ក្រសួងយុត្តិធម៌ប្រាប់តុលាការឲ្យបន្តអនុវត្តគោលការណ៍មួយចំនួនដើម្បីដោះស្រាយភាពចង្អៀតក្នុងពន្ធនាគារ
ជាថ្មីម្តងទៀត ក្រសួងយុត្តិធម៌ កាលពីថ្ងៃទី២៥តុលា បានចេញណែនាំជាថ្មី ដល់ប្រធានសាលាដំបូង ព្រះរាជអាជ្ញាអមសាលាដំបូង រាជធានី-ខេត្ត ឲ្យពន្លឿនចំណាត់ការនីតិវិធី នៅក្នុងដំណាក់កាលអយ្យការ ដំណាក់កាលស៊ើបសួរ និងដំណាក់កាលជំនុំជម្រះ។ ការណែនាំបែបនេះ ដើម្បីរួមចំណែកដោះស្រាយភាពចង្អៀតណែនក្នុងពន្ធនាគារ ពិសេសក្នុងបរិបទកូវីដ ១៩។ បើតាមអ្នកនាំពាក្យក្រសួងយុត្តិធម៌ ទោះបីជាយុទ្ធនាការដោះស្រាយភាពចង្អៀតណែនក្នុងពន្ធនាគារត្រូវបញ្ចប់ តែសាលាដំបូង រាជធានី-ខេត្ត នៅតែត្រូវអនុវត្តគោលការណ៍នេះបន្តទៀត។
ចុះផ្សាយនៅថ្ងៃ៖
ស្តាប់ - ០១:៥១
គោលការណ៍៣ចំណុចសំខាន់ៗ ដែលដាក់ចេញដោយរដ្ឋមន្ត្រីក្រសួងយុត្តិធម៌នោះ គឺបើជនណាប្រព្រឹត្តបទល្មើសមជ្ឈិម ដែលមិនធ្ងន់ធ្ងរ តុលាការ គួរជ្រើសរើសយកការដាក់ជននោះ ឲ្យនៅក្រៅឃុំបណ្តោះអាសន្ន ជាជាងការជ្រើសរើសយកការឃុំខ្លួន។
បើតាមក្រសួងយុត្តិធម៌ កន្លងមក វិធានការនៃការដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ មិនសូវបានប្រើឲ្យទូលំទូលាយ តាមស្របតាមស្មារតីនៃក្រមព្រហ្មទណ្ឌនៅឡើយ។ ជាទូទៅចៅក្រមស៊ើបសួរបានប្រើឆន្ទានុសិទ្ធិរបស់ខ្លួនក្នុងការសម្រេចជ្រើសរើសយកការឃុំខ្លួនបណ្តោះអាសន្នជាវិធានការ«និរន្តរាយ» ដើម្បីធានាដល់ដំណើរការស៊ើបសួរ ដែលជាកត្តារួមចំណែកនាំឲ្យមានការកើនឡើងនៃជនជាប់ឃុំនៅតាមពន្ធនាគារ។
លើសពីនេះទៀត ចៅក្រមស៊ើបសួរ គប្បីប្រើឆន្ទានុសិទ្ធិរបស់ខ្លួនក្នុងការអនុវត្តន៍ឲ្យបានត្រឹមត្រូវតាមមាត្រា២០៣ និងមាត្រាដែលពាក់ព័ន្ធនៃក្រមនីតិវិធីព្រហ្មទណ្ឌ ទាក់ទងនឹងការឃុំខ្លួនបណ្តោះអាសន្ន ពិសេសគោលករណ៍សេរីភាពជាចម្បង និងគោលការណ៍គ្មានទោស។
ចំណែកគោលការណ៍ទី២ ដើម្បីកាត់បន្ថយការកកស្ទះសំណុំរឿងក្នុងដំណាក់កាលស៊ើបសួរ លោក កើត រិទ្ធ ស្នើឲ្យស្ថាប័នអយ្យការ ផ្តល់អាទិភាពលើការប្រើវិធីចោទប្រកាន់ចំពោះបទមជ្ឈិម «តាមរយៈការបញ្ជូនទៅជំនុំជម្រះផ្ទាល់» ដោយផ្អែកតាមអង្គហេតុក្នុងសំណុំរឿងនីមួយៗ។
រីឯគោលការណ៍ទី៣ ក្រសួងយុត្តិធម៌ក៏បានណែនាំផងដែរ ឲ្យតុលាការពន្លឿនបើកសវនាការ និងចេញសាលក្រមឲ្យបានឆាប់រហ័សប្រកបដោយស្មារតីទទួលខុសត្រូវចំពោះមុខច្បាប់។
ការណែនាំទាំងនេះរបស់ក្រសួងយុត្តិធម៌ ដើម្បីរួមចំណែកដោះស្រាយភាពចង្អៀតណែនក្នុងពន្ធនាគារ ពិសេសក្នុងបរិបទកូវីដ ១៩នេះ។ បើតាមអ្នកនាំពាក្យក្រសួងយុត្តិធម៌ ទោះបីជាយុទ្ធនាការដោះស្រាយភាពចង្អៀតណែនក្នុងពន្ធនាគារត្រូវបញ្ចប់ តែសាលាដំបូង រាជធានី-ខេត្ត នៅតែត្រូវគោលការណ៍នេះបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ