៌មាន៣នាក់ផ្សេងទៀតត្រូវបានអាជ្ញាធរឃាត់ខ្លួនយកទៅសួរចម្លើយ និងធ្វើកិច្ចសន្យាបញ្ឈប់ការផ្សព្វផ្សាយនៅទីតាំងដូចគ្នាដដែល។
របាយការណ៍របស់សម្ព័ន្ធអ្នកសារព័ត៌មានដដែលក៏បានឱ្យដឹងថែមទៀតថា ចំពោះករណីជម្លោះដីធ្លីនៅព្រលានយន្តហោះអន្តរជាតិថ្មីស្ថិតនៅក្នុងខេត្តកណ្តាលវិញក៏មានករណីយាយីពីអាជ្ញាធរបានកើតឡើងចំនួន៣ករណីផងដែរ។
ជុំវិញ របាយការណ៍ស្តីពីស្ថានភាពអ្នកសារព័ត៌មាននេះ សម្ព័ន្ធអ្នកសារព័ត៌មានកម្ពុជាបានទទូច និងបន្តស្នើឱ្យអាជ្ញាធរគោរពសេរីភាពសារព័ត៌មាន និងប្រើប្រាស់វិធានការដែលមិនមែនជាបទចោទព្រហ្មទណ្ឌ ក្នុងការកែតម្រូវសេចក្តីរាយការណ៍ណាមួយដែលត្រូវបានចោទថា មិនត្រឹមត្រូវ។
សូមរំលឹកថា កាលពីដើមខែសីហា ក្រសួងព័ត៌មានបានសម្រេចបង្កើតគណៈកម្មការតាមដាន វាយតម្លៃ និងលើកសរសើរ ការអនុវត្តក្រមសីលធម៌វិជ្ជាជីវៈសារព័ត៌មាន និងដាក់វិន័យទៅលើអ្នកសារព័ត៌មានរូបណាដែលដែលប្រព្រឹត្តខុស ពីក្រមសីលធម៌ វិជ្ជាជីវៈ តាមច្បាប់ស្តីពីរបបសារព័ត៌មាន។ ប៉ុន្តែ ជាការឆ្លើយតប សម្ព័ន្ធអ្នកសារព័ត៌មានគ្មានព្រំដែនបានចាត់ទុកការបង្កើតគណៈកម្មការនេះឡើងថា ខ្វះភាពឯករាជ្យ តម្លាភាព និងការទទួលខុសត្រូវ និងថា គណៈកម្មការនេះត្រូវបានបង្កើតឡើង ដើម្បីជាយន្តការត្រួតពិនិត្យ និងឃ្លាំមើលថ្មីមួយទៅលើអ្នកកាសែតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ