លោក កើត រិទ្ធ៖ បើជនណាប្រព្រឹត្តបទល្មើសមិនធ្ងន់ធ្ងរ តុលាការគួរដាក់ជននោះ នៅក្រៅឃុំបណ្តោះអាសន្ន
បើជនណាប្រព្រឹត្តបទល្មើសមជ្ឈិម ដែលមិនធ្ងន់ធ្ងរ តុលាការ គួរជ្រើសរើសយកការដាក់ជននោះ ឲ្យនៅក្រៅឃុំបណ្តោះអាសន្ន ជាជាងការជ្រើសរើសយកការឃុំខ្លួន។ នេះជាការណែនាំរបស់រដ្ឋមន្រ្តីយុត្តិធម៌ ទៅគ្រប់តុលាការជាន់ទាប តាមរយៈសេចក្តីណែនាំ ចុះថ្ងៃទី២៥ ខែតុលា ឆ្នាំ២០២១។ បើតាម លោក កើត រិទ្ធ ការដាក់ជនល្មើសក្នុងបទមជ្ឈិមកម្រិតស្រាល ឲ្យនៅក្រៅឃុំបណ្តោះអាសន្ន គឺជាការរួមចំណែកដ៏សំខាន់ដល់ការកាត់បន្ថយភាពចង្អៀតណែនក្នុងពន្ធនាគារផងដែរ។
ចុះផ្សាយនៅថ្ងៃ៖
ស្តាប់ - ០២:១៥
សេចក្តីណែនាំបែបនេះរបស់លោក កើត រិទ្ធ រដ្ឋមន្ត្រីក្រសួងយុត្តិធម៌ ត្រូវបានផ្ញើទៅគ្រប់ប្រធានតុលាការរាជធានី-ខេត្ត និងគ្រប់ព្រះរាជអាជ្ញា ដែលជាប្រធានស្ថាប័នអយ្យការអមតុលាការរាជធានី-ខេត្ត។ ដើម្បីពន្លឿនចំណាត់ការលើសំណុំរឿង និងដើម្បីកាត់បន្ថយការកកស្ទះសំណុំរឿងក្នុងដំណាក់កាលស៊ើបសួរ លោក កើត រិទ្ធ ស្នើឲ្យស្ថាប័នអយ្យការ ផ្តល់អាទិភាពលើការប្រើវិធីចោទប្រកាន់ចំពោះបទមជ្ឈិម «តាមរយៈការបញ្ជូនទៅជំនុំជម្រះផ្ទាល់» ដោយផ្អែកតាមអង្គហេតុក្នុងសំណុំរឿងនីមួយៗ។
បើតាមក្រសួងយុត្តិធម៌ កន្លងមក វិធានការនៃការដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ មិនសូវបានប្រើឲ្យទូលំទូលាយ តាមស្របតាមស្មារតីនៃក្រមព្រហ្មទណ្ឌនៅឡើយ។ ជាទូទៅចៅក្រមស៊ើបសួរបានប្រើឆន្ទានុសិទ្ធិរបស់ខ្លួនក្នុងការសម្រេចជ្រើសរើសយកការឃុំខ្លួនបណ្តោះអាសន្នជាវិធានការ«និរន្តរាយ» ដើម្បីធានាដល់ដំណើរការស៊ើបសួរ ដែលជាកត្តារួមចំណែកនាំឲ្យមានការកើនឡើងនៃជនជាប់ឃុំនៅតាមពន្ធនាគារ។
ដូច្នេះ ដើម្បីជំរុញឲ្យតុលាការ ដំណើរការសំណុំរឿងនីមួយៗឲ្យបានលឿន និងប្រកបដោយប្រសិទ្ធភាព ដែលជាហេតុនាំឲ្យយុទ្ធនាការដោះស្រាយការកកស្ទះសំណុំរឿងតាមតុលាការ ទទួលបានជោគជ័យ ក្រសួងយុត្តិធម៌ ណែនាំឲ្យអនុវត្តនូវវិធានការ«និរន្តរាយ»ក្នុងដំណាក់កាលចៅក្រមស៊ើបសួរ។ ចៅក្រមស៊ើបសួរ គប្បីយកចិត្តទុកដាក់ពន្លឿននីតិវិធីស៊ើបសួរឲ្យបានឆាប់រហ័សដោយស្មារតីទទួលខុសត្រូវចំពោះមុខច្បាប់។
លើសពីនេះទៀត ចៅក្រមស៊ើបសួរ គប្បីប្រើឆន្ទានុសិទ្ធិរបស់ខ្លួនក្នុងការអនុវត្តន៍ឲ្យបានត្រឹមត្រូវតាមមាត្រា២០៣ និងមាត្រាដែលពាក់ព័ន្ធនៃក្រមនីតិវិធីព្រហ្មទណ្ឌ ទាក់ទងនឹងការឃុំខ្លួនបណ្តោះអាសន្ន ពិសេសគោលករណ៍សេរីភាពជាចម្បង និងគោលការណ៍គ្មានទោស។
ក្រសួងយុត្តិធម៌បានគូសបញ្ជាក់ទៀតថា ការឃុំខ្លួនបណ្តោះអាសន្ន គឺគប្បីអនុវត្តតែចំពោះបទឧក្រិដ្ឋ ឬបទមជ្ឈិមដែលមានលក្ខណៈស្មុគស្មាញ និងធ្ងន់ធ្ងរ ហើយមានចែងក្នុងនីតិវីធីព្រហ្មទណ្ឌ ពិសេសការឃុំខ្លួននោះ គឺក្នុងមធ្យោបាយតែមួយគត់ដើម្បីធានាដល់ដំណើរការនៃការស៊ើបសួរប៉ុណ្ណោះ។
ក្រៅពីណែនាំឲ្យតុលាការគួរជ្រើសរើសការដាក់ជនល្មើសឲ្យនៅក្រៅឃុំសម្រាប់បទល្មើសមិនធ្ងន់ធ្ងរ ក្រសួងយុត្តិធម៌ក៏បានណែនាំផងដែរ ឲ្យតុលាការពន្លឿនបើកសវនាការ និងចេញសាលក្រមឲ្យបានឆាប់រហ័សប្រកបដោយស្មារតីទទួលខុសត្រូវចំពោះមុខច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ