មេដឹកនាំនយោបាយលើកឡើងស្រដៀងគ្នាពីសារៈសំខាន់នៃកិច្ចព្រមព្រៀងសន្តិភាពទីក្រុងប៉ារីស តែខ្លះថាកម្ពុជាមិនបានធ្វើតាមកិច្ចព្រមព្រៀង
នៅក្នុងឱកាសខួបទី៣០នៃកិច្ចព្រមព្រៀងសន្តិភាពទីក្រុងប៉ារីស ២៣តុលានេះ អ្នកនយោបាយខ្មែរដែលមាននិន្នាការនយោបាយផ្សេងៗគ្នា និងព្រះបរមរាជវាំង បានសរសេរសាររំឭកដល់ទិវានេះ នៅលើបណ្តាញសង្គមហ្វេសប៊ុករៀងៗខ្លួន។ ភ្ជាប់នឹងការរំឭកខួបនេះ សាររបស់ពួកគេបានលើកឡើងពីសារៈសំខាន់នៃកិច្ចព្រមព្រៀងសន្តិភាពទីក្រុងប៉ារីស និងការអំពាវនាវអោយបន្តមានការរួបរួមជាតិ។ ចំណែកលោក សម រង្ស៊ី អតីតប្រធានអតីតគណបក្សសង្គ្រោះជាតិវិញថា កម្ពុជាមិនបានធ្វើតាមកិច្ចព្រមព្រៀងនេះនៅឡើយទេ។
ចុះផ្សាយនៅថ្ងៃ៖
ស្តាប់ - ០២:៤៨
នៅព្រឹកថ្ងៃទី២៣ តុលានេះ ព្រះបរមរាជវាំងតាមរយៈទំព័រហ្វេសប៊ុក Royal du Cambodge បានអបអរសាទរខួបអនុស្សាវរីយ៍លើកទី ៣០ឆ្នាំ នៃសន្ធិសញ្ញាសន្តិភាពទីក្រុងប៉ារីស ២៣ តុលា ១៩៩១ - ២៣ តុលា ២០២១។
បើតាម ព្រះបរមរាជវាំង ខួបលើកទី ៣០ នៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ គឺជាថ្ងៃដែលប្រទេសកម្ពុជាទទួលបានបានសន្តិភាព ការបង្រួបបង្រួមជាតិ និងការស្ដារអធិបតេយ្យភាពរបស់ខ្លួនជូនប្រទេសឡើងវិញ ដោយមានការរួមចំណែកដ៏សំខាន់ពីសំណាក់ សម្តេចព្រះ នរោត្តម សីហនុ។ សម្ដេចព្រះបរមរតនកោដ្ឋ នរោត្តម សីហនុ ដែលមានព្រះរាជតួនាទីដ៏ឧត្តុង្គឧត្តម ក្នុងដំណើរការស្វែងរកសន្តិភាពជូនកម្ពុជា។
ចំណែក លោកនាយករដ្ឋមន្ត្រីហ៊ុន សែនវិញ ក៏បានសម្តែងការអបអរសាទរខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស នៅលើគេហទំព័រហ្វេសប៊ុកផ្លូវការរបស់លោកផងដែរ។ លោកហ៊ុន សែន បានសរសេរថា ៣០ឆ្នាំមុន ពោលគឺនៅថ្ងៃទី២៣ តុលា ឆ្នាំ១៩៩១ ភាគីទាំង៤ របស់កម្ពុជារួមមាន លោកនាយករដ្ឋមន្ត្រី តំណាងឲ្យរដ្ឋាភិបាលកម្ពុជា, ចលនាតស៊ូហ៊្វុនស៊ីនប៉ិច តំណាងដោយសម្តេចព្រះ នរោត្តម សីហនុ និងសម្តេចក្រុមព្រះ នរោត្តម រណប្ញទ្ឋិ, រណសិរ្សជាតិរំដោះប្រជាពលរដ្ឋខ្មែរ តំណាងដោយ លោក សឺន សាន, និង ក្រុមចលនាកម្ពុជាប្រជាធិបតេយ្យតំណាងដោយ លោក ខៀវ សំផន បានឈានទៅចុះហត្ថលេខា លើកិច្ចព្រមព្រៀងសន្តិភាព នៅទីក្រុងប៉ារីស ប្រទេសបារាំង ក្រោមវត្តមានសាក្សីមកពី១៨ប្រទេស រួមទាំងអគ្គលេខាធិការអង្គការសហប្រជាជាតិ (UN) ផងដែរ ដើម្បីបញ្ចប់សង្រ្គាមស៊ីវិលនៅកម្ពុជា។
លោក ហ៊ុន សែនបានបន្តថា ទោះបីមានកិច្ចព្រមព្រៀងសន្តិភាពប៉ារីសក៏ដោយ ប៉ុន្តែសង្រ្គាមស៊ីវិលនៅកម្ពុជា នៅតែបន្តដែលបង្កដោយភាគីកម្ពុជាប្រជាធិបតេយ្យ ហើយសង្គ្រាមនេះក៏បានបញ្ចប់ទាំងស្រុង នៅឆ្នាំ១៩៩៨ ដែលកម្ពុជាទូទាំងប្រទេស បានស្គាល់នូវសន្តិភាពពេញលេញមកដល់សព្វថ្ងៃ។
ដោយឡែក លោក កឹម សុខា ដែលជាប្រធានអតីតគណបក្សសង្គ្រោះជាតិបានលើកឡើងថា ប្រជាពលរដ្ឋខ្មែរត្រូវតែផ្តល់តម្លៃនិងគោរពដល់ស្មារតីនៃកិច្ចព្រមព្រៀងនេះ។ តាមរយៈការផ្តល់តម្លៃ និងគោរពដល់ស្មារតីនៃកិច្ចព្រមព្រៀងនេះ ប្រទេសកម្ពុជានិងប្រជាពលរដ្ឋខ្មែរ អាចទាញយកផលប្រយោជន៍បានជាច្រើន មិនមែនត្រឹមតែផ្នែកហិរញ្ញវត្ថុនោះទេ និងក៏មិនចាំបាច់ពឹងផ្អែកលើតែប្រទេសមួយនោះដែរ។ ជាពិសេសកិច្ចព្រមព្រៀងនេះ អាចជួយធានាការពារនូវអធិបតេយ្យភាព ឯករាជ្យបូរណភាពទឹកដី និង ដំណើរការប្រជាធិបតេយ្យសេរីពហុបក្ស ស្របតាមរដ្ឋធម្មនុញ្ញកម្ពុជាទៀតផង។ នេះបើតាមលោក កឹម សុខា។
យ៉ាងណាក៏ដោយ សម្រាប់ លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ, លោកយល់ឃើញថា កម្ពុជាមិនបានធ្វើតាមកិច្ចព្រមព្រៀងនេះនៅឡើយទេ។ ក្នុងន័យនេះ លោកធ្លាប់បានចេញសារអំពាវនាវដល់ពិភពលោកទាំងមូល កុំឲ្យទទួលស្គាល់ការបោះឆ្នោតរបស់កម្ពុជានាពេលខាងមុខ ប្រសិនបើការបោះឆ្នោត នោះ មិនស្របទៅនឹងការកំណត់នៅក្នុងកិច្ចព្រមព្រៀងសន្តិភាពទីក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ