សកម្មជនសង្គម និងនយោបាយ៥នាក់ ត្រូវបានដោះលែងចេញពីពន្ធនាគារ
នៅថ្ងៃទី០៥ ខែវិច្ឆិកានេះ សកម្មជនសង្គម និងអតីតគណបក្សប្រឆាំង ចំនួន៥នាក់ ត្រូវបានដោះលែងឲ្យមានសេរីភាពវិញ បន្ទាប់ពីជាប់ពន្ធនាគារជាង១ឆ្នាំ។ អ្នកដែលត្រូវបានដោះលែង គឺអតីតព្រះអង្គកើត សារ៉ាយ, លោក ថា ឡាវី ដែលជាសមាជិករបស់ក្រុមខ្មែរថាវរៈ និង លោក មាន ព្រហ្មមុនី ជាប្រធានសមាគមសម្ព័ន្ធនិស្សិតបញ្ញវន្តខ្មែរ។ នេះបើតាមសមាគមសម្ព័ន្ធនិស្សិតបញ្ញវន្តខ្មែរនៅថ្ងៃទី០៥ ខែវិច្ឆិកានេះ។ ក្រៅពីនេះមានសកម្មជនអតីតគណបក្សសង្គ្រោះជាតិ២នាក់ ដែលត្រូវបានដោះលែងចេញពីពន្ធនាគារព្រៃស។ លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូបានថ្លែងប្រាប់វិទ្យុបារាំងអន្តរជាតិនៅថ្ងៃទី០៥ ខែវិច្ឆិកានេះ ថា ទោះបីជាមានការដោះលែងសកម្មជនមួយចំនួនមែន តែការរិះគន់ពីសហគមន៍អន្តរជាតិ លើបញ្ហាសិទ្ធិមនុស្សនៅកម្ពុជានឹងនៅតែបន្ត។
ចុះផ្សាយនៅថ្ងៃ៖
សូមស្ដាប់លោក អំ សំអាត៖
កាលពីថ្ងៃទី២៦ ខែតុលា សាលាដំបូងរាជធានីភ្នំពេញបានសម្រេចផ្ដន្ទាទោស អតីតព្រះអង្គកើត សារ៉ាយ លោក ថា ឡាវី និង លោក មាន ព្រហ្មមុនី ឱ្យជាប់ពន្ធនាគារចំនួន ២០ខែ និងពិន័យជាប្រាក់ម្នាក់ៗ ចំនួន ២លានរៀល ពីបទញុះញង់។ អ្នកទាំងនេះ ត្រូវអនុវត្តទោសជាប់ពន្ធនាគារម្នាក់ៗពី ១៤ ទៅ ១៥ខែ ដោយទោសនៅសល់ផ្សេងទៀត ត្រូវបានព្យួរ ។ ទោះបីជាយ៉ាងណា អ្នកទាំងនេះត្រូវបានដាក់ឱ្យស្ថិតក្រោមការព្យួរទោសសាកល្បងសម្រាប់រយៈពេល២ឆ្នាំ ដោយតម្រូវឱ្យពួកគេជូនដំណឹងទៅតុលាការ ប្រសិនបើពួកគេផ្លាស់ប្ដូរអាសយដ្ឋាន ផ្លាស់ប្ដូរការងារ ឬចង់ចាកចេញពីប្រទេស ព្រមទាំងលក្ខខណ្ឌផ្សេងទៀត ។ សូមបញ្ជាក់ថា សកម្មជនសង្គម និងយុវជនទាំងនេះ ត្រូវបានអាជ្ញាធរចាប់ខ្លួន ក្នុងខែសីហា និងខែកញ្ញា ឆ្នាំ២០២០ ពាក់ព័ន្ធនឹងការជួបជុំគ្នាដោយសន្តិវិធីរបស់ពួកគេ នៅក្បែរតុលាការ ដើម្បីអំពាវនាវឱ្យមានការដោះលែង លោក រ៉ុង ឈុន ប្រធានសហជីព ដែលកំពុងត្រូវបានឃុំខ្លួនក្នុងពន្ធនាគារ និងនៅបន្តជាប់ពន្ធនាគារ បន្ទាប់ពីត្រូវបានផ្ដន្ទាទោសពីបទញុះញង់ កាលពីថ្ងៃទី១៨ ខែសីហា ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ